Elder John C. Pingree Jr.
Vitusagavulu, Vakaitutu Raraba
“Sa tarai cake na noqu ivakadinadina ni toso na gauna, vakalalai, ena ciqomi ni isau ni masu, vakila na Yalo ni wiliki na ivolanikalou, veivutuni, kei na qarava na Turaga,” e kaya o Elder John C. Pingree Jr., ka a tokoni ena 1 ni Epreli, 2017, me dua na Vitusagavulu Vakaitutu Raraba.
A sucu ena 1966 mai Salt Lake City Utah, Amerika, vei rau o Carmen kei John C. Pingree Sr., e vakadinadinataka ni nodrau yalodina nona itubutubu a veivuke ena tarai cake ni nona bula.
“Ena siga au sucu kina, a vola o tamaqu vei au e dua na ivola,” e kaya o Elder Pingree. “A maroroya tu na ivola oya, e muri, niu biubiu meu laki kaulotu tudei, a vakauta yani vei au ena meli. E lewena tu na ivola e vica na draunipepa ni nona ivakadinadina kei na lesoni eso e vinakata meu vulica ena noqu bula. Niu wilika, a vakadinadinataka vei au na Yalo ni veika au vakavulici kina me baleta na kosipeli vakalesui mai i Jisu Karisito mai vei rau noqu itubutubu e ka dina.”
A veiqaravi o Elder Pingree ena Tabana ni Kaulotu vosa Vakasipeni na Massachusetts Boston.
A ciqoma na diqiri eso ni vosa Vakavalagi kei na vakadidike vakapolitiki mai na University mai Utah kei na dua na masita diqiri ena veiliutaki vakabisinisi mai na Harvard Business School. A vakamautaki Anne Pugsley ena Maji 1990, ka rau nodra itubutubu e lima na gone.
E levu na gauna ni nona bula vakacakacaka e vagolei ena nodra vukei na tani. A peresitedi o koya ni dua na isoqosoqo ni veivuke vakavuniwai raraba ka ivukevuke ni peresitedi ni rua na kabani ni veiqaravi vakavuniwai.
A peresitedi o koya ni Tabana ni Kaulotu na Texas Houston ena 2011 ki na 2014 ka veiqaravi oti vaka-Vitusagavulu ni iWasewase, peresitedi ni iteki, bisopi, peresitedi ena kuoramu ni italatala qase, ka qasenivuli ni inisitute kei na semineri.
“E kaya na Turaga, ‘kevaka dou sa gadreva dou na idewadewa ni veika yaga e vuqa ena itabatamata oqo’ (V&V 11:8),” e kaya o Elder Pingree. “Vei au, e kaya tiko na Turaga, ‘E rawa niu vakayagataki iko mo cakava eso na ka vinaka ena nodra bula na tamata, kevaka o vakatara vei au.’ Kevaka eda vaqara na kena madigi, ena vakayagataki keda na Tamada Vakalomalagi me da vakalougatataka na nona bula e dua tale.”