Savali a le Au Peresitene Sili
Taulai Atu i le Ogatotonu
Saunia e Peresitene Dieter F. Uchtdorf
Fesoasoani Lua i le Au Peresitene Sili
Ata na pueina e © Serg Myshkovsky/Getty Images
Talu ai nei, sa ou matamata ai i se vaega o tagata o loo faataitaia le tomai o le tagata faga aū. E na o le matamata i ai, sa amata ona manino ia te au afai e te manao moni ia lelei i le aufana ma le aū, e manaomia ai le taimi ma le faataitaiga.
Ou te manatu e le mafai ona e atiae se tulaga mo le tagata faga aū lelei e ala i le faga atu i se puipui e leai se mea o i ai ona tusi lea o ni taulaiga e faataamilo i aū. E ao ona e aoaoina le tomai o le mauaina o le taulaiga ma faga tonu le taulaiga autu.
Valiina o Taulaiga
O le fagaina muamua ma le tusiina o le taulaiga pe a uma e ono foliga e faavalevalea, ae o nisi taimi e faataitaia e i tatou lava lena lava amio i isi tulaga o le olaga.
I la tatou matafaioi o tagata o le Ekalesia, o loo ia i tatou le lagona i nisi taimi e tuuto atu i polokalama o le talalelei, o mataupu, e oo lava i aoaoga faavae e foliga manaia, taua, pe faafiafiaina ia i tatou. E faaosoosoina i tatou e tusi ni taulaiga e faataamilo ia i latou, ma tatou talitonu ai o loo tatou mulimuli i vaega sili ona taua o le talalelei.
E faigofie ona faia lea mea.
I le talafaasolopito o le lalolagi, sa tatou mauaina ni fautuaga ma ni uunaiga aupito sili ona lelei mai i perofeta a le Atua. Tatou te maua foi le taitaiga ma le faamaninoga mai i lomiga eseese, o tusitaulima, ma tusi lesona a le Ekalesia. E mafai ona faigofie ona tatou filifili la tatou autu faaletalalelei e sili ona fiafia i ai, tusi faataamilo se mea e taulai i ai, ma faia se tulaga e faamasino ai le totonugalemu o le talalelei.
Ua Faamanino Mai e le Faaola
E le o se faafitauli lenei e uiga ese i o tatou aso. I anamua, sa faaalu ai e taitai faalelotu se taimi tele e faavasega ai, faatulaga, ma finauina po o le fea o le faitau selau o poloaiga sa sili ona taua.
I se tasi o aso sa taumafai ai se vaega o tagata atamamai faalelotu e faaaofia le Faaola i totonu o le finauga. Sa latou talosaga atu ia te Ia e tuuina mai ni Ona manatu i nai manatu e mafai ona malilie i ai.
“Le aoao e,” sa latou talosaga ai ia te Ia, “o le fea poloaiga o i le tulafono ua sili?”
Ua tatou iloa uma le ala na tali atu ai Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”1
Faamolemole matau le fuaiupu mulimuli: “O na poloaiga e lua ua autu ai le tulafono uma ma le au perofeta.”
E le gata sa faaali mai e le Faaola le taulaiga, ae sa Ia faailoa mai foi le taulaiga autu.
Faga Tonu le Taulaiga
I le avea ai o ni tagata o le Ekalesia, tatou te osi feagaiga e ave i o tatou lava luga le suafa o Iesu Keriso. O se vaega e malamalama ai o lena feagaiga o le malamalamaaga o le a tatou taumafai e aoao e uiga i le Atua, alofa ia te Ia, faateleina lo tatou faatuatua ia te Ia, faamamalu o Ia, savali i Ona ala, ma tutu mausali o ni Ana molimau.
O le tele o lo tatou aoao e uiga i le Atua ma lagona Lona alofa mo i tatou, o le tele o le tatou iloaina o le taulaga le iu a Iesu Keriso o se meaalofa paia a le Atua. Ma e musuia i tatou e le alofa o le Atua e faaaoga le ala o le salamo moni, lea o le a taitai atu i le vavega o le faamagalo atu. O lenei faagasologa e mafai ai e i tatou ona maua le alofa silisili ma le agalelei mo i latou o siomia i tatou. O le a tatou aoao e vaai i tua atu o mea faalelelei. O le a tatou tetee atu i le faaosoosoga e tuuaia po o le faamasino atu i isi i o latou agasala, le atoatoa, mea sese, manatu faapolokiki, talitonuga faalelotu, tagata, po o lanu o pau.
O le a tatou mafaufau i tagata uma tatou te feiloai i ai o se atalii/afafine a lo tatou Tama Faalelagi—o lo tatou uso po o lo tatou tuafafine.
O le a tatou aapa atu i isi i le malamalama ma le alofa—e faapena ia i latou o e foliga mai e le faigofie ona alofa i ai. O le a tatou faanoanoa mai latou o e faanoanoa ma faamafanafana i latou o e manaomia le faamafanafanaga.2
Ma o le a tatou iloaina, e le manaomia ona tatou atugalu e uiga i le taulaiga sao o le talalelei.
O poloaiga e sili e lua o taulaiga ia. O na poloaiga e lua ua autu ai le tulafono uma ma le au perofeta.3 A o tatou taliaina, o isi mea lelei uma o le a malamalama e tusa ai ma o latou taua talafeagai.
Afai o lo tatou taulaiga autu, mafaufauga, ma taumafaiga e taulai i le faateleina o lo tatou alofa i le Atua Silisili Ese ma tuuina atu o tatou loto i isi, e mafai ona tatou iloa ua tatou maua le taulaiga sao ma o loo taulai atu i le taulaiga autu—o le avea ma soo moni a Iesu Keriso.