Faamamaluina o le Atua e ala i le Faamamaluina o a Tatou Feagaiga
Saunia e Elder Joseph W. Sitati
O Le Fitugafulu
O faamanuiaga aupito maoae o lo tatou faatuatua i le Atua o loo maua i le faamamaluina o Ia ma le tausia o a tatou feagaiga.
I le 1985 na ma feiloai ai ma Sister Sitati i se alii e igoa ia Roger Howard i Nairobi, Kenya. Sa auauna atu o ia ma lona faletua, o Eileen, o se ulugalii matutua faamisiona. Sa la valaaulia i maua e auai i se aulotu laitiiti e feiloai i lo la fale. O le taimi muamua lea ua ma auai i se fonotaga a tagata o Le Ekalesia a Iesu Keriso o le Au Paia o Aso e Gata Ai. Sa matou lagonaina le Agaga i lena uluai fonotaga, ma talu mai lena taimi ma te auai lava i le lotu i aso Sa uma.
I ni nai masina mulimuli ane, na papatisoina matou e Roger, faatasi ma lo ma atalii e iva tausaga le matua. E lei umi mulimuli ane, ae toe foi Roger ma Eileen i lo latou aiga i le faaiuga o le la misiona. Sa matou faaauau pea ona maua mai tala ia i laua i ni nai tausaga.
I le amataga o le 2010, sa iu ina matou toe vaai ma Sister Sitati ia Roger. Sa latalata atu nei o ia i le 90 tausaga le matua. Ua le atoa le malosi ona o le tele o tausaga ma mai o le tino, sa ia faalagolago faamamafa atu i lana meafaigaluega e savali ai. A o matou tutu faafesagai le tasi i le isi mo le taimi muamua i le tele o tausaga, sa matou lagonaina se olioli e le mafaamatalaina. Sa tafe saoloto loimata a o matou feopoai ma le alofa. Sa matou lagonaina se agaga faafetai tele mo le tasi ma le isi ma mo le meaalofa ofoofogia o le talalelei. Sa matou aufaatasi i le faatuatua i le avea ai ma uso a tagatanuu i le malo o le Atua.
Ao ou faatauaina le taimi, na oo mai se mau i lou mafaufau: “Ia manatua ua tele lava le taua o agaga i le silafaga a le Atua; …
Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te au, e matua tele lava lo oulua olioli faatasi ma ia i le malo o lou Tamā! (MF&F 18:10, 15).
O nisi o faamanuiaga silisili a le Atua, ua folafola mai ia i latou e aumaia agaga i Lona malo. Na tautino mai le Faaola: “Ua le filifilia a’u e outou, a ua filifilia outou e a’u; ua ou tuuina atu foi outou, ia outou o, ma ia tou fua mai ni fua, ma ia tumau o outou fua: ina ia foaiina atu ia te outou e le Tama mea uma lava tou te ole atu ai ia te ia i lo’u igoa” (Ioane 15:16).
Na maliu Roger i se taimi mulimuli ane i lena tausaga. Sa ou maua le lagona tulaga ese o ia o se tagata ua filemu ma le Atua. Sa ia matuai faagaeetia lava o ma olaga e ala i le faasoaina atu o le talalelei. O lana faataitaiga o le faapaiaina o le auauna atu i lona uso a tagata, faatasi ai ma lena autau tele o faifeautalai talavou ma matutua o loo auauna atu i le Ekalesia, e faaalia ai se tasi o auala tatou te faamamaluina le Atua.
O la Tatou Sootaga i le Feagaiga ma le Atua
Faafetai i lo tatou auai i le Ekalesia toefuataiina a Iesu Keriso, ua tofu i tatou ma se sootaga mausali faaletagata lava ia ma le Tama Faalelagi e ala i feagaiga. O feagaiga taitasi e faamaonia e se sauniga, lea tatou te taliaina ma le naunautai ma tautino atu e tausia le feagaiga. O Iesu Keriso, e ala i Lana Togiola, ua mafai ai e i tatou ona faataunuu o tatou tiute i feagaiga taitasi, a o tatou faatinoina le faatuatua ia te Ia.
