Usa ka Gasa nga Nakapausab sa Kinabuhi didto sa Thrift Store
Ang tagsulat nagpuyo sa Arizona, USA.
Wala koy daghang kwarta aron ikapalit og gasa alang sa akong ama-ama, mao nga sa wala pa kami nanglakaw aron mamalit, militok ko og usa ka pag-ampo.
Paghulagway pinaagi ni J. Beth Jepson
Usa ka tuig wala kami daghang kwarta alang sa Pasko, busa nag-ampo ko alang sa panabang aron makapalit og ikagasa alang sa akong ama-ama, si Adrian (nga ako ug ang akong igsoong babaye motawag niya og Weegee). Ang akong igsoong babaye ug ako aduna lang mi duha ka dolyares aron ikapalit og mga gasa.
Sa dihang ang akong mama miingon nga moadto kami sa usa ka duol nga thrift store aron mamalit og mga regalo sa Pasko, midagan ko ngadto sa akong kwarto ug nag-ampo alang sa panabang: “Palihug tabangi kami nga makakita og gasa nga mapalit sa duha ka dolyares.”
Didto sa tindahan si Elaina ug ako nanan-aw sa mga libro ug nakakita sa triple combination nga bag-o pang tan-awon. Nalipay mi kaayo sa dihang amo kining nakit-an. Gigunitan nako kini og maayo samtang midagan paingon sa akong mama. Naglukso-lukso, miingon mi, “Among nakita ang usa ka gasa alang kang Weegee!” Diha sa kahera si mama nangutana, “Tagpila man ni?” Ang babaye mitubag, “Duha ka dolyares.” Ang akong pag-ampo natubag.
Nianang panahona ang among ama-ama dili pa miyembro. Wala siya ganahi sa mga Mormon, siya wala motuo “sa Mormon nga basahon,” ug siya dili ganahan sa mga miyembro nga mohapit namo alang sa mga kalihokan sa Young Men ug Young Women. Iyaha pa ganing gukoron palayo ang mga elder. Apan ang mga miyembro sa ward ug mga misyonaryo wala moundang kaniya.
Sa adlaw sa Pasko among gipaulahi ang iyang gasa. Ako ug si Eliana miingon, “Mao kini ang labing mahinungdanon nga gasa nga mahatag ni bisan kinsa diha kanimo! Kini makahimo kanimong malipayon.” Mitag-an si Weegee og pipila ka higayon, ug nangatawa kami sa iyang mga tubag. Gisultihan namo siya, “Kini usa ka nindot nga gasa! Mao kini ang makapausab sa imong kinabuhi. Miusab kini kanamo.”
Ang among mama nabalaka nga siya masuko bahin sa among gasa ngadto kaniya, apan si Elaina ug ako nasayud nga kini mao ang angay nga buhaton.
Sa dihang iyang giablihan kini, siya mipasalamat kanamo alang sa gasa ug miingon nga siya mobasa niini.
Tungod kay gimahal namo si Weegee, gusto mi nga iyang makat-unan ang mahitungod ni Jesukristo ug ang gasa sa Iyang Pag-ula. Gusto namo nga siya motuo sama sa among pagtuo, mag-ampo ug maghinulsol, ug aron makabaton sa ebanghelyo sa iyang kinabuhi.
Siya mibasa ug nag-ampo kabahin sa Basahon ni Mormon, ug uban sa tabang sa mga elder ug mga miyembro sa ward, siya nabunyagan ug karon usa na ka miyembro sa Simbahan. Kami malipayon kaayo nga ma-sealed sa templo, ug kami nasayud nga kanunay kaming magkauban hangtud sa kahangturan isip pamilya.