Katakin ilo Wāween eo an Rilo̧mo̧o̧r eo
Lan̄lōn eo ej Kōn Ekkatak
Jān Tad R. Callister
Būreejtōn eo Eutiej an Jabōt Jikuuļ
Ilo ad kallim̧ur n̄an erom rikkatak ro, jenaaj en̄jake lan̄lōn̄ eo ekwojarjar ej itok jān ad ekkatak im mour kōn gospel eo an Jisōs Kraist.
Bwebwenato in ej kwaļo̧k kōn juon em̧m̧aan eo ebun̄bun̄ āinwōt juon eo ejowan ilo bukwōn eo. Ekar ejjeļo̧k an ikdeleel n̄an jerbal, ejjeļo̧k an ikdeleel n̄an kappok an jerbal. Ekar mour jān kijejeto im jipan̄ ko an ro jet. Āliktata armej in bukwōn eo rekar mōk kake. Rekar pepe im ba bwe ren bōke n̄an juon jikin ettoļo̧k jān bukwōn eo im joļo̧k e. Ke juon iaan armej ro ekar mijeļo̧k e ilo juon waikōn ļo̧k n̄an jem̧ļo̧kin bukwōn eo, armej eo ej kattōr ekar būrom̧ōj kōn e. Bōlen em̧m̧aan in ejowan kom̧wij aikuj bar leļo̧k n̄an e juon an iien. Ekar kajjitōk, āindein, “Kokōņaan ke juon iep in corn n̄an jino juon mour ekāāl?”
Em̧m̧aan in ejowan ekar uwaak, “Bwe emōj ke joļo̧k jān kilin corn kaņe?”1
Rūkaki ro im Rikkatak ro: Jon̄an wōt Juon Eddo eo n̄an Jipan̄ Doon
Jet iien armej rekōņaan bwe ren meļeļe eoon ko ilo aer jab kajjieon̄ in kōm̧m̧an jabdewōt—rekōņaan bwe rūkaki ro ren kōmeļeļeik eoon ko m̧okta jān aer riiti. Rekōņaan katak gospel eo jān aer ron̄jake jidik in, kout ko ak alooje tukadu in, segment ko an pija eo. Rekōņaan bwe rūkaki in Jabōt Jikuuļ eo en m̧aanjabpopo im jibuun im naajdik er katak eo ilo an kar jidik wōt aer kar m̧aanjabpopo ak bōk koņaer.
N̄an keidi menin, Rilo̧mo̧o̧r eo ekar kajjitōk ippān rikkatak ro bwe ren ro̧o̧l n̄an mōko m̧weer kōnke rekar jab meļeļe naan ko An. Ekar kakien er n̄an jar, kejōkļo̧kjeņ, im “kōpooj [būruōmi] n̄an ilju,” n̄e Enaaj “bar itok n̄an [ippemi]” (lale 3 Nipai 17:2–3).
Katak eo ekar en̄in: Ejjab an rūkaki eo wōt eddo n̄an m̧aanjabpopo im itok ak ej barāinwōt an rikkatak ro. Āinwōt an lōn̄ an rūkaki ro eddo n̄an katakin jān Jetōb eo, ej āindein barāinwōt n̄an rikkatak ro eddo n̄an katak jān Jetōb eo (lale K&B 50:13–21).
Bok in Mormon ej jeje: “Rikwaļo̧k eo eaar jab em̧m̧anļo̧k jān riron̄jake, a rikaki eo eaar jab em̧m̧anļo̧k jān rikatak eo; im āindein eaar jon̄aer wōt juon” (Alma 1:26; kar kobaik tok men eo eaorōk).
Laajrak in ej kwaļo̧k jet elmakot ko n̄an ta jemaron̄ kōm̧m̧ane n̄an en̄jake lan̄lōn̄ eo ej itok n̄e jej kōm̧m̧ane ijo koņaad ilo ekkatak im mour kōn gospel eo.
Katak ilo Kapijuknen
Ekkatak Jeje Ko Rekwojarjar
Aolep membōr rej bōk eddo in aer make n̄an ekkatak gospel eo; jejjab maron̄ kōjebare eddo in. Enan̄in aolep ekkatak ko rej itok jān ad katak jeje ko rekwojarjar aolep raan. Būreejtōn Harold B. Lee (1899–1973) ekar kōmlet: “Eļan̄n̄e jejjab riiti jeje ko rekwojarjar aolep iien, naan in kam̧ool ko ad rej mōjņo̧ ļo̧k.”2 Rijilōk Paul ekar etale im loe bwe Rijew ro ilo Berea “rem̧m̧an jān ro i Tessalonika, bwe e m̧ōkaj aer bōk naan im m̧ōņōņō,” bwe ren jeļā men kein re m̧ool ke jab ke: “[Rekar] pukot ilo Jeje ko raan otemjej” (Jerbal 17:11; kar kobaik tok men eo eaorōk).
