Mga Tingog sa mga Santos sa Ulahing mga Adlaw
Ang Diyot sa Biyuda sa Modernong Panahon
Stephanie H. Olsen, Utah, USA
Paghulagway pinaagi ni Allen Garns
Ang hinulaman nga puti nga mga mantel ug snowmen nga mga dekorasyon nakapasadya tan-awon sa cultural hall samtang ang katapusang mga pagpangandam gihimo alang sa Christmas party sa among pamilya.
Samtang nagpaabut kami sa among mga bisita, nabaling ang akong panan-aw ngadto sa lamesa diin ang usa ka basiyo nga garapon—nga gisulatan og “Puli ni Santa”—nahimutang. Nag-ampo ko nga sa pagtapos sa gabii, ang garapon mapuno sa mga donasyon.
Atol sa among mga pagpangandam sa party among nadiskobrehan nga ang bana sa akong ig-agaw walay trabaho sobra na sa usa ka tuig ug tunga. Ang gisaligan nga tinubdan sa kinitaan sa iyang pamilya mao ang paghatud og mga newspaper sa lima ka mga rota, diin magsugod sila sa alas 3:30 sa buntag matag adlaw. Ang dakong bahin sa ilang kinitaan ibayad sa bayranan sa balay ug uban pang mga kinahanglanon, gamay na lang ang mabilin alang sa mga butang nga ilang gusto, sama sa mga regalo sa Pasko.
Ang pamilya sa akong ig-agaw maoy usa sa mga una nga miabut. Mitan-aw ko samtang mipadulong sila sa kan-anan, lapas sa among garapon sa Pasko. Samtang nagkaduol sila, ang bana sa akong ig-agaw mihunong aron sa pagbasa sa nakasulat sa garapon. Sa walay pagduha-duha, iyang gikuha ang iyang gubaong pitaka, mikuha og duha ka dolyares, ug gibutang diha sa sudlanan, wala masayud kon si kinsa ang pamilya nga “nanginahanglan”.
Napuno ko sa emosyon, ug diha-diha dayon akong nahinumduman ang istorya sa Bag-ong Tugon kabahin sa biyuda [balo] ug sa iyang duha ka diyot. Ang adunahan nga mga tawo nagpakita sa ilang dagko nga mga donasyon ngadto sa tipiganan sa dihang “dihay usa ka kabus nga babayeng balo nga miabut ug mihulog og duha ka diyot” (tan-awa sa Marcos 12:41–42).
Ang Manluluwas dayon miingon sa Iyang mga disipulo:
“Kining kabus nga babayeng balo nakahulog og labaw pa kay sa tanan kanila nga nanagpanghulog ngadto sa panudlanan:
“Kay silang tanan miamot gikan sa ilang naghingapin nga kahamugaway; apan kini siya, gikan sa iyang kapit-os mihatag sa tanan nga diha kaniya, sa tanan nga iyang kabuhian” (Marcos 12:43−44).
Si Jesukristo miingon nga ang babaye mihatag diha sa “iyang kapit-os” ug mihatag “sa tanan nga iyang kabuhian.” Makahatag ra unta siya og usa ka diyot. Kana tingali igo na sa unsay gikinahanglan, apan ang iyang matinud-anon nga kasingkasing ug kaandam sa pagsakripisyo nakakuha sa atensyon sa Anak sa Dios.
Tingali walay usa nga mobasol sa bana sa akong ig-agaw kon labyan lang ang garapon nga maghunahuna, “Kon ako aduna ako mohatag” (Mosiah 4:24). Ang iyang talagsaong ehemplo sa gugmang putli ug paghigugma alang sa iyang isigkatawo nakatandog dili lang kanako apan sa ubang mga miyembro usab sa akong pamilya kinsa nagtan-aw kaniya. Nasayud ako nga mamaayo ra ang iyang pamilya tungod kay “ang gugma nga putli mao ang tiunay nga gugma ni Kristo, … ug bisan kinsa nga makaplagan nga aduna niini sa katapusan nga adlaw, kini makaayo uban kaniya” (Moroni 7:47).
Kami naglaum nga adunay ikahatag sa iyang pamilya nianang gabhiona, nga among gihimo sa wala madugay, apan pinaagi sa paghatag taliwala sa iyang kaugalingong panahon sa panginahanglan, gipakita niya kanamo nga kon kabahin na sa unsay labing importante, siya usa na ka adunahan nga tawo.