O Le Mea Tatou Te Talitonu I Ai
Tatou Te Talitonu o le a Faatumuina e le Ekalesia le Lalolagi
Sa na o le toaono tagata o le Ekalesia i le taimi na faatulaga ai i le 1830 i se tamai aai i Niu Ioka, ISA. Talu mai lena taimi ua faatupulaia le auai o tagata i le silia ma le 15.5 miliona tagata o le ekalesia ma uarota ma paranesi i le sili atu ma le 150 atunuu. O lenei faatupulaia o le faataunuuga lea o le valoaga i le Feagaiga Tuai e faapea o le a taavale atu le Ekalesia ma faatumulia ai le lalolagi atoa (tagai Tanielu 2:31–45). O le Ekalesia—le malo o le Atua i luga o le fogaeleele—ua faamatalaina “na tofia [le maa] i le mauga, a e lei tofia i lima” (Tanielu 2:45), ua faaalia mai o se galuega paia, ae le o se galuega na faia i lima.
E oo lava ina ua faatumulia e aafiaga o le Ekalesia le lalolagi, na toalaiti lava ona tagata auai. Na muai vaai Nifae i lenei mea ma tusi e uiga i o tatou aso, “Ma sa oo ina ou vaai atu i le ekalesia a le Tamai Mamoe a le Atua, ma sa toaitiiti ona aofai” ona o le amioleaga sa siomia ai (1 Nifae 14:12). Ao latalata le oo mai o le taimi o le Afio Mai Faalua o Iesu Keriso, o le a faateleina le amioleaga o le lalolagi, ma “o le a faaitiitia le tautaua o le avea ai ma se Au Paia o Aso e Gata Ai.”1
Ae sa muai vaai foi Nifae “o le ekalesia a le Tamai Mamoe, o i latou ia o le au paia a le Atua, ua i ai foi i latou i luga o le lalolagi atoa” (1 Nifae 14:12). Ua i ai uarota ma paranesi i luga o le lalolagi atoa, ua faaliliuina konafesi aoao i le silia ma le 90 gagana, a e toeitiiti atoa le 75,000 o faifeautalai faamisiona o loo faasoaina atu le talalelei i misiona e 418. O loo faasalalauina atu foi le talalelei i le lalolagi atoa e ala atu i ala faasalalau faaagafesootai ma uepisaite e pei o le Mormon.org ma le LDS.org.
O nei taumafaiga e taua tele ma lautele ae e masani lava ona le tele se taulaiga atu i ai. “O le galuega a le Alii e moni lava e tele ma ofoofogia, ma e alualu i luma ma le taua ma e le iloa e le toatele o taitai faaupufai, faaleaganuu, ma faaleaoaoga. E auaua’i lava le tasi o le loto, tasi le aiga i le taimi, i se ala filemu ma le le gaoia, o ana savali paia ua faamanuiaina ai tagata i soo se mea.”2
O le maa ua leva ona valoia o loo taavale moni atu lava, ma pe a faia la tatou vaega, o le a faaauau pea ona salalau atu le talalelei ma faatumulia ai le lalolagi atoa (tagai Tanielu 2:31–45).
O a ni mea e mafai ona tatou faia e fesoasoani i le talalelei ina ia taavale atu i luma?
-
O le tausiga o poloaiga ma faamalosia a tatou molimau e aumaia ia i tatou se faavae e fesoasoani e faasalalau atu ai le talalelei.
-
O le aoao atu o le talalelei i o tatou aiga e faamalosia ai i latou ina ia ola faamaoni i se lalolagi lea e ese mea oo loo aoaoina ai i latou.
-
O le faataunuuina o o tatou valaauga e fesoasoani e faamalosia le Ekalesia i totonu o eria o lo tatou lotoifale.
-
E mafai ona tatou fesoasoani e faasoa atu le talalelei i le na o le talanoa atu i tagata e uiga i ai.
-
E mafai ona tatou faataunuuina sauniga i le malumalu mo i latou o e ua maliliu e aunoa ma le faalogo i le talalelei i lenei olaga.