AOAO ATU I LE ALA A LE FAAOLA
“Faauta I o Outou Tamaiti”: Aoao e Aoao Atu Fanau
“Sa ave e [Iesu] a latou fanau laiti, taitoatasi, ma faamanuia i latou, ma tatalo atu i le Tamā mo i latou. … Ma sa ia fetalai mai i le motu o tagata, ma fofoga mai ia te i latou: Faauta i o outou tamaiti” (3 Nifae 17:21, 23).
Afai o oe o se matua pe ua valaauina e aoaoina fanau, ua tuuina atu ia te oe se meaalofa maoae. Na aoao mai Elder M. Russell Ballard o le Korama a Aposetolo e Toasefululua, “O [outou] o e ua tofia e le Atua e siosioina fanau o aso nei i le alofa ma le afi o le faatuatua ma se malamalama po o ai i latou.”1
O fanau o le a aumaia ia te oe le olioli ma uunaia oe e avea ma se faataitaiga lelei. A o e oo ina iloa le faatuatua, alofa, faatuatuaina, ma le faamoemoe o le fanau, o le a e faalatalata atili atu i le Alii ma malamalama atili ai i Lana poloaiga ina ia “avea ia pei o tama iti” (Mataio 18:3).
O mea nei e valu ia manatua e uiga i fanau a o e taumafai e alofa ma aoaoina i latou i le ala na faia e le faaola.
1. E talitonu le fanau. Latou te gauai atu i le upu moni. Aoao i latou i mataupu faavae sa’o faafaigofie ma manino, i le gagana e fai ma faataitaiga e mafai ai ona latou malamalama.
2. E mafai ona iloa e tamaiti le uunaiga a le Agaga. Aoao atu ia te i latou o le lagona o le filemu, alofa, ma le olioli na latou mauaina, pe a latou talanoa po o le usu le pese e uiga ia Iesu Keriso ma Lana talalelei mai le Agaga Paia. Fesoasoani ia i latou e malamalama o nei lagona o ni vaega o se molimau.
3. O tamaiti e malamalama moni lava i manatu. O upu faafaataoto faigata e mafai ona faaluafesasi ai i latou. Pe a e aoao atu, ia faatatau i gaoioiga ma mea masani e tutupu: fale, aiga, ma le lalolagi o siomia ai i latou.
4. E naunau lava fanau e aoao. E fiafia i le aoaoina e ala i aafiaga eseese ma ni lagona se tele. E faapitoa lava lo latou tali lelei i fesoasoani vaaia ma le faaaofia ai i lesona. Faataga i latou e feoai solo, suesue, ma faataitai ni mea fou.
5. E naunau fanau e faasoa atu ma fesoasoani. E i ai mea ia i latou e mafai ona latou aoao ai le tasi i le isi ma oe. Valaaulia i latou e faasoa mai mea ua latou aoaoina. Tuu atu ia te i latou ni avanoa e faitau ai tusitusiga paia, uu i luga ni ata, tali fesili, pe tusitusi i le laupapa.
6. O fanau e agaalofa ma e mananao ina ia alofaina. Vaavaai mo ni avanoa e faamalosia ai le agalelei ma le agaalofa o amioga na e masani ona oo mai lava ia i latou. Fausia lo latou talitonuga i le faaalia o lou alofa ma le talisapaia ma le faalogo atu ma le totoa i mea latou te fai atu.
7. O fanau e mulimuli i lau faataitaiga. E te aoaoina i taimi uma, e tusa lava pe e te le iloaina. O le a matauina e tamaiti le ala e te ola ai i mataupu faavae o loo e aoaoina atu. O lau faataitaiga amiotonu e mafai ona i ai se uunaiga malosi i le atiina ae o a latou molimau.
8. O fanau laiti e matele lava ina puupuu le taimi e faalogo ai. O amio o le le faalogo atonu o le uiga ua latou vaivai pe ua fiaaai, latou te le malamalama i se mea e tau atu, latou te manaomia e gaoioi, pe ua latou ivava. E fiafia e aoaoina e ala i le faisoo, faaeseese, ni tala faigofie, pese, ma gaoioiga. Uunaia i latou e auai i lesona.