Lako ki Siwa
E vakaitikotiko mai Georgia, Amerika o koya e vola.
Sega ni rawa ni wawa o Hayden me laki siwa! Kevaka walega me a kua ni lako mai o Dan. …
“Vuvale au qarava tu. E uasivi vei au.” (Serenilotu, 184).
“Daru kauta yani na iyaya. Sa gauna ni laki siwa!” A kaya o Ta.
Matadredredre o Hayden ni veiraiyaki. Serau ka maqusa na veika kece. Nodratou tu vakadua na drano taucoko!
Ni muri Ta, a lako i muaimuri ni motoka o Hayden ka laveta mai na kato ni wanisiwa levu mai na motoka. Bibi toka, ia sega ni dua na ka vua. Ena laveta e dua na ka e vakaruataki na kena bibi kevaka me kena ibalebale na laki siwa vata kei Ta.
Era tataqiriqiri na kaunisiwa ni dreti ira tani mai o Ta. “Kena irairai ni sa lutu toka na moce nei Dan,” e kaya o koya. “O na vakayadrati koya?”
A vakasuka dredre vakalailai o Hayden. “Umm, Io.”
Sa voleka ni guilecava ni a lako voli mai o Dan, na tacina lailai. O Dan e dau veiciciyaki ka vosavosa i cake. Ena cemuri ira kecega na ika!
A rai yani ena katubaleka dola tu. “Dan, sa gauna ni yadra.”
Lutu koto ga na moce nei Dan.
Galu vakalailai o Hayden. E kalougata, kevaka ena moce tu ga o Dan ena gauna taucoko ni nodratou tiko eke.
A laveta lo yani o Hayden na kato ni siwa ki na vanua ni siwa nei Ta e baravi.
“Qo na baca, bacaniqele kei na ka kece!”
A taura mai vua o Ta na kato ni siwa. “Daumaka, vinaka.” Qai rai cake o Ta. “Evei o tacimu?”
A raikivita na motoka o Hayden. Vakasauri nona vakasamataka mai se na vakaivei na ivakarau ni nona vakasama ni yadra cake mai ena dua na vanua vou. Sega ni vinaka, e nanuma o Hayden. Na ka dina, ni rawa ni rere vakalevu. Se qai yabaki lima ga o Dan.
“Wawa vakalailai, Ta. Au na totolo tale mai.” Ia ni rai yani ki loma ni motoka, sa yali o Dan!
Sa sega tale ni qai rogoca o Hayden na tagi ni manumanu. Vaka me vakadigagalu vakasauri na ka kece.
“Sa sega eke o Dan!” Kaila o Hayden.
A kusa yani o Ta ka rai ki loma ni motoka.
“Rairai e vaqarai kedaru tiko beka,” e kaya o Ta. “Se qai oti ga e dua na miniti. Ena sega ni yawa o koya.”
A tovolea o Hayden me kakua ni taqaya, ia sa veimuloyaki na ketena. “E rawa beka niu masu?”
Au nanuma ni vakasama vinaka qori.”
A vakavinavinaka vei Tamada Vakalomalagi o Hayden ena vukuna na tacina lailai ka kerea me rau kunei Dan vakatotolo me kua kina ni rere.
Ni oti na masu nei Hayden, sa sega soti ni tatuki vakaukauwa na utona.
A biuta o Ta na ligana e tabai Hayden. “Vakacava kevaka o iko o Dan? O na lako i vei?”
A raica o Hayden ni tadola tu na katuba ena yasa ni motoka kadua. A sega beka ni raici rau o Dan e baravi. A dusia o Hayden e dua na sala voleka. “Rairai au na taubale beka yani i kea,” e kaya o koya.
Erau a vakusakusa yani ena sala oya.
Sa balavu ka bibi na veisekodi yadua. Ni taubale tiko, e sega ni cegu nona masu voli e yalona o Hayden. Ni rau kalawa yani vakavica, rau wavokita e dua na iwavoki ni sala ka raici Dan i liu.
“Dan!” E kaci yani o Hayden.
A vuki mai o Dan ka matadrede. “Ei, drau a lako i vei?”
Sa baci totolo tale na gauna. A cicivi Dan yani o Hayden ka mokoti koya vakaukauwa.
“Au sa marau vakalevu ni keirau sa raici iko,” e kaya o Hayden. E cavuta vakatotolo e yalona e dua na masu ni vakavinavinaka.
A matadredredre ga o Dan. “Sa evei na ika?”
“Lako mai, au na vakaraitaka vei iko,” e kaya o Hayden. Sa vinakata ga na yavana me cici yani ki na drano. “Daru raica o cei ena siwata na imatai ni ika. Au na vukei iko mo vakabacataka nomu siwa.”