Mwakuri n Ibuobuoki n te Ekaretia
Au Mwakuri n Ibuobuoki-ae Kakanoa ibukin te Taabati
E maeka te tia korokaraki i California, USA.
Au Taabati a kakanoa, ma I namakina te kakaitau bwa I kona ni beku n akea kaangaanga aika kaitara ma ngaa taan kairiiri n te Ekaretia ngkoa n aron Unimwaane Parley P. Pratt.
Kamataata n te korotamnei iroun Chidy Wayne
Bon ingabongin te Tabati. Iai 12 te aoa ae tataninga imwaaiu ibukin boowi, intawiu, kamatoaki, ao katabu. N na waaki n teuana te titeiki tienta ao ni bane n te autinibootaki teuana n iteran te taaun are te iterana—a bane ni karaoaki n te bong ae rang kabuebue.
I kakantaninga te boowi, intawiu, kamatoa, ao te katabu. Ma ngkoananoa, ngke I iangoa aron tatabetabeu, I kariaia ae I nanokawaki teutana ibukiu—ni karokoa I kauka te Autobiography of Parley P (ana Boki Parley P. Prat ibukin rongorongona) ao n reita au wareware n te tabo are I toki iai. E tauaki Unimwaane Pratt bwa te bure, n raonaki ma Iotebwa ao Hyrum Smith ao tabeman riki, inanon boong aika kaangaanga i Missouri. Imwiin kairakiia nako Independence, a kamatawarikaki Taari aikai n te outero ao a matu iaon te timanti ma uningaia ae te kai.
N te ingabong teuana ae kamwaitoro, n tain te tinoo e uti Unimwanne Pratt ao, akea ae e nooria, ao e kitana te outero. E mwananga nako mainuku rinanon te taaun (ae Independence) ao nakon tawaana aika uakan. Imwiin nakonakona inanon teuana te maaire, (1.6 kiromita), e a roko n te buakonikai Unimwaane Pratt, bwakabwakan te tinoo a rabuna mwanekana ao e raba n taian aroka.
E tabe n iangoa te kaangaanga ae e mena inanona. N reitan kawaina nako mainuku nanona e a rinnako n te titeiki teuana, ike e kona ni kanako rongorongo nakoia ana utu bwa a na kawaria. Ngkana e na okira te outero nanona te karabutinaki ao te bukinaki ni buure aika rawawata. E ngae ngke e kariiriaki bwa e na birinako, Unimwaane Pratt e iangoa te “kaangaanga ke te mate” e na riki naba nakoia buure ngkana e birinako.
E ngae ngke e aki koaua raoi bwa terana ae e na karaoia, e uringa te boki ae tabu: “Ba ane kani kawakina maiuna ao e boni kabua; ma ane nang kabua maiuna i bukiu ao i bukin naba te euangkerio, ao e na kawakinna. n te maiu ae akea tokina” (taraa Mareko 8:35; D&C 98:13).
E oki Unimwaane Pratt nakon te outero. Namwakaina n te karabuti ae kakorakai iai baika a na riki imwiina—n akean ana utu, ana iraorao ma Aomata aika Itiaki, ke ana konabwai ni beku n nakoana n abotoro.1
Imwiin kainan te boki, I iangoa raoi korakaia Aomata aika itiaki ake ngkoa—tabeman mai ibuakoia bon au bakatibu. Ibukin aia koaua n te euangkerio ao aia onimaki iroun Iesu Kristo, a teimatoa ni kaitara ma te buakaka ao te bwainikirinaki. Ibukin aia nanomatoa, n te bong aei I kona ni beku ao n inaomata n taromauri, ni kabaeaki ma ngaiia n te onimaki ao n te koaua.
Ngkai I katauraoi ibukin bongin te Tabati aei, a mano au utu, ni kakantaninga te bong n taromauri n te autinibootaki ae kamweengaraoi. Aia iraorao Aomata aika Itiaki a na kanakoraoa ara bong. Ti na kimwareirei ma ngaiia ni karaoan te kamatoaki ao te katabuaki, ni kakoroa bukin taian mwioko, ao kamatoatoan te onimaki. Ti na kana te toa, n ururinga ara Tia Kamaiu ao Ana karea ni kaboomwi. Ao n te tairiki aei ti na ikotaki ni mweengara ni wareka ana Boki Moomon ao ni kaai n tataro imwaain ae ti wene iaon ara kainiwene aika kamweengaraoi ao n uningana atuura n taian uninga.
Au Taabati a kakanoa. Ibukin anne I kakaitau ao ni kakabwaiaki.