Tatou te faamamaluina le Tama Faalelagi a o tatou faalolotoina ai lo tatou sootaga ma Ia e ala i le osia ma tausia feagaiga ma sauniga faaola uma. Ua Ia faamanuiaina i latou o e tausia a latou feagaiga i Lona Agaga e taialaina ma faamalosia i latou. O sootaga o feagaiga e sili ona taua nei e mafai ona tatou faatuina ma le Tama Faalelagi.
O Le Feagaiga o le Papatisoga
O le papatisoga e aumaia i tatou i le sootaga o le feagaiga muamua a le Atua. Tatou te agavaa mo le sauniga pe a tatou “faalotomaualaloina i [tatou lava] i luma o le Atua, … ma o mai i luma ma loto momomo ma agaga salamo, ma molimau atu i luma o le ekalesia ua [tatou] salamo moni ia [tatou] agasala uma, … ma faaali moni mai ia [tatou] galuega ua [tatou] maua le Agaga o Keriso mo le faamagaloina o a [tatou] agasala” (MF&F 20:37).
Ao tatou faaalia i a tatou amioga ua tatou “ave i o [tatou] luga le suafa o Iesu Keriso, ua i ai se naunautai e auauna atu ia te ia e oo i le iuga” (MF&F 20:37), “tauave avega a le tasi, ina ia mama; … e faanoanoa faatasi ma e e faanoanoa; … ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti” (Mosaea 18:8–9), tatou te tausia le feagaiga.
O le taui, e faamamaluina i tatou e le Atua i le meaalofa o le Agaga Paia, lea tatou te maua ai le mafutaga faifai pea a le Agaga Paia, o lē e tuuina mai taiala ma taitaiga i a tatou galuega uma, ma taitai atu i tatou i le ola e faavavau (tagai i le Mosaea 18:9–10).
Sa ou lagonaina se lagona o le olioli tele ma le faatumulia i le Agaga ina ua mavae lo’u papatisoga, lea sa faaauau ona ou lagonaina pe a ou matua latalata atu i le Atua.
O Le Tautoga ma le Feagaiga o le Perisitua
O tagata o e tausia le feagaiga o le papatisoga e agavaa e ulu atu i le tautoga ma le feagaiga o le perisitua. Tatou te mauaina e ala i le sauniga o le faaeega o lima. O le feagaiga o le perisitua o se feagaiga o le auauna atu mo le faaolataga o fanau a le Atua. Tatou te faamamaluina le Atua pe a tatou faalauteleina o tatou valaauga (tagai i le MF&F 84:33) ma “auauna atu ia te ia i [o tatou] loto atoa, mafaufau atoa, manatu atoa, ma le malosi” (MF&F 4:2) faatasi ai ma le “faatuatua, faamoemoe, alofa mama ma le alofa, ma le manatu tasi i le mamalu o le Atua” (MF&F 4:5).
O faamanuiaga a le Alii e oo mai i e umia le perisitua o le faamaoni e aofia ai le faapaiaina “e le Agaga i le faafouina o o latou tino” (MF&F 84:33). E avea i latou ma suli o faamanuiaga a Mose ma Aperaamo (tagai i le MF&F 84:34). O perofeta ma aposetolo o Aso e Gata Ai o ni faataitaiga lelei o i latou o e faalautele lo latou perisitua. O o latou olaga o se molimau o loo faamamaluina e le Alii i latou.
Sauniga ma Feagaiga o le Malumalu
O tagata o loo umia ma le agavaa le perisitua maualuga atu ma tamaitai o e agavaa e mafai ona maua sauniga paia ma osia feagaiga paia i le malumalu. E ala i sauniga ma feagaiga o le malumalu, tatou te aoao ai e malamalama i le faamoemoega o lenei olaga ma saunia mo le ola e faavavau. Tatou te maua le sauniga ma ulu atu i le feagaiga o le faaipoipoga e faavavau ma le faamauina i o tatou aiga. Tatou te tautino atu ina ia faapaiaina o tatou olaga i le Atua ma i le galuega o le faaolataga mo Ana fanau uma. O le tausia ma le faamaoni o nei feagaiga e faatagaina i tatou e maua le taitaiga faaleagaga ma le mana e faatoilalo ai tofotofoga o le olaga faaletino, ma maua le faaeaga, o le faamanuiaga silisili e mafai ona tuuina atu e le Atua i Ana fanau (tagai i le MF&F 14:7). O le faaeaga, po o le ola e faavavau, e tatau ona olioli ai o ni aiga le tulaga lelei o le olaga o loo soifua ai lo tatou Tama Faalelagi.
