O Leo o Le Au Paia o Aso e Gata Ai
O Le Ataata a le Tagata Ese
Ou te masani lava ona aloese mai ia te ia—o se tagata foliga mativa e taalo i se taaloga o le pele i se laulau i le itu e taaalo ai o se faleaiga o meaai faavavave i le lotoifale. Sa ia te ia se ataata vaivai i ona foliga faanoanoa ao ia vaavaai atu i fanau o taaalo. “Ai o ia faamafanafanaina o ia lava mai le malulu,” sa ou mafaufau ai ao ou pasia lana laulau e tiai le meaai a lau tama teine ua uma ona ai le afa. A o ou matauina lana laulau, e aunoa ma ni pepa na afifi ai ni meaai po o ni ipuinu pepa, na musumusu mai le leo itiiti, ma le filemu ia te au, “Faatau se meaai mo ia.”
Sa ou toe foi atu i lau laulau ma se tupe o loo i ai pea i lau taga. “O le a ou faamaasiasi ia te ia,” sa ou fai atu ia te au lava. Ona oo mai lea o se lagona filemu, ma le musumusu matagofie o le Agaga na faamafanafana mai ia te au: “Faatau se meaai mo ia.”
Ou te lei tauina i lau fanau le mea sa ou faia; sa na ona ou pikiina i luga oni otaota ma alu atu e tiai ina ia mafai ona ou latalata i autafa o le laulau a le tagata e aunoa ma le faailoaina atu i la‘u uo sa ma ‘aai.
Sa ou faalagolago atu ma fesili atu, “E mafai ona ou faatauina se meaai o le aoauli mo oe?”
Sa foliga faateia o ia ma tali filemu mai, “Pe a e manao i ai.”
Sa ou aumaia i fafo sina tupe itiiti na totoe ia te au—na fetaui lava mo se meaai ma se vai inu—ma tuu atu i le tagata. Sa ou toe foi atu i lou nofoa, e aunoa ma le iloaina e tina na pisi i ou autafa, ma vaavaai atu i le tagata ua tu i luga e faatau lana meaai.
A o ou utaina lau fanau i totonu o le taavale e o i le fale, sa ou vaai atu i le faamalama ma vaaia ai le tagata o aveina se ipu meaai ma toe foi atu i lana laulau gaogao. I ona fofoga faanoanoa sa i ai ua i ai nei se ataata.
Sa lei matuai maatiati le malulu o le savili na taia ai ou foliga. Sa ou fiafia i le Agaga mafanafana, ma le olioli na faatumulia ai lou tino atoa lava. Sa ou manatuaina le aoaoga a le Faaola:
“Aua na ou fia ai, ona outou avane ai lea ni meaai ou te ai ai: na ou fia inu, ona outou avane ai lea ni vai ou te inu ai …
“Ona tali mai ai lea ia te ia o e amiotonu, e faapea mai, Le Alii e, o anafea ua matou iloa ai oe ua fia ai, ma matou fagaina oe? po o fia inu, ma matou avane e te inu ai? …
“Ona tali atu ai lea o le Tupu e faapea atu ia te i latou, E moni ou te fai atu ia te outou, Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:35, 37, 40).
Ou te faafetai mo le ataata a se tagata ese na fesoasoani ia te au e maua ai le lototele e fai le mea tonu.