Ngaahi Fakakaukau ki he Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Kau Ākongá mo hono Taukapoʻi ʻo e Nofomalí,” peesi 18: Fakakaukauʻi ʻa e founga ʻe lava ai ke ke hoko ko ha “tokotaha taukapo ʻo e nofomalí” ʻi ho ʻapí tonu. Kuó ke ʻosi fakahoko nai ha fetalanoaʻaki mo hoʻo fānaú fekauