Fānau ʻOku Nau Tuʻu ʻAliʻaliaki
Ngaahi Tāpuaki meia Pelesí
Mālō e Lelei! Ko hoku hingoá ko Pelesi!
ʻOku ou nofo ʻi ʻInitia mo hoku fāmilí. Naʻá ku palani ha ʻekitivitī Kilisimasi makehe ki hoku ʻapiakó mo vahevahe ʻa e ongoongoleleí mo hoku kaungāmeʻá!
Kau Faifekau Kei Talavoú
ʻOku akoʻi heʻeku kau taki he Palaimelí ʻoku totonu ke tau hoko ko e kau faifekau. ʻOku ou fakaafeʻi he taimi ʻe niʻihi hoku kaungāmeʻá ki he lotú. ʻOku nau tali ʻikai ʻi he taimi lahi. Naʻá ku fakakaukau he meimei taimi kotoa pē naʻá ku fuʻu kei siʻi ke hoko ko ha faifekau.
Ko ha Tukupā Fakafāmili
Pea ʻi he efiafi fakafāmili ʻi ʻapí, naʻe fakatukupaaʻi ai kimautolu ʻe he Tangataʻeikí ke mau fakaafeʻi ha taha ki he lotú he māhina kotoa pē. Naʻá ku fie fai ia, ka naʻe faingataʻa! Naʻá ku kole tokoni ki he Tangataʻeikí. Naʻá ne pehē te u lava ʻo lotu. Naʻá ku fai leva ia.
Ko e Foʻi Fakakaukaú
Naʻe kole ʻe he puleakó ʻi he akó, he ʻaho hono hokó ha ngaahi fakakaukau ki ha ʻekitivitī Kilisimasi ʻa e akó. Naʻe ʻi ai ʻeku foʻi fakakaukau lelei! Naʻá ku talaange ki ai ʻe lava ʻa e fānau taʻu Palaimelí kotoa ʻo ō ange ki heʻemau lotú. Naʻá ne telefoni leva ki heʻeku ongomātuʻá, peá na talanoa mo e pīsopé ke palani ʻa e ʻekitivitií. Naʻe tokoni foki ʻemau kau taki ʻo e Palaimelí pea mo e kau faifekaú.
Ko ha ʻAho Fakafiefia
Fāifai pea aʻu ki he ʻahó. Naʻá ku tailiili mo toe fiefia he taimi tatau pē. Ko e taimi naʻe ʻave ai au ʻe he Tangataʻeikí ki ʻapiakó, naʻá ku fakatokangaʻi kuo ʻosi ʻi ai e taha kotoa ʻo teuteu ke ō. Naʻe ō mai ha fānau ako mo e kau faiako ʻe meimei toko 500!
Fakataha ʻi he Lotú
Naʻa mau mamata ʻi ha foʻi vitiō fekauʻaki mo e ʻaloʻi ʻo Sīsū Kalaisí ʻi he lotú. Naʻe hivaʻi ʻe he kakai lalahi kei talavoú mo e kau faifekaú ha ngaahi hiva Kilisimasi. Naʻe fai ʻe he pīsopé mo ʻeku Tangataʻeikí ha lea ki he ʻofa ʻa Sīsū he fānaú pea mo e feʻofaʻakí. Naʻá ku fai ʻe au ha lea fekauʻaki mo e Kilisimasí. Naʻe fiefia ʻa e taha kotoa! Naʻe aʻu ʻo fai heʻeku puleakó mo ʻeku faiakó ha ngaahi fehuʻi ki he kau faifekaú.