Katak jeje ko rekwojarjar raan otemjej ej juon men eaorōk n̄an jetōb eo ad. Ejjeļo̧k bar juon men emaron̄ lukkuun ņa wōņāān menin ilo m̧akūtkūt ko ad raan otemjej. Kōn unin, juon iien ej aikuj in jenolo̧k n̄an ekkatak jeje ko rekwojarjar, ejjab n̄e ewōr ad iien.
Jet remaron̄ ba, “Ak ejjeļo̧k aō iien n̄an ekkatak jeje ko rekwojarjar n̄e iobrak kōn eddo ko jet ilo mour.” Naan in ej kakeememej eō kōn bwebwenato in ruo rijōkjōk wōjke ro rekar kōm̧m̧ane juon iien aerro jiāe jōkjōk wōjke ilowaan juon raan. Ke ej tak aļ jiāe jōkjōk wōjke eo ekar ijjino. Aolep awa em̧m̧aan eo eaidik ej jōbwābweļo̧k ibuļōn̄ bukwin wōjke ko ium̧win 10 minit. Kajjojo iien ekar kōm̧m̧ane menin, rijōkjōk wōjke eo juon ej ettōn̄ im kajjiboulul ibōran, kwaļo̧k ke enej wiin ilo iien jiāe eo. Em̧m̧aan eo ekilep ekar jab etal jān jekjek eo an, ekar jab bōjrak an jōkjōōk, ekar jab kakkije.
Ke ekar jem̧ļo̧k raan eo, em̧m̧aan eo ekilep ekar bwilōn̄ im ekkatak bwe eo m̧ōttan, eo ekar kakkure iien ko an reļļap, ekar jek elōn̄ ļo̧k wōjke jān e. “Ewi wāween am̧ kar kōm̧m̧ane menin ke ebool iien kwoj kakkije?” ekar kajjitōk.
Ļeo ewiin ekar uwaak, “O, ikar jem̧ ūlūl eo aō.”
Aolep iien jej ekkatak jeje ko rekwojarjar, jej jem̧ ūlūl eo ad ilo jetōb. Im men eo ekabwilōn̄lōn̄ in ej bwe n̄e jej kōm̧m̧ane menin, jemaron̄ in kōjerbal e bwen awa ko ad ilo māletlet.
Maanjabpopo Mokta
Ekkatak ko rej kwaļo̧k bwe jidik in wōt membōr an Kabun̄ in rej riiti jeje ko aer rekwojarjar m̧okta jān aer kōnono kaki ilo kūlaaj ko an Jabōt. Kōj kajjojo jemaron̄ jipan̄ ukōt jekjek in. Jemaron̄ in kōm̧m̧ane ijo koņaad ekkatak en̄jake ko ilo ad itok n̄an kūlaaj eo ilo ad pojak, emōj ad riiti eoon ko im pojak in kwaļo̧k ļōmņak ko. Maanjabpopo eo ad emaron̄ erom juon menin leļo̧k jemaron̄ leļo̧k n̄an aolep ro uwaan kūlaaj.
Ekkatak ilo Kūlaaj
Bōk Kuņaer ilo Kūlaaj ko
Kean̄ eo n̄an kōppeļļo̧k lo̧n̄iid (lale K&B 60:2–3) ejjab jerbal wōt ilo juon jerbal an mijenede ak barāinwōt jerbal ko an kūlaaj. N̄e jej bōk koņaad, jej karuwaineneik tok Jetōb, eo emaron̄ in kwaļo̧k kam̧ool kōn naan ko ad im kōmeramļo̧k ļōmņak ko ad im ļōmņak ko jet. Ilo kakkobaba, m̧aanjabpopo eo ad emaron̄ in im̧we ļōmņak ko an bar juon armej im rōjan̄ n̄an an kōm̧m̧an kakkobaba.
Ilo wāween in, jej ļoor juon pedped in katakin jān Irooj: “Juon en ekkōnono ilo juon iien im aolep ren ron̄jake ennaan ko an, bwe n̄e em̧ōj an aolep kar kōnono aolep ren maron̄ ketak jān aolep” (K&B 88:122; kar kakkobaiktok men eo eaorōk). Jet iien bōk koņaad ilo kūlaaj ejjab pidodo; jej aikuj diwōjļo̧k jān jikin ko jikid rem̧m̧an. Ak kōm̧m̧ane menin ej kōļapļo̧k eddōkļo̧k n̄an aolep ilo kūlaaj eo.
Je Men ko Reim̧we
Ium̧win jet iien ko ikar bōk ippa kaat in jeje ko n̄an mōnjar eo im kar ron̄jake im je ļōmņak ko rem̧m̧an kōn katak ko im im̧we ko an jetōb. Em̧ool imaron̄ ba bwe ikar lukkuun jeraam̧m̧an. Wāween in ekar ukōt jibadbad eo aō; pedped wōt ilo ekkatak im mōkaj aō jeļā; ekar kōļapļo̧k kōtmāne eo aō kōn kabun̄ in.
