Ang Misyonaryo nga Pagserbisyo nga Akong Gikinahanglan
Ang tagsulat nagpuyo sa São Paulo, Brazil.
Miyembro ko sa Simbahan, apan nagkinahanglan usab ako sa mga misyonaryo.
Sa dihang nag-17 anyos na ko, ang tanan nakong mga higala nawala na. Namalhin sila, nagserbisyo og mga misyon, o mihunong sa pagpakighigala nako. Bisan og duna koy pamilya, gibati gihapon nako nga nag-inusara. Gibati nako nga walay suporta sa gawas sa akong panimalay, ug dili ko mahiangay sa uban bisan og naningkamot na ko.
Usa ka adlaw ang bag-ong mga misyonaryo nga na-assign sa among ward miadto sa among balay ug nagpaila-ila sa ilang mga kaugalingon. Nangutana sila kon duna ba silay ikatabang namo. Wala ko magtagad sa unsay ilang gisulti tungod kay naghunahuna lang ako kon unsa ko ka masulub-on ug nag-inusara. Dayon ang mga misyonaryo miingon nga ganahan sila nga motabang ko sa pagtudlo sa pipila sa ilang mga leksyon. Nasurprisa ko! Nganong mohangyo sila og tabang gikan sa usa ka tawo nga klaro man nga wala sa maayong emosyonal nga kahimtang?
Miuyon hinoon ko, ug miadto sa pipila ka mga leksyon uban nila. Ang mga misyonaryo wala lamang motabang sa mga tawo nga ilang gitudloan apan nahimong maayong impluwensya ngari nako.
Sa dihang usa sa mga elder ang nabalhin, akong naamguhan nga ang akong kinabuhi nahimong mas maayo sukad ako nagsugod sa paggahin og panahon uban sa mga misyonaryo. Daghan ko og kapareha sa misunod nga elder nga miabut sa dapit, ug nagpadayon ko sa paggahin og panahon uban sa mga misyonaryo. Miawhag, mitudlo, ug misuporta sila kanako. Mitabang sila nako nga mobati og maayo sa malisud nga mga adlaw. Bisan pa sa babag sa pinulongan ug sa ilang busy nga mga iskedyul, ang mga misyonaryo naningkamot sa pagtabang kanako. Ang mga misyonaryo mitabang nako nga makaamgo nga ako wala mag-inusara. Ang Langitnong Amahan ug ang Iyang Anak, nga si Jesukristo, nagbantay nako ug nagtabang nako pinaagi sa uban.
Sa dihang mibiya kadtong bag-ong elder, nagpasalamat ako kaniya nga nahimong instrumento sa mga kamot sa Ginoo sa pagluwas kanako. Mapasalamaton ko nga miabut siya sa maong misyon tungod kay siya usa ka panalangin kanako.
Sa wala pa kining panahona, hapit wala na koy tinguha nga magmisyon, apan samtang ako nagtan-aw niini nga mga misyonaryo, ang akong tinguha sa pagserbisyo mitubo. Magmisyon na ko sa dili madugay, ug naglaum sa paghatag sa tanan nako ngadto sa Ginoo sama sa gibuhat niadtong mga misyonaryo.
Sa wala pa ang unang parisan sa mga misyonaryo miabut sa akong panimalay, nakahihumdom ko nga mibati nga nag-inusara usa ka gabii ug nag-ampo. Mihangyo ko sa Dios sa akong tibuok kasingkasing sa pagpadala og bisan usa lamang ka higala sa pagtabang ug pagsuporta nako. Ang Ginoo mitubag sa akong pag-ampo sa wala damha nga paagi—pinaagi sa pagpadala sa mga misyonaryo. Nasayud ako nga si Jesukristo buhi ug nga ang mga misyonaryo mao ang Iyang mga sulugoon.