Sa Bulia Mai na Kalou na Yavu ni Bula Vakamatavuvale

Vulica ena masumasu na itukutuku oqo ka vakasaqara na veivakauqeti mo kila na ka me wasei. Ena rawa ni vakalevutaka vakacava na nomu vakabauta na Kalou na kena kilai vakamatata “Na Matavuvale: Ai Vakaro ki Vuravura Raraba” ka vakalougatataki ira o dau qarava ena gauna ni veisiko? Me ikuri ni itukutuku, lako ki na reliefsociety.lds.org.

iVakatakilakila

family walking near the temple

iTaba ena mata ni Valetabu e Buenos Aires Argentina

“Ena qaqa ni [sere ni Lalai], ‘The Family Is of God,’ … eda sa vakananumi ena ivunau savasava,” a kaya o Carole M. Stephens, Matai ni Daunivakasala ena Mataveiliutaki ni iSoqosoqo ni Veivukei. “Eda sega ni vulica walega ni matavuvale sa mai vua na Kalou ia eda sa tiki yadua ni matavuvale ni Kalou. …

“… Na ituvatuva nei Tamada baleti ira na luvena sa ituvatuva ni loloma. Sa ituvatuva me vakaduavatataki ira na luvena—Nona matavuvale—ki Vua.”¹

A kaya o Elder L. Tom Perry (1922–2015) ena Kuoramu ni iApositolo Le Tinikarua: “Eda vakabauta talega ni matavuvale kaukauwa vaka-kawa era sega duadua ga ni yavu taumada ni dua na itikotiko raraba vinaka, e dua na bula vakailavo vinaka, kei na dua na itovo yavunibula vinaka—ia era sa yavu taumada talega ni veigauna tawamudu kei na vanua kei na matanitu ni Kalou.

“Eda vakabauta ni veimatayavu kei na matanitu ni lomalagi ena tarai wavoki ena matavuvale kei na isema ni matavuvale.”²

“O keda yadua, veitalia na ituvaki ni nomu bula vakawati se iwiliwili ni luvemu, e rawa ni da taqomaka na ituvatuva ni Turaga e vakamacalataki ena ivakaro ni matavuvale,” a kaya o Bonnie L. Oscarson, na Peresitedi Raraba ni Goneyalewa. “Kevaka e ituvatuva ni Turaga, sa dodonu vakakina me noda ituvatuva!”³

iKuri ni iVolanikalou

Vunau kei na Veiyalayalati 2:1–3; 132:19

iVunau ni Matavuvale

O Sisita Julie B. Beck, na Peresitedi Raraba e liu ni iSoqosoqo ni Veivukei, a vakatavulica ni cioloji ni matavuvale e sa yavutaki mai na Veibuli, na Lutu, kei na Veisorovaki i Jisu Karisito:

“Na Buli ni vuravura a vakarautaka e dua na vanua me ra bula kina na matavuvale. A bulia na Kalou e dua na tagane kei na yalewa ka rau sa rua na veimama veiganiti ni dua na matavuvale. E a sa tiki ni ituvatuva ni Tamada Vakalomalagi me rau vauci o Atama kei Ivi ka vakarautaka e dua na matavuvale tawamudu.

“… Na Lutu sa vakatara vei rau me rau vakaluveni tagane kei na yalewa.

“Na Veisorovaki i [Karisito] sa vakatara me ra vauci tawamudu vata kina na matavuvale. Sa vakatara ki na matavuvale me ra rawata vakaoti na tubu tawamudu. Na yavu ni bula marau, ka vakatokai talega na yavu ni veivakabulai, e sa yavu taumada me baleti ira na matavuvale. …

“… Oqo sa ivunau i Karisito. … Kevaka e sega na matavuvale, sa sega na yavu; sa na sega ni vakainaki na bula vakayago.”⁴