O Leo o Le Au Paia o Aso e Gata Ai
Faamolemole Aua Le Taina Lena Pese
Ata na tusia e Bradley H. Clark
I se taimi ua mavae, sa matou nonofo ai ma lou aiga i Veracruz, Mekisiko, lea na aooga ai lau fanau i le aoga maualalo. I taeao taitasi a o ou fesoasoani i lau fanau e toatolu ia saunia mo le aoga, matou te faalogologo i le leitio—le alaleo e sili ona lauiloa i le aai—faatasi ai ma se polokalama manaia tele e taitaia e se alii faasalalau o le leitio.
Sa amata ona matou faalogo i se pese e sili ona faamomoiloto. Ina ua ou amata ona gauai atu teisi i upu o le pese, sa ou iloaina ai o mea sa ia tau maia, e ui e le matuia, ae na faatosina ma mataga.
Sa ou fai atu ma le naunautai i lau fanau, “E le mafai ona tatou faalogo i lenei ituaiga o gagana.” Atonu latou te lei gauai atu lava i upu o le pese, ae sa lava lo latou faalogo aua na latou hamuina lona fati.
Sa latou vaai mai ia te au ua tape le leo o le laau ma fesili mai ia te au po o le a lau mea ua fai. “O le a ou alu e tau atu i le tagata faasalalau o le leitio e aveese lena pese mai le polokalama.” O lo latou ofo tele sa uunaia au e faaauau le faatinoga.
Sa latou le talitonu i ai ma e faapena foi au, ae sa ou siiina i luga le telefoni ma valaau i le nofoaga o le leitio. Ou te lei faamoemoe e maua mai se tali, ae i lou ofo tele, o le tagata faasalalau lava lea na faatoa matou faalogologo i ai i le faaaliga na vave lava ona tali mai i lau valaau.
Sa ou tau atu ia te ia faapea ou te le ioe i le faalogologo i lena pese, ona o le tele o aiga e faalogologo i le leitio i lena taimi o le taeao. Sa ia fesili mai ia te au po o le a le pese ou te fautuaina na te suia ai, ae o lana amio sa matua lelei lava o lea sa na ona ou talosaga atu ai lava e aua na te taina lena pese i le taimi e i ai tamaiti i le fale.
Ou te lei iloa lava pe na i luga o le ea lau valaau, ae sa ou faafetai lava na faalogo mai le tagata faasalalau o le leitio. Ma mo nai aso na sosoo ai, sa ou iloaina ai sa taliina mai lau talosaga.
Na faamautinoa mai e lena aafiaga ia te au e tatau ona tatou lototele pe a mafai ona tatou faia ni faaiuga ma faia mea e manaomia e puipuia ai a tatou fanau mai faatosinaga le lelei. A tatou faia lena mea, e mafai e le Agaga Paia ona faaauau pea ona avea ma a tatou soa tumau.