Naan in Katak an Kōrā
Baam̧le Eo Ej Ekkapit Jān Anij
Kanooj jar ilo am̧ ekkatak kōn katak in im pukōt im̧we n̄an jeļā ta eo naaj tilmaake. Ewi wāween am naaj meļeļe kōn “Baam̧le eo: Juon Naan In Kean̄ n̄an Laļ In” kōļapļok tōmak eo am̧ ilo Anij im kōjeramman ro kwōj katakin er ilo am kōm̧m̧ani loļok ko am̧? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
Pija in tum̧aan in Buenos Aires Argentina Temple
“Ilo naan ko an [al in Būraimere eo], ‘Baam̧le eo Ej an Anij,’ … kar kakeememej kōj kōn katak ko rereeo,” Carole M. Stephens ekar ba, Rikakpilōklōk eo Kein Kajuon ilo Būreejtōnji eo Eutiej an Doulul eo an Kōrā. “Jejjab katak wōt kōn baam̧le eo ej an Anij ak bwe jej barāinwōt m̧ōttan baam̧le eo an Anij. …
“… Karōk eo an Jemād n̄an ajri ro Nejin ej juon karōk in iakwe. Ej juon karōk n̄an kakobaik ajri ro Nejin—baam̧le eo An—Ippān.”1
Elder L. Tom Perry (1922–2015) jān Doulul eo an Rijilōk ro Jon̄oulruo ekar ba: “Jej bar tōmak bwe baam̧le ko rekajoor rejjab m̧ōttan eo deo an juon jukjuk in pād eo em̧m̧an, menin jeram̧m̧an rejjab bōjrak, im juon m̧anit an jon̄ak ko repen—ak bwe rej bar m̧ōttan eo eaorōk an indeeo im an aelōn̄ in kiin̄ im kien eo an Anij.
“Jej Tōmak bwe doulul eo im kien eo Lan̄ enaaj ekkal ipeļaakin baam̧le ko im ro jet uwaan baam̧le ko nukieer.”2
“Kajjojo armej, jekdo̧o̧n ta jekjek ko aer ak jete ajri, remaron̄ in rijojomar ro n̄an karōk eo an Irooj me emōj kōmeļeļeiki ilo kean̄ eo an baam̧le,” Bonnie L. Oscarson ekar ba, Būreejtōn eo Eutiej an Doulul eo an Jiron̄ ro. “Eļan̄n̄e ej karōk eo an Irooj, ej aikuj barainwōt karōk eo ad!”3
Bar jet eoon ko
Katak ko an Baam̧le
Sister Julie B. Beck, kar Būreejtōn eo Eutiej an Doulul eo an Kōrā, ekar katakin bwe katak ko an kabun̄ kōn baam̧le rej pedped wōt ioon Kōm̧anm̧an eo, Wōtlo̧k eo, im Pinmuur eo an Jisōs Kraist:
“Kōm̧anm̧an eo an laļ in ekar letok juon jikin ijo baam̧le ko remaron̄ in mour ie. Anij ekar kōm̧anm̧an juon m̧aan im juon kōrā ruo m̧ōttan ko raorōk an juon baam̧le. Ekar m̧ōttan wōt karōk eo an Jemedwōj Ilan̄ bwe Adam im Iv ren maron̄ liāp im ejaake juon baam̧le n̄an indeeo.
“… Wōtlo̧k eo ekar kamaron̄ an wōr nejier ļaddik im leddik.
“Pinmuur eo an [Kraist] ej kōtļo̧k bwe baam̧le ko ren maron̄ liāp ippān doon n̄an indeeo. Ej kōtļo̧k an baam̧le ko eddōkļo̧k n̄an indeeo im wāppen. Karōk in m̧ōņōņō eo, barāinwōt ņaetan karōk in lo̧mo̧o̧r eo, ekar juon karōk kar kōm̧anm̧an n̄an baam̧le ko. …
“… En̄in ekar katak ko an Kraist. … Ilo an ejjeļo̧k baam̧le, ejjeļo̧k karōk; ejjeļo̧k juon un n̄an mour wabanban in.”4