Leʻo ʻo e Kau Māʻoniʻoni ʻi he Ngaahi ʻAho Kimui Ní
Foʻi ʻUhila LANU PULŪ
Tā fakatātā ʻa Allen Garns
Naʻe ʻikai lototaha ʻeku faʻeé mo ʻeku tangataʻeikí ʻi he founga ke teuteuʻi ai hona ʻapí ki he taimi Kilisimasí. Naʻe ʻikai ʻilo heʻeku tangataʻeikí ʻa e kehekehe ʻo e lanú, ko ia naʻe lanu tatau pē kiate ia ʻa e lanu kulokulá, lanu matá, mo e lanu melomeló, pea mo palakū. Ka, ko e lanu puluú naʻe lanu maama mo fakaʻofoʻofa. Naʻe manako foki ʻi he timi ʻakapulu ʻa e ʻUnivēsiti Pilikihami ʻIongí, ʻa ia naʻe kau he ngaahi lanu ʻo e akó ʻa e lanu puluú.
Pea koeʻuhí ko hono lanu manakó ʻa e lanu puluú, naʻe loto ia ke fokotuʻu ha ngaahi foʻi ʻuhila lanu pulū. Ka naʻe pehē ʻe he fineʻeikí ia ʻoku ʻikai ko ha lanu ʻo e Kilisimasí ʻa e lanu puluú, pea naʻe tau leva ʻe he Tangataʻeikí ʻi he taʻu kotoa pē ha ngaahi maama Kilisimasi lanu kulokula, lanu mata, mo e hinehina ʻi he tafaʻaki hona ʻató. Naʻá ne fetongi ha taha ʻo e ngaahi foʻi ʻuhilá ʻaki ha ʻuhila lanu pulū ke fakamataliliʻi ʻa e fineʻeikí. Kapau te ke sio fakalelei, ne ke mei lava ʻo fakatokangaʻi ha foʻi ʻuhila lanu pulū ʻi he lotolotonga ʻo e ngaahi ʻuhila lanu kulokulá, lanu matá, mo e lanu hinehiná.
Ko e taʻu kotoa pē ʻoku ulo ai ʻa e foʻi ʻuhila lanu puluú ʻi ha feituʻu kehe. ʻOku pulia he taimi ʻe niʻihi ʻi he tulikí ʻo ʻikai lava ke fakatokangaʻi ʻe ha taha, ka ʻokú ne fokotuʻu ia he taimi ʻe niʻihi ʻi he funga tauʻanga meʻalelé pe fakafaletolo kimuʻá. Ko ha meʻa fakaoli ʻeni ki he Fineʻeikí mo e Tangataʻeikí.
Naʻe siʻi mālōlō fakafokifā ʻa e Tangataʻeikí ʻi ha taʻu ʻe taha, ʻoku toe ha ʻaho ʻe ua ki he Kilisimasí. Naʻe fai e talanoá ʻi hono meʻafakaʻeikí fekauʻaki mo e foʻi ʻuhila lanu pulū te ne tau he taʻu kotoa pē. ʻI he pō hono hokó, naʻe vakai atu ki tuʻa ʻa e fineʻeikí ʻi he matapā sioʻatá. ʻI he kauhala ʻe tahá, ʻoku ulo ai ʻi he lotolotonga ʻo e ngaahi ʻuhila lanu hinehiná ha foʻi ʻuhila lanu pulū he fakafaletolo ʻo e kaungāʻapí. ʻI ha ngaahi ʻaho siʻi pē mei ai, kuo tānaki atu ʻe he ngaahi kaungāʻapí mo e ngaahi kaungāmeʻá ha ngaahi foʻi ʻuhila lanu pulū ki heʻenau ngaahi maama Kilisimasí. Naʻe aʻu ʻo teuteuʻi ʻe ha niʻihi ʻenau ngaahi fuʻu ʻakau Kilisimasí ʻaki e lanu puluú.
ʻOku ou houngaʻia ʻi hono fakahaaʻi ʻe he ngaahi kaungāmeʻa mo e ngaahi kaungāʻapi ʻo e fineʻeikí ʻenau ʻofa kiate iá ʻaki ʻenau teuteu ʻaki e ʻuhila lanu puluú. Naʻa nau tokoni ke u ʻiloʻi e ʻuhinga ke “tangi fakataha mo kinautolu ʻoku tangí; … pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:9). ʻOku ou fakafetaʻi ʻi hono foaki mai ʻe he Tamai Hēvaní kiate kitautolu ʻa e meʻaʻofa ʻo Hono ʻAló. Te u toe mamata ki heʻeku tangataʻeikí koeʻuhí ko Sīsū Kalaisi.