Pagtudlo sumala sa Pamaagi sa Manluluwas
Pagpangandam sa Pagsugat sa Dios
Ni Devin G. Durrant
Unang Magtatambag, Kinatibuk-ang Kapangulohan sa Sunday School
Ang Sunday School dunay importante nga tahas sa pagtabang natong tanan nga makaandam nato sa pagsugat sa Dios. Gihimo ba nimo kini nga prayoridad?
Sa Basahon ni Mormon, misangyaw si Amulek og usa ka gamhanan nga sermon mahitungod sa Pag-ula ni Jesukristo (tan-awa sa Alma 34). Sa tanang maanindot nga mga bersikulo niini nga kapitulo, usa ka bersikulo ang milabaw alang nako sa dihang si Amulek mipahayag, “Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios” (Alma 34:32).
Ang pagtuo nga ang katuyoan niini nga kinabuhi mao ang “pagpangandam sa pagsugat sa Dios,” makapangutana kita sa atong mga kaugalingon niini nga pangutana: Unsay akong gibuhat kada adlaw, kada semana ug kada bulan sa pagpangandam alang nianang talagsaon nga panagkita uban sa atong Langitnong Amahan? Unsaon nako pagpili sa paggahin sa bililhong panahon nga gihatag kanako?
Unsaon Nato sa Pagpangandam?
Dunay daghang mga paagi nga kita makagahin sa atong panahon sa pagpangandam sa pagsugat sa Dios. Kon basihan ang kada semana, nagtuo ko nga kita mouyon nga ang labing importante nga oras sa semana mao ang panahon nga atong gigahin sa pag-ambit sa sakrament, pagbag-o sa atong mga pakigsaad uban sa Langitnong Amahan, mamalandong sa gugma nga atong gibati gikan Kaniya ug sa paglaum nga atong mabatunan tanan isip resulta sa Pag-ula sa Iyang Anak, nga si Jesukristo.
Nagtuo usab ako nga ang oras nga atong gigahin sa atong mga klase sa Sunday School adunay dakong epekto sa atong pagpangandam kay sa atong naamgohan. Apan ang pagpahimulos niana nga oportunidad, kinahanglan natong susihon unsaon sa pagtagad ang Sunday School.
Ang katuyoan sa Sunday School mao ang “paglig-on sa pagtuo sa mga indibidwal ug mga pamilya sa Langitnong Amahan ug ni Jesukristo pinaagi sa pagtudlo, pagkat-on, ug pagpakigdait.”1 Kining importante nga mga elemento sa pagkakabig mahinungdanon sa atong mga paningkamot sa pag-andam sa pagsugat sa Dios. Nadasig kita nga ang mga magtutudlo sa tibuok Simbahan naningkamot sa ilang abilidad sa pagtudlo ginamit ang Pagtudlo sumala sa Pamaagi sa Manluluwas ug sa mga miting sa teacher council.
Apan ang paglambo lamang sa pagtudlo dili igo. Kinahanglan gayud kini mohaum sa atong mga paningkamot sa pagkat-on pinaagi sa pamaagi sa Manluluwas. Miingon Siya kita kinahanglang makat-on “pinaagi sa pagtuon ug usab pinaagi sa hugot nga pagtuo” (D&P 109:7). Ang hugot nga pagtuo usa ka baruganan sa lihok. Kinahanglan kita nga mobuhat kon kita buot makahibalo (tan-awa sa Juan 7:17).
Ang atong mga klase sa Sunday School makaawhag niini nga matang sa pagtudlo ug pagkat-on kon kini luwas nga mga dapit sa pagpakigbahin sa mga kasinatian nga atong nasinati ug sa inspirasyon nga atong gibati niana nga semana samtang nagkat-on ug naggamit sa mga kasulatan sa pagpangandam sa klase. Samtang kita “motudlo sa usag usa sa doktrina sa gingharian … ang tanan unta mahatagan og kaayohan sa tanan” (D&P 88:77, 122).
Pagtawag sa Igpapahulay nga usa ka Kahimut-an
Bag-uhay pa lang nga ang Unang Kapangulohan midapit sa matag usa nato sa “pagtawag sa igpapahulay nga usa ka kahimut-an” (Isaias 58:13) sa atong mga kinabuhi. Ang tulo ka oras nga kasinatian sa Dominggo makatabang nato sa pagkab-ot niana nga tumong.
Niana nga diwa, tuguti ko nga mangutana og laing pangutana: Ngano nga kita usahay mopili nga dili hingpit modawat sa oportunidad nga gitanyag sa Sunday School?
Karong bag-o, nakasaksi ko og daghang lain-laing mga “alternatibo” sa Sunday School atol sa panahon sa Sunday School lakip sa pag-istoryahanay diha sa mga hall, mga lider sa ward nga nag-interview, mga lider sa stake nag-training sa ilang mga counterpart sa ward, ug mga lider sa kabatan-onan nga naghisgot sa kabalaka sa mga programa.
Tungod kay daghan kaayong nagkinahanglan sa ilang panahon, nakasabut ko ngano nga ang mga lider mogamit sa panahon sa Sunday School sa pagbuhat og laing mga butang. Apan usa ka panalangin alang sa tanan kon ang mga lider sa ward mogahin og usa ka oras sa pag-apil sa mga panaghisgutan sa ebanghelyo uban sa mga miyembro sa ilang kongregasyon!
Masaligon ko nga kamo nakasinati og ubang mga ehemplo sa “pagbaliwala sa Sunday School.” Kadaghanan nato adunay usa ka rason o lain, mibati nga usahay kita wala makakuha og daghan gikan sa mga klase sa Sunday School sumala sa atong gusto. Nakat-unan nako nga ang kaanindot sa akong kasinatian sa Sunday School matino kon unsa ka dako sa akong pagpangandam ug pag-apil sama sa akong magtutudlo. Si Brother Tad R. Callister, Kinatibuk-ang Presidente sa Sunday School misulat, “Sa matag higayon nga magtuon kita sa mga kasulatan, motunga sa klase nga mas andam, moapil sa mga diskusyon sa klase, mangutana, ug morekord sa sagrado nga mga impresyon, nag-anam kita sa pagkahimong sama sa Dios, sa ingon nagdugang sa atong kapasidad nga masinati ang kalipay nga Iyang gibati.”2
Pangandam ug Panalipdi ang Oras sa Sunday School
Modapit ko kaninyo nga mobuhat sa inyong labing maayo sa pagpangandam ug pagpanalipod sa oras sa Sunday School. Ang matag miyembro sa ward ug branch, lakip sa atong mga lider, kinahanglang dunay maanindot nga panalangin sa pagpangandam sa pagsugat sa Dios atol niining importante nga oras sa kada semana.