Gonelalai kei na Sakaramede
E vakaitikotiko mai Utah, Amerika, o koya e vola.
Era a vakila na neirau lalai ni sa ka bibi vei keirau na sakaramede. Sa rawa ni keirau cakava e levu cake ena nodra vukei mera raica ni sa ka bibi talega kivei ira.
O sa bau vakananuma tu li na vuna eda vakatarai ira kina na gone tawapapitaiso mera vakayagataka na sakaramede? Sa ikoya li meda levea kina na vakaulubale kei na veidredre tawalevei rawa ni da vinakata e dua na tiki ni madrai? Sa ikoya li meda vakamamadataka kina na tutaki ni cakacaka vakalotu, ka mai tiko vakacegu voli?
Au sega ni nanuma ni vakakina. Au vakabauta ni ra sa tiko na vuna titobu sara. Au vakabauta oqo baleta niu vakadinata ni gauna e kaya kina o Jisu Karisito “taucoko,” sa vakaibalebaletaka taucoko o Koya. Na gauna e vosa kina o Koya vei ira na lewe vuqa, e sega ni vakatikitikitaka e dua.
Ena gauna a vakatakila kina na sakaramede na iVakabula tucake tale kivei ira na Nona tamata ena vanua vaka-Amerika, a vakadreta o Koya ni sa vakaibalebale vakalevu na cakacaka vakalotu kivei ira na sa papitaiso oti.1 Vakakina, a vakaroti ira na Nona tisaipeli mera “solia [na sakaramede] vei ira na lewe vuqa.”2 Na lewe vuqa oya era oka kina na “lalai.”3
Ni ra cavuta na masu ni sakaramede na tauri matabete nikua, era kerea na Tamada Vakalomalagi me vakalougatataka ka vakatabuya na madrai kei na wai “me yaga vei ira na” vakayagataka.4 Taucoko. Na tamata yadua e vakayagataka—oka kina na gonelalai yadua.
Kevaka ena vakayagataki na madrai kei na wai, era ciqoma kina na gone na ivakatakilakila oqo me dua na veivakalougatataki ki na nodra bula savasava, sa dodonu me tiko na sala me vukei ira me vakaibalebale kina na cakacaka vakalotu.
Ena kena kilai vakamatata oqo, au railesuva na veisiga e so era a lalai kina na luvequ. Keirau a cakavinaka vakaveiwatini ena nodra raici mera tiko vakanomodi ena gauna ni sakaramede. Au nanuma ni ra vakila ni sa ka bibi vei keirau na sakaramede. Ia sa rawa ni keirau cakava e levu cake ena nodra vukei mera raica ni sa ka bibi kivei ira.
Na cava beka a rawa ni da cakava? Sa rawa ni da a nanuma ni sa rawa vei ira na gonelalai mera maroroya na yalayala e so ena masu ni sakaramede. Sa rawa ni ra kila vakamatata, ena nodra dui iwalewale lalai ka qaqaco, na ibalebale ni nodra dau “nanumi Jisu tikoga”. Sa rawa ni ra yalataka mera “muria na nona ivunau.” Sa rawa talega mera vakaraitaka ni ra sa “yalataka mera taura na yaca” i Karisito, ena kena kilai ni na nodra na madigi oya ni ra sa papitaiso ka vakadeitaki.5
Ia ka vakacava na vakavoui ni veiyalayalati? Era sa vakatavulica na iliuliu ni lotu ni gauna eda vakayagataka kina na sakaramede, eda sa vakavouia kina na veiyalayalati kece eda cakava vua na Turaga.6 E sega ni tiko e dua na veiyalayalati vei ira na gonelalai mera vakavoui.
Au vakasamataka tale na gauna era a lalai kina na luvei keirau. Keirau a sega ni rawa ni vukei ira ni railesuva na veiyalayalati, ia sa rawa ni keirau vukei ira mera vakanamata ki liu. Au raici au voli vata kei na dua na gonetagane se goneyalewa lailai ena mataka ni Siga ni Vakacecegu.
“Ni ko sa yabaki walu,” au kaya, “ko na papitaisotaki ka ciqoma na isolisoli ni Yalo Tabu. Ko na cakava e dua na veiyalayalati. Na veiyalayalati o cakava ena gauna oya ena vakataka na yalayala e so o cakava ena gauna oqo ni o taura na sakaramede.
“Niu taura na sakaramede nikua, au na vakavouia na noqu veiyalayalati ni papitaiso, me vaka au sa caka yalayala tale tiko oya. O na tiko ekea vata kei au, ia ko na sega ni vakavouia e dua na veiyalayalati. O se bera ni cakava mada e dua. Ia, sa rawa ni o vakatovotovo ni cakava voli e dua na veiyalayalati. Ena veigauna kece o taura na sakaramede, sa rawa ni o vakarau tu mo papitaisotaki ka vakadeitaki. Ena iwalewale oya, o sa na vakarau tu ni ko sa yabaki walu.”
Kevaka e rairai sega ni matau na vakayagataki ni vosa vakatovotovo ena iwalewale oqo, navuca oqo: Ena dua na ituvaki dokai, ena rairai vukei ira na luvena e dua na tama ena vakavakarau ki na cakacaka vakalotu ni papitaiso ena kena vakaraitaki vei ira na iwalewale ni nodrau duri vata tu ena wai kei na wasei ni vosa e so ni masu ni veipapitaisotaki. E sega ni vakayacora o koya na cakacaka vakalotu ena ituvaki oya. Ena dua na vakasama, sa vukei ira na luvena o koya mera vakatovotovo. Ena sala oya, era na sega ni lomaleqataka na ka ena yaco ni ra curuma na wai ni veipapitaisotaki. Au vakabauta ni sa rawa talega vei ira na tina kei na tama mera vukei ira na gone ena vakatovotovotaki ni kena caka ka maroroi na veiyalayalati ni papitaiso. Na soqoni ni sakaramede yadua sa rawa ni gauna vakatabui ni vakatovotovo kivei ira na gonelalai ni ra vakayagataka na ivakatakilakila ni Veisorovaki ni iVakabula.
Kau sa lesu tale ki na noqu taro taumada. Cava na vuna eda vakatarai ira kina na gone tawapapitaiso mera vakayagataka na sakaramede? Sa ikoya li meda mai “tiko vakacegu voli”? E sega sara. Eda vukei ira na noda lalai ni vakayagataka na sakaramede me rawa ni ra nanuma na nodra iVakabula ka maroroya na Nona vakacegu—na vakacegu e sega ni rawa ni solia o vuravura.7 Eda veivuke ena nodra vakavakarau ni ciqoma na vakacegu oya ena isolisoli e levu ka uasivi sara ena veigauna sa tu ki liu, ni ra na cakava ka maroroya vata kei Koya na veiyalayalati.