Ivi ke Filí
ʻOku nofo e tokotaha naʻá ne fai e talanoá ʻi Kalefōnia, USA.
Ngāue fakafaifekau pe hoko ko ha taha palofesinale ʻi he hiki meʻa mamafá? Naʻe tokoni ha potufolofola naʻe ʻomi ʻe hoku kaungāmeʻá kiate au ʻi heʻeku filí.
Naʻá ku fiefia vale ʻi he taimi ne telefoni mai ai ha tangata ʻi ha ʻaho ʻe taha ʻo talamai kuó ne ʻosi mamata heʻeku fakaʻaliʻali hiki meʻa mamafá pea ʻoku loto ke ne fakapaʻanga au. Te ne totongi hoku valá mo e meʻakaí pea fakapuna au ki ʻIulope ke fai ha ngaahi fakaʻaliʻali ai. Naʻá ne pehē foki te u lava ʻo ʻasi ʻi ha makasini. Ko hoku manakó ʻa e hiki meʻa mamafá, pea ko ʻeku fakaʻānauá ʻeni! Ko e palopalemá pē he naʻá ku ʻosi fakahū ʻeku pepa ngāue fakafaifekaú ʻi ha ngaahi ʻaho siʻi kimuʻa. Naʻá ku talaange ki he tangatá te u fakakaukau ki ai pea toki telefoni ange.
Naʻá ku fehangahangai heni mo e fili faingataʻa taha ʻi heʻeku moʻuí. Ko e fakakaukau ʻeku ongomātuʻá, ʻoku ʻikai kau e tali ia ʻo e fakapaʻanga ko ʻení ʻi he filí. Naʻá na pehē, “Mahalo te ke ala maʻu e faingamālie ko ʻení ʻi he ʻosi hoʻo ngāue fakafaifekaú.” Ka naʻe ʻikai ke mataʻofi ʻeku fakakaukau ki aí. Naʻá ku ʻilo ʻoku totonu ke u ʻalu ʻo ngāue fakafaifekau ʻo talangofua ki he ʻEikí, ka ko ʻeku fakaʻānauá ʻeni.
Naʻá ku ʻeke ki ha tokolahi ʻo hoku kaungāmeʻá pe ko e hā haʻanau fakakaukau ki he meʻa ʻoku totonu ke u faí. Ne pehē ʻe ha niʻihi ʻoku totonu ke u tali, pea pehē ʻe ha niʻihi ia ko Sētane ʻeni ʻokú ne fakataueleʻi aú he ʻoku ʻikai loto ia ke u ngāue fakafaifekau.
Naʻe vahevahe mai ʻe haku kaungāmeʻa mamae ʻi ha ʻaho ʻe taha ha kupuʻi lea ʻa Palesiteni ʻĒselā Tafu Penisoni (1899–1994):“Ko e tangata mo e fefine kuo momoi ʻene moʻuí maʻá e ʻOtuá te ne fakatokangaʻi ʻa e toe lahi ange ʻa e meʻa te ne lava ke fai ʻaki ʻene moʻuí. Te Ne toe fakalahi ange ʻa ʻenau fiefiá, fakalahi e mahino ʻoku nau maʻú, fakamāmaʻi honau ʻatamaí, fakamālohia honau ngaahi uouá, hiki hake honau laumālié, liuliunga honau ngaahi tāpuakí, fakalahi honau faingamālié, fakafiemālieʻi ʻenau moʻuí, fokotuʻu [hanau] ngaahi kaungāmeʻa, pea mo lilingi atu ʻa e [nongá].”1
Naʻe ongo lahi e kupuʻi lea ko iá kiate au. Pea pehē foki mo ha potufolofola naʻá ku lau ʻi he Tohi ʻa Molomoná: “Pea kapau ʻe hanga ʻe he fānau ʻa e tangatá ʻo tauhi ʻa e ngaahi fekau ʻa e ʻOtuá, ʻokú ne fafanga ʻa kinautolu, pea fakamālohi ʻa kinautolu, pea ʻomi mo e ngaahi founga te nau lava ai ʻo fai ʻa e meʻa kuó ne fekau kiate kinautolú” (1 Nephi 17:3).
Naʻá ku pehē leva ʻi he tokoni ʻa e kupuʻi lea mo e potufolofola ko ʻení fakataha mo e poupou ʻa hoku kaungāmeʻá mo e fāmilí, ke u ngāue fakafaifekau pea naʻe ui au ke u ngāue ʻi he Misiona Polivia Sokapamupaá.
Naʻe hoko ʻa e ngāue fakafaifekaú ko e fili lelei taha ia kuó u faí. Naʻá ku mātaʻia ha ngaahi tāpuaki lahi he lolotonga ʻeku ngāué, kau ai mo hono tāpuakiʻi au ke vave ʻeku ako e lea faka-Sipeiní.
Naʻe tāpuekina foki hoku fāmilí ʻe he ʻEikí. Naʻá ku maʻu ha ʻīmeili he lolotonga ʻo ʻeku ngāue fakafaifekaú, mei heʻeku ongomātuʻá ʻo talamai ne ʻalu hoku tokoua lahí ki he lotú, ko e fuofua taimi ia ʻi ha taʻu ʻe 12. Naʻá ne lililu kimui ʻene taimi-tēpile ngāué kae lava ʻo ʻalu he Sāpate kotoa pē, mo ne fokotuʻu ha taumuʻa ke ne lau e Tohi ʻa Molomoná. Naʻe toe fai foki ʻe hoku kiʻi tokoua siʻí ha ngaahi liliu ʻi heʻene moʻuí mo fakamālohia ʻene tuí, ka naʻe faingataʻaʻia mo ia. Naʻe toe mālohi mai e tamasiʻi naʻá ku tokoua ʻaki pea kamata ʻalu ki he temipalé he uike kotoa ke fakahoko e papitaiso maʻá e kau pekiá. Kuo tāpuekina moʻoni kimautolu.