O Leo o Le Au Paia o Aso e Gata Ai
Fetuunaiga o Mea Ou Te Faamuamuaina
E lei leva ona uma ona ou amataina le poloka [blog] a lo matou aiga, ae ou iloaina le faaaluina o ou taimi avanoa uma i le faafouina ma mafaufau pe faapefea ona ou faamanaiaina ma fatufatuina. Sa ou faaaluina le tele o taimi e faitau ai i poloka a isi foi tagata.
I totonu o ni nai vaiaso, sa avea le poloka ma se mea ua ou faamuamuaina nai lo a’u suesuega i tusitusiga paia ma isi faitauga. Sa le mafai ona ou mafaufau ao suesue, sa ou le toe manao e faitau, ma sa ou lagona le leai o se Agaga i lo’u olaga. Sa tau le lava lo’u onosai i la’u fanau, ma o le taimi sa tatau ona ou faaaluina ma i latou, sa ou faaaluina lea i le komepiuta.
E le faapea ona sa le talafeagai le poloka; aua o le mea moni lava, o se auala lelei lea e fesootai ai ma aiga ma uo. Ae talu ai sa ou lagona le aveese mai o mea sa ou taulai i ai mai mea lea o le a aumaia ia te a’u se faavae faaleagaga malosi, sa ou iloaina ua tatau ona i ai se mea e sui.
Sa amata i lou tauina ia te au lava ia e le tatau ona ou alu i le poloka i aso uma ma e le tatau foi ona ou siakiina poloka a isi tagata i aso taitasi. Sa ou filifili e mafai lava ona ou faaaluina se taimi avanoa i luga o le komepiuta ae pe a uma ona faitau a’u tusitusiga paia ma isi faitauga. E oo atu i le taimi ua uma ai ona ou faia mea e sili ona taua, ua le lava se taimi ou te alu ai i le poloka, ae e le afaina. Ua ou toe mauaina mai le tele o le taimi—taimi lea ua ou faaaluina i le taimi nei e tausia ai ma taaalo ma la’u fanau, faitau, ma suesue ai.
Ina ua mavae ni nai aso o le toe fetuunaia o mea e faamuamua, sa ou iloa lou toe lagonaina atili o le Agaga i lou olaga.
Ua ou iloa a ou faamuamuaina i aso taitasi mea o le a faamanuiaina ai a’u faaleagaga, o le a ou lagonaina atili le Agaga i aso taitasi. Ua ou iloa o le faaavanoaina o le taimi mo suesuega i tusitusiga paia, faitau o mekasini a le Ekalesia ma isi tusi lelei, ma o le mafaufau i mea e taua faavavau o le a fesoasoani ia te a’u ina ia avea ma se ava lelei, se tina lelei, ma se tagata lelei o le Ekalesia a le Alii.