Etke elukkuun aorōk bwe jen je en̄jake ko ilo jetōb jej būki ilo imōnjar eo im jabdewōt jikin? Ļōmņak jidik n̄e juon m̧am̧a ej kōnono n̄an likao eo nejin im kōn juon un likao eo eba, “Mama, menin ej juon kapilōk em̧m̧an.” Innām ej bōk juon bok in jeje im jino je im̧we ko ekar būki jān aero kōnono. Ke ekar jako an jinen bwilōn̄, enej ke bar kōņaan leļo̧k eļapļo̧k kapilōk n̄an e?
Ejjeļo̧k kajjitōk bwe ejja pedped in katak in ej jerbal n̄an kapilōk jān Jemād Ilan̄. Ilo ad je im̧we ko Ej litok n̄an kōj, Ej m̧ōņōņō in letok n̄an kōj eļapļo̧k revelesōn. Ilo kakkobaba, elōn̄ iaan im̧we ko jej būki remaron̄ bōlen jabwe, ak eļan̄n̄e jej naajdik im kejōkļo̧kjeņ kōn er, remaron̄ eddōkļo̧k im erom wōjke oak ko ilo jetōb.
Rikanaan Josep Smith ekar kōnono kōn aorōk in je im̧we ko im en̄jake ko: “Eļan̄n̄e kwoj … wōnm̧aanļo̧k im kōnono kōn kajjitōk ko raorōk … im likjab in je, … bōlen, kōn jab tiljek n̄an jeje men kein Anij ekar kwaļo̧ki, jab kautieji aorōk ko aer, Jetōb eo emaron̄ em̧m̧akūt … im ewōr, ak ekar wōr, juon jeļāļo̧kjeņ eo eļap, kōn men eo eaorōk tata, eo kiiō emōj an jako.”3
Lan̄lōn̄ eo ej Waļo̧k jān Ekkatak
Ekkatak eļapļo̧k jān juon eddo ekwojarjar. Ej barāinwōt meļeļein en̄jake juon lan̄lōn̄ em̧wilaļ.
Ilo juon iien, juon ribōnbōn etto etan Archimedes, kiin̄ eo an ekar kajjitōk ippān bwen kwaļo̧k eļan̄n̄e kūrawūn kāāl eo an kiin̄ eo ekar kooļ ak eļan̄n̄e rikōm̧m̧an kooļ ro rekar jab m̧ool im ukōte jān jilba n̄an kooļ. Archimedes ekar kejōkļo̧kjeņ kōn juon uwaak; āliktata uwaak eo ekar itok. Ekar lukkuun lan̄lōn̄ bwe ekar jeļā bwe, ekkar n̄an bwebwenato in, ekar ettōr to ettōr tak lamōj im jan̄, “Eureka! Eureka!”—meļeļein, “Emōj aō loe! Emōj aō loe!”
Āinwōt an ļap barāinwōt an lan̄lōn̄ in loe juon ekkatak in jain, ewōr juon men eļapļo̧k an lan̄lōn̄ ke ej jelā m̧ool ko an gospel eo an Jisōs Kraist: m̧ool ko rej jab kōjjeļļāik wōt kōj ak rej barāinwōt lo̧mo̧o̧ren kōj. Bwe kōn unin Rilo̧mo̧o̧r eo ekar ba, “Men kein Ij kōnono n̄an kom̧, … bwe ami lan̄lōn̄ en obrak” (Jon 15:11). Im kōn unin “ro nejin Anij otemjej raar lam̧ōj kōn lan̄lōn̄” (Job 38:7) ke rekar katak karōk in lo̧mo̧o̧r eo. Āinwōt ine ko ewōr aer kajoor n̄an eddōkļo̧k, barāinwōt m̧ool ko an gospel eo ewōr aer kajoor n̄an bōktok lan̄lōn̄.
Ej jab wōt juon kean̄ ekwojarjar n̄an “kappukot jeļā” (K&B 88:118), ak ej barāinwōt juon jibadbad n̄an āinwōt Anij. Aolep iien jej katak jeje ko rekwojarjar, itok n̄an kūlaaj ilo ad lukkuun pojak, bōk koņaad ilo ekōnono ko ilo kūlaaj, kajjitōk kajjitōk ko, im je im̧we ko rekwojarjar, jej erom āinwōt Anij, kōļapļo̧k maron̄ eo ad n̄an en̄jake lan̄lōn̄ eo Ej en̄jake.
Jemaron̄ ke aolep kajjieon̄ n̄an erom rikkatak ro rewūjlepļo̧k, rekwojarjar ļo̧k—ilo m̧weo, ilowaan kūlaaj, im jabdewōt jikin jej pād ie. Ilo ad kōm̧m̧an āindein, jenaaj en̄jake lan̄lōn̄ eo ekwojarjar ej itok jān ad ekkatak im mour kōn gospel eo an Jisōs Kraist.