O Le Faamanatuga
O Le Ua Sili i Tagata Uma, saunia e Del Parson
Mo tagata o le Ekalesia, o le taumamafa i le faamanatuga ma le agavaa i aso Sapati uma e taua. E ala i lenei sauniga, tatou te faamaonia ai lo tatou naunautaiga faifai pea e ave i o tatou luga le suafa o Iesu Keriso ma toe faafou la tatou tautinoga e tausia ai feagaiga uma na tatou osia. Tatou te talosagaina le mana o le Togiola a Iesu Keriso e fesoasoani ia i tatou e tumau e oo i le iuga i le amiotonu. A o tatou faia faapea, tatou te agavaa ai mo faamanuiaga uma o feagaiga uma na tatou osia.
Manaoga Amiotonu
O le solia o se feagaiga e inosia i le Atua ma e tuua ai faamanuiaga ua folafola mai o le a leai se taunuuga (tagai i le MF&F 82:10).
I le 1 Samuelu 2:12–17, 22–34, tatou te aoao ai i le amioleaga na faia e atalii o Eli le faitaulaga. Sa la faaaogaina sese le tulaga o lo la tama e soli ai le feagaiga o le perisitua. Sa la saili e faataunuu o la manao faatuinanau, a o la auai i amioga le mama faatasi ma tamaitai tapuai ma a o la aveina ma le faaletatau mo i laua lava aano o manu o taulaga a le nuu o Isaraelu. Na tuuina atu e le Alii ni faamasinoga matuia e faasaga i atalii o Eli ma agai ia Eli lava ia mo le le taofia o i laua.
O na ituaiga o manaoga faaletino e mafai ona faatoilaloina e ala i se naunautaiga e tausia a tatou feagaiga ma le Atua, e pei ona faaalia e Iosefa i Aikupito ina ua faafetaiaia e se tagata amioleaga e le talitonu (tagai i le Kenese 39:9, 12). Sa faamamaluina Iosefa e le Atua ma fesoasoani ia te ia e manumalo i fuafuaga uma a le tiapolo agai ia te ia. Na ia tulai mai e avea ma tagata e lona lua i le e aupito sili i Aikupito ma se meafaigaluega i aao o le Atua mo le faasaoina o le aiga o Isaraelu (tagai i le Kenese 45:7–8).
Afai ua faatoilaloina i tatou e faaosoosoga, o le a taitaia i tatou e le manao e toefuatai mai lo tatou sootaga ma le Tama Faalelagi i le salamo moni. Ona fesoasoani lea ia i tatou o le Togiola a le Faaola o Iesu Keriso e toe agavaa ai.
Mulimuli i Perofeta
Ina ua faatuina e Keriso Lana Ekalesia, sa Ia filifilia le au aposetolo, perofeta, o e folafola le talalelei, leoleo, ma aoao “ia atiina ae ai le tino o Keriso:
“Seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso” (Efeso 4:12–13).
Ua aoao mai a tatou perofeta ma aposetolo soifua faapea “E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi” (“O Le Aiga: O Se Folafolaga i le Lalolagi,” Liahona, Nov. 2010, 129).
O o tatou aiga ma o tatou auaiga e saunia le faavae mo le fausiaina o sootaga malolosi ma le Atua e faavae i feagaiga. O le mulimuli i aoaoga musuia a o tatou perofeta soifua o le a fesoasoani ia i tatou e maua ni aiga malolosi, tuuina mai ia i tatou le mana e tausia ai a tatou feagaiga, ma faamautu ai faamanuiaga silisili o lo tatou faatuatua.