Kajoor n̄an KIJENMEJ
Rijeje eo ej jokwe ilo Utah, USA.
Kōn jorrāān in ne im rub bōro, iaar aikuj mour. Kōjatdikdik eaar kōm̧m̧an bwe in kijenmej.
Juon allōn̄ m̧okta jen 16th raan in keemem eo aō, baam̧le eo aō eaar etal ilo juon tūreep ilo aolepān Amedka en n̄an loļo̧k jet iaan jikin ko an Kabun̄ in. Ikar jab lukkuun inepata kōn to am pād ilowaan wa eo kōnke baam̧le eo aō ekkā aer em̧m̧an ippāer. Ij keememej ļo̧k aō deļo̧n̄e wa eo raan eo ālkin am̧ kar loļo̧k Winter Quarters, Nebraska. Eaar lukkuun wōt. Iaar pād lo jea eo ilik, jibwe tok juon buļankōj, im jerelan̄ im ron̄jake an wōt ko wōt im jino aō kiil meja im kiki.
Men eo de eo ij keememeje ļo̧k aō kar dabwilbwil ejjeļo̧k jem̧ļo̧kin. Tok ālik iaar ron̄ bwe wa eo waam̧ ekar dabwilbwil im kar jorrāān ilo juon jimāān ilo iaļ eo am̧. Iaar ron̄ an juon kar ba n̄an eō ke ejorrāān neeō im eaikuj in m̧wijm̧wij.
Tok ālik iaar maron̄ diwōj jen aujpitōļ, jema eaar itok n̄an ruum̧ eo aō. Eaar jijet iturin peet eo aō im jibwe peiū. Kōn menin iaar jeļā kadede ta eo ej tin ba.
“Nejū,” eaar ba, “kwojeļā ia in kwoj pād ie?”
Iaar ba “ilo aujpitōļ.”
“Kwojeļā ta eo eaar waļo̧k?”
“Jaar itaak im jorrāān.”
“Elōn̄ ke en eaar jiron̄ eok kōn aolepān baam̧le eo?”
Iaar bōjrak jidik im ba jaab.
Eaar ba aolep rem̧m̧an aer Pād—ijelo̧kin m̧am̧a. Ejjab mour.
Iaar ļōmņak in kar kajju būrom̧ōj, ak iaar jab. Kōn bwilōn̄ eo aō, ilo bar juon wāween, kōn jet un, iaar en̄jake aenōm̧m̧an, juon en̄jake eo em̧m̧an bwe in maron̄ leke Anij ilo aolep men bwe renaaj em̧m̧an.
Ke iaar pād ilo aujpitōļ, iaar keememej juon Church History site eo kōm̧ ar loļo̧k ruo raan m̧okta jen jorrāān eo: Martin’s Cove, Wyoming. Elōn̄ baineer ro raar mej ijo kōn kwole im metak kōn sno im an m̧ōļo̧. Iaar keememej aō lo jon̄an dōkā ko kar likūti ioon lōb ko im ļōmņak kōn jon̄an tōmak ko an baineer ro n̄an būlli wa ko waer im etal wōt. Bwebwenato in eaar im̧we eō. Ke iaar ļōmņak kōn en̄jake in, iaar jeļā bwe baineer ro raar dāpiji im bwe in maron̄ barāinwōt ineem̧m̧an, ekoba kajoor kōn ajri ro ruo jatū.
En̄jake eo aō eaar kajju kaenōm̧m̧an eō ilowaan bar juon wiik. Iaar jijet ioon juon wiiļjea im aluuje an kein kabbokļak ko rub jen wūntō eo jen aujpitōļ ilo iien Fourth of Juļae ke ej iiok tok eō—jinō ejako. Eban pād ilo iien kadiwōj ļo̧k eo aō jān high school. Eban pād ijeņ n̄e inaaj bōk menin letok eo aō ekwojarjar ilo tampeļ. Eban pād ilo iien m̧are eo aō. Ejako.
En̄in men eo eaar jino an lukkuun pen tok. Metak eo an neeō eaar lukkuun nana, innām ij aikuj in m̧wijiti. Iaar alooj TV ilo aō jab lukkuun eļļo̧k, im iaar baj wōt kiki. Baam̧le eo aō raar būrom̧ōj kake eō bwe ijjab lukkuun jan̄.
