Elder Taylor G. Godoy
Vitusagavulu, Vakaitutu Raraba
Ni oti e vica vata na yabaki ena nona bula vakacakacaka, a kunei koya o Elder Taylor G. Godoy ena dua na ilesu ni sala.
A cakacaka o koya vakavuniwai ni bati, ka tauyavutaka tiko e dua na nona veiqaravi vakataki koya, ka nanamaki me na veivakavulici ena tabana ni veisele bati ni mataka. Ia a sureti koya me vakavulica na Semineri kei na Inisitute e dua na iliuliu vakabete lomani ka nuitaki.
Me biuta na cakacaka sa tekivu me kune na vuana oqo, sa dua na digidigi veibolei vua na vuniwai ni cavubati gone, ka sa mai tokoni oqo ena 1 ni Epereli, 2017, me Vitusagavulu Vakaitutu Raraba. Era taroga e vuqa na itokani vakacakacaka, e rawa vakacava me biuta na cakacaka oqo.
“Au kila ni donu na digidigi oya,” e kaya o koya. Na mataqali yalodei vakaoqori e itukuni ni nona bula na saumaki mai ki na Lotu oqo. Sa yaco me madigi ka veivakalougatataki ni bula na nodra vukei na tani me ra kila ka lomana na kosipeli.
Ena nona cakacaka ena vuli ni Lotu, a cakacaka vakaqasenivuli ni inisitute, kodineita, dairekita, ka dairekita ni vanua. Ena dua na gauna walega qo, a dairekita ni Semineri kei na Inisitute ena wasewase na South America Northwest.
A sucu o Taylor Guillermo Godoy Atanacio mai Lima, Peru, ena 1968, vei rau o Taylor Godoy kei Adalzahinda Atanacio. A mate o tamana ni gonetagane, qai susugi koya na tamana vakacabecabe daulomani o Elias Rebaza. A lewena na Lotu o Elder Godoy ni yabaki 17.
Ni oti nona veiqaravi ena Tabana ni Kaulotu na Peru Lima North, a lesu tale ki nodratou mai Arequipa. A tekivu me rau veitau e kea kei na dua goneyalewa na yacana o Carol Pacheco. Erau a vakamau na veitokani saumaki mai oqo ena 31 ni Me, 1994, ena Valetabu mai Lima Peru. Erau nodrau itubutubu e rua na gone.
A rawata o Elder Godoy e dua na diqiri ena cavubati mai na Catholic University of Santa Maria ena 1993 kei na dua na masita diqiri ni veiliutaki mai na Technical University of Madrid ena 2006.
Sa veiqaravi oti o koya vakabisopi, lewe ni matabose e cake, peresitedi ni iteki, dairekita ni veika raraba, ka Vitusagavulu ni iWasewase.