O Le Tusiata Tuai a le Aiga: O Le Mana o Tala Faaleaiga
E alala le tusitala i Niu Ioka, ISA.
E ola pea talatuu a ou tuaa e ala mai ia te au, ma faaauau ai pea ona uunaia lou olaga mo le lelei sili atu.
I se tasi taeao o le taumafanafana ao lumanai le Taua Lona II a le Lalolagi, na ala ae i luga lou tamamatua e pei ona sa ia masani ai—a o lei oso mai le la. Sa ia alu atu i fafo o lona fale i luga o se maupuepue e faasaga i se vanu lanulauava ma lona nuu i Romania, ma saofai i luga o le mutia o loo susu i le sau o le taeao po, o loo mafaufau loloto i ona lagona—o manatu lava na sa i lona mafaufau mo sina taimi. O se tamalii atamai ma se lototoa ma se mafaufau e tumu i le fiailoa, sa alofagia ma faaaloalogia o ia e tagata uma o le nuu.
Ina ua mavae le oso ae o le la, na ia alu i le fale ma tau atu i lona toalua ua ia fia vaai pe o le a faapei lona toe sauniga o le maliu, ma sa ia manao ia faia se faataitaiga o ofu o le sauniga o le maliu. Na ia faatulaga le aso, faatau mai le pusamaliu, faatonu le faifeau ma tagata faanoanoa e totogi, ma maua mai isi mea uma o loo manaomia i le tu masani o le Lotu Eleni. Ona oo mai lea o le aso o le faataitaiga o ofu o le falelauasiga. Sa faatulaga laulau i le ogatotonu o le nuu mo le tausamaaga e manatua ai, sa laei uma le aiga i ofu uli, sa sau le faifeau, sa taoto le tama o lou tamamatua i le pusamaliu, ma toefaatulagaina le aluga ina ia mafai ona ia maua se vaaiga lelei, ma amata loa le falelauasiga. Ina ua uma le sauniga, na valaaulia le nuu atoa i le tausamaaga, ma na faataunuuina e le Tama o lou tamamatua lana miti o le siva lea i lona lava sauniga o le maliu. Sa ia soifua i le isi 20 tausaga, ma e masani ona siakiina e vaai pe o ofi pea le pusamaliu ia te ia.
E le na o Igoa ma Aso
Ou te lei feiloai lava i le tama o lou tamamatua, ae o lana tala ou te fiafia lava i ai lea na tuufaasolo mai ia te au e ou matua matutua. O aso uma lava e faamatala mai ai e ou matua matutua ia te au ma nai ou tei ni tala e uiga i o matou tuaa: le mea na latou o mai ai, pe sa latou faapei, o latou tulaga faatauaina, miti, ma faamoemoega. I le maea ai o le taumafataga i Aso Sa uma lava, e aumai ai e ou matua matutua le tusiata a le aiga, ma i soo se taimi e susue ai le itulau, e toe ola mai ai tagata o tala ma e fusia faatasi loto o loo i le ono tupulaga i le alofa. E na oni ata tuai ma ni igoa ma aso o loo osiosi i le pito i tua. I tua o foliga taitasi sa i ai se tama po o se tina, se atalii po o se afafine, se uso po o se tuafafine, ma sa faapea lo latou talatuu, faatasi ai ma isi tu ma aga faaleaiga, sa tuufaasolo mai i lalo ia te au.
Malosi i Taimi o Tofotofoga
E oo atu i le taimi ua ou 19 ai, ua maliliu ou matua ma le toatele o tagata o lo‘u aiga lata mai, ma o le tele o mea sa ou mautofi ai na leiloloa pe gaoia. Ae peitai o loo i ai se mea se tasi e le mafai ona faaleagaina e le taimi, mala faalenatura, po o le oti foi: le alalaupapa o le alofa lena e sosooina le taimi o le tuanai, taimi nei, ma le lumanai lea na fausia e tagata o lou aiga. Ona o lo latou filiga, ua tuuina mai ai ia te au e filo ia na fusia faatasi ai loto o lo matou aiga le malosi e manumalo ai i tulaga faigata.
Ina ua maliliu ou matua ma matua matutua, sa ou lagonaina se faanoanoa maoae lea na ou mafaufau ai pe mafai ona lava lou malosi e faaauau ai pea. Sa faamanuiaina au e lagonaina la latou uunaiga mai tala atu o le veli, ma na fesoasoani ia te au e maua ai se molimau malosi i le fuafuaga o le faaolataga, o le ola i talaatu o le oti, ma mulimuli ane, o sauniga o le malumalu na e matuai manaomia lava mo lo tatou faaolataga. Ou te lei feiloai lava i ou matua matutua po o le toatele o uso ma tuafafine o lou tina ma lou tama, ae o taimi uma lava ou te aumaia ai i luga le tusiata tuai a le aiga faatasi ma o latou ata, ou te vaai lava ia te au i o latou mata. Ua avea au ma tagata ua ou i ai nei ona o i latou uma o e na muamua mai ia te au. Ua fesoasoani a latou aafiaga ma le poto e mamanuina ai lou tagata, ma sa taialaina ai au i lou olaga.
O se tasi o meaalofa silisili na tuuina mai e lou aiga ia te au talu ona avea o se tamaitiiti o le malamalama e uiga i le talafaasolopito o lou aiga, ma le talitonuga maumaututu e faapea o au o le sootaga i le va o le taimi ua tuanai ma le lumanai. Ou te iloaina foi na ou sau i le lalolagi e ola ai i lau lava tala—e sailia ma oo i ai ma faapelepele i ai. O lenei malamalama o le talafaasolopito o lou aiga ua lagolagoina ai a‘u i tofotofoga uma o le olaga.
Ou te mafaufau soo i lou aiga i le isi itu o le veli ma osigataulaga na latou faia mo au ina ia maua ai se olaga e sili atu. Ou te manatu o le sauniga o le malumalu e mafai ai ona toe faatasia o se aiga i se aso. Ma ou te mafaufau i le Togiola a lou Faaola, lea na mafaia ai mea uma lava. Na Ia totogiina le tau ina ia tatou ola. Mo lenei mea, tatou te alolofa ai ia te Ia ma tapuai ia te Ia i le agaga faafetai i le taimi nei ma le faavavau.