Dānin kemjaļļaļ eaar ļapļo̧k an wōtļo̧k ke kōm̧ij jepļaak ļo̧k n̄an juon em̧ ejjeļo̧k kobban ilo Oregon. Iaar maron̄ in bōk jet iaan eddo ko an jinō, im ro jatū ekkā aer eļtok bwe in kaenōm̧m̧an er. Iaar kajjieon̄ in kōkajoor er. Ak ekar jab pidodo.
Jepļaak ļo̧k n̄an jikuuļ eaar pen. Aolep raar ron̄ kōn jorrāān eo, im eļan̄n̄e reban kar, ren kar ron̄ n̄e rikaki eo aō enaaj kar kwaļo̧k kadkadū āinwōt leddik eo ekar jorrāān. Iaar en̄jake aō make ļo̧k iaaō.
Eaar lukkuun pen ke jema eaar bar m̧are ratimjuon allōn̄ ālkin an jinō mej. Ijeļā bwe kōrā eo nej jinō enaaj em̧m̧an n̄an baam̧le eo am̧ im bwe kōm̧ naaj aikuji, ak eaar lukkuun in pen.
Ejjab aolep men raar apan̄ ilo tōrein epen. Iaar en̄jake eļap iakwe jān Jema Ilan̄, baam̧le eo aō, im ritōl ro aō ilo Kabun̄. Ta eo eaar kōmour eō bwe in wōnm̧aanļo̧k ālkin jorrāān eo ekar kōm̧m̧ani men ko reļam waan me eaar kōkajoorļo̧k tōmak eo aō. Kajjojo raan ij joļo̧k jimettan awa ilo peet eo im riiti jeje ko rekwojarjar, jar, im je jōnōļ eo aō ej pād ilo jikin nuknuk eo aō. Ilo ruum̧ eo aō make, ikar jab aikuj kajoor n̄an ajri ro jatū. Imaron̄ in jan̄ jabdewōt iien n̄e ij kōņaan im kwaļo̧k būruwō n̄an Anij. Iaar jiron̄ļo̧k E lukkuun ta eo iaar en̄jake im ewi jon̄an aō on̄ kake jinō. Ijeļā Eaar ron̄jake eō kōn elōn̄ tiraim̧o ko iaar en̄jake. Jikin nuknuk ko aō eaar juon jikin eo ekwojarjar n̄an eō.
Kōm̧m̧ani men ko reļam waan raar jipan̄ eō pād wōt ippān Anij ijelo̧kin kattoļo̧k E kōn burom̧ōj. Ijjab tōmak Anij eaar kōmetak baam̧ļe eo aō ilo jorrāān in. Iaar en̄jake eļapļo̧k kajoor ilo kijenmej im leļo̧k aō n̄an Ankilaan im wōnm̧aanļo̧k wōt ilo mour. Im eaar wōr jet apan̄ ilo raan ko.
Ālkin an jema bar m̧are, iaar kōņaan kwaļo̧k waanjon̄ok ko rem̧m̧an n̄an ajri ro jatū, im iaar jab kōņaan bwe en wōr aō ellootaan e kōrā eo nej jinō, kōn menin iaar likūt aō leke ilo Anij. Ilo juon m̧akūtkūt ilo bok in Personal Progress eo aō iaar pedped wōt n̄an kōm̧m̧an aenōm̧m̧an ilo jukjukinpād n̄an kōkajoorļo̧k jem̧jerā eo aō ippān ro uwaan baam̧le eo ium̧win ruo wiik ko. Ilo m̧ool jibadbad eo ej n̄an kajjieon̄ āinwōt Kraist im kwaļo̧k iakwe ilo m̧akūtkūt ko ad. Iaar kālet bwe in kajjieon̄ im jipan̄ kōrā eo nej jinō.
Kōn jon̄an lōn̄in baam̧le eo am̧, eaar bwijin kōnno. Kōn menin en̄in ijo iaar jinoe. Iaar jipan̄ e ilowaan wiik ko ruo, iaar en̄jake iakwe n̄an kōrā eo nej jinō im kijenmej men̄e iaar jab lukkuun m̧ōņōņō kōn wāween eo. Pedped wōt n̄an jipan̄ e eaar jipan̄ eō anjo̧ ioon apan̄ ko kōnke iaar en̄jake Jetōb ilo n̄a.
Ijjab lukkuun meļeļe aolep men kōn ta eo eaar waļo̧k ilo jorrāān eo n̄an baam̧le eo aō, im ej wōr raan ko rapan̄. Ak āinwōt baineer ro, iaar likūt aō leke Anij im Ekar letok kajoor eo n̄an dāpiji.