Dua na IVAKARAU ni Vuli

Mai vei Rosemary Thackeray

E vakaitikotiko mai Utah, Amerika, o koya e vola.

Tovolea na va na iwalewale oqo me kana vinaka kina ki yalomu na vosa ni Kalou.

iVakatakilakila

recipe for learning

Niu se gone, au dau saravi tinaqu toka me vica vata na auwa e valenikuro. E dau vakasaqara na kakana kana vinaka duadua, na madrai, kuki, kei na pai me baleta neitou matavuvale. Ni oti e dua na gauna, sa tekivu meu wilika na veiwaki ni kakana, muria na idusidusi, ka caka kakana. Au sa sega tale ni vakararavi vei nana—sa rawa niu cakava ga vakataki au.

Me vaka na vuli vakasaqa, eda vulica na kosipeli ka taracake noda ivakadinadina ena noda cakava. Ni tukuna oti o Liai na nona tadra na vunikau ni bula vei iratou nona matavuvale, a tukuna o Nifai ni vinakata me “raica, ka rogoca, ka kila na veika oqo” vakataki koya (1 Nifai 10:17). Dua tale na kena itukutukuni, vei Nifai e sega ni se rauta na nona rogoca walega na ivakadinadina nei tamana. E vinakata me kila na veika sa kila tu o tamana.

Na iwalewale ni vuli vakosipeli e vica na kena ikalawa rawarawa. E rawa ni o vakayagataka na va na vakasama oqo me vukea nomu vulica na kosipeli kei na nomu matavuvale, ena lotu, se ena nomu vuli vakataki iko.

1. Vakarau mo vuli.

Tekivuna nomu vuli taudua ena masu. Kerea na Tamada Vakalomalagi me vukei iko mo kila na cava o wilika tiko. Vola e dua se rua na taro ka vaqara na kena isau. Ena vakadinadinataka na kena dina na Yalo Tabu ni o wilika vakasamataka vakatitobu, ka masulaka (raica na Moronai 10:5).

Vakarau ki na vulici ni kosipeli ena lotu ena nomu wilika na lesoni ni bera ni o lako. Na lesoni ena Ia mo Lako Mai, ka Muri Au e rawa ni kunei ena LDS.org vakakina ena Gospel Library app.

2. Vakaitavi ena nomu vuli.

Wilika mo kila. Na levu ni draunipepa o wilika se na totolo ni nomu wiliwili e sega soti ni bibi sara me vaka na nomu kila na ka o wilika O na wilika beka vakavica eso na iyatuvosa. Vakayagataka na ivolanivosa mo raica na vosa o sega ni kila. Me vakaoqo, na cava beka na ibalebale ni itabagauna? E rawa ni o vakayagataka na iDusidusi ki na iVolanikalou mo raica kina.
Taroga eso na taro me baleta na ka o wilika tiko. O na vakataroga beka, “Na cava a yaco tiko mai Jerusalemi ena gauna eratou biubiu mai kina o Liai kei na nona matavuvale? Na cava era a sega ni vakarorogo kina vei Liai na tamata?”
Tovolea mo sauma na taro e tolu oqo me baleta e dua na ivakavuvuli vakosipeli: Na cava e bibi kina vei ira na tamata ena gauna oya na ka oqo? Ena yaga beka vakacava vei keda nikua? Ena yaga beka vakacava vei au?
Vakasaqara na ivakarau kei na kena veisemati. Me vakaoqo, na cava beka eso na ivakarau ni nona sotava o Nifai na veika dredre? E tautauvata beka vakacava kei na nodra ilakolako na Isireli mai Ijipita na ilakolako ni nodratou matavuvale ena lekutu?
Vola na nomu nanuma kei na ka o vakauqeti kina ena dua na ivolaniveisiga. “Ni o vola na veivakauqeti talei, e vakavuqa ni dau levu era na lako mai. Vakakina, ni kila-ka o na rawata ena tudei tu ena nomu bula taucoko” (Richard G. Scott, “To Acquire Knowledge and the Strength to Use It Wisely,” Liahona, Okosi. 2002, 12, 14). Vola na ibalebale ni veivakasama oqo ki na nomu bula.
Droinitaka e dua na iyaloyalo. E dua tale na sala me da vola kina na veika eda vulica tiko me da droinitaka. Ena dua na gauna niu sikova tiko e dua na itokani me baleta na lotu vakamatavuvale, a wasea na buna eso nona italanoa me baleta na vakabauta kei na masu. Ni se bera ni tekivu na lesoni, a solia noqu itokani vei iratou na luvena lalai eso na pepa kei na peniroka me ratou droinitaka na italanoa ni vosa tiko o budratou vakarua. Ni ratou droini e vukea nodratou vakarorogo, ka ratou taroga eso na taro me matata kina eso na iwase ni talanoa.

3. Vulica ka bulataka na kosipeli e veisiga.

Na vuli e taura na sasaga; e gadrevi me da cakacakataki keda ki na kila-ka (raica na Mosaia 12:27). E vakasalataki keda o Elder M. Russell Ballard ena Kuoramu ni iApositolo Le Tinikarua me da “virikotora e dua na gauna kei na vanua me da vulica kina na ivolanikalou e veisiga, kevaka mada ga me vica walega na miniti” (“When Shall These Things Be?” Ensign, Tise. 1996, 60. Ni da vuli e veigauna, sa na rawarawa na kila ka. Me vakaoqo, au raica ni gauna sa tekivu kina meu wilika na wase ni Aisea ena iVola i Momani (ka sega ni levea), sa tekivu me ra vakaibalebale mai vei au.

Ni da vulica na kosipeli, e sega ni rauta me da kila walega ena noda vakasama. Eda gadreva talega me da vakatovotovotaka na ka eda sa vulica. Ni da cakacakataka na dina e veigauna, ena vakadeitaka vei keda na Yalo Tabu, ka na tubu na noda ivakadinadina. Ni sa tiki tudei ni noda bula na dina oqori, sa tekivu me da veisau, ka yaco me da saumaki vei Jisu Karisito.

4. Wasea na ka o sa vulica.

Ni da tukuna vei ira tale eso me baleta e dua na ivakavuvuli ni kosipeli ena noda vosa ga ena vukea noda nanuma na ivakavuvuli oqori ka vakila na Yalotabu, ka na vaqaqacotaka noda ivakadinadina. E vakavuqa ni gauna vinaka me da wasea kina na lotu vakamatavuvale. E rawa talega ni o wasea ni o vosa vei ira nomu itokani e koronivuli se vei ira na lewe ni matavuvale ena gauna ni vakayakavi.

Ni da muria na va na ikalawa rawarawa oqo ka segata vagumatua mo kila na iVakabula, sa yalataki ni “na vakatakilai vei [keda] na veika vuni ni Kalou, ena kaukauwa ni Yalo Tabu” (1 Nifai 10:19).