Mai le Misiona
Sina Faatuatua, Faamanuiaina Tele
E alala le tusitala i Guerrero, Mekisiko.
Ao avea ai ma se faifeautalai i Mekisiko, sa ou maua se aafiaga sa fesoasoani ou te vaai ai i “fua lelei” e mafai ona maua pe a tatou faatinoina lo tatou faatuatua.
Sa fuafua se gaoioiga faafaifeautalai i le siteki sa ou auauna atu ai. O maua ma lau soa sa tatau ona faamatala faapuupuu atu se mataupu faavae o le talalelei i tagata sailiili o le a auai. Ae peitai, ina ua ma taunuu i le falelotu, sa ma iloaina ai sa tau le i ai lava ni tagata sailiili na o mai. Nai lo le aoaoina atu o le mataupu faavae e pei ona sa muai fuafuaina, sa talosagaina i matou e o atu i le auala ma valaaulia ni tagata e ui ane e o mai ma auai i le gaoioiga.
O le mea moni, sa ou le manofo ae mafaufau, “O le a le manuia lenei mea.” Sa ou lagonaina o a matou taumafaiga o le a lē aoga—e leai se tasi o le a taliaina le valaaulia e na ona sau i le gaoioiga, ae maise lava i se taimi faafuasei faapena.
Ae sa ma malamalama i le taua o le usiusitai, o lea na ma taumafai ai ma lau soa e valaaulia tagata e o mai i totonu. E lei umi lava mulimuli ane, ae ui ane se tamaitai ma lana tama teine ma le uo tama a lana tama teine. Na ma valaaulia i latou e o mai i totonu. I le taimi muamua sa le mautonu i latou, ae na iu lava ina latou talia le valaaulia ma faatasi atu i le vaega i totonu. Sa ou ofo ae na fiafia tele.
Na amata le gaoioiga: o se polokalama faamusika e totonugalemu i le talalelei. Sa umi le gaoioiga i le sili atu ma se itula. Sa ou popole nei feita a ma malo faaaloalogia ona o le umi tele o le gaoioiga, ae sa ou faia se tatalo i lou loto ma ole atu mo mea uma ia sologa lelei.
Ina ua uma le gaoioiga, sa ou faalatalata atu ia i latou e faamalie atu mo le faaaluina o le tele o lo latou taimi. A o lei fai atua se upu ia te i latou, sa fai mai le fafine, “Faafetai lava. Faafetai tele lava. O se mea ina matagofie. Faafetai lava.”
Sa ou ofo; sa latou faafetai mai ia i matou mo le aafiaga, ma latou te lei popole e uiga i le taimi. O se mea ofoofogia, ma sa i ai le olioli i lou loto. (Ma le mafaufau faapea na ou fai atu o le valaaulia o tagata i le auala o le a le manuia!) Sa manao le tamaitai ia iloa atili e uiga i le Ekalesia ma auai i sauniga i aso Sa.
Sa ou aoaoina se mea maoae mai lenei aafiaga: o le faaaogaina o le na o se tamai faatuatua, e tusa lava pe afai e leai se mea e sili atu nai lo se manao e talitonu, e mafai ona maua mai ai ni fua maoae (tagai i le Alema 32:27–28).
O lenei aafiaga na suia ai lou uiga faaalia mo le vaega o totoe o lau misiona. Mai lena taimi, i gaoioiga faafaifeautalai taitasi, ou te vaaia i fua o au galuega pe a ou alu atu ma le faamoemoe ma se mata o le faatuatua.
Afai tatou te faatinoina le faatuatua, e tusa lava pe tatou te manatu e le mafai ona tupu, o le a mafai ona tatou maua fua suamalie. O mea tatou te mafaufau i ai e faigata, e le faigata lea i le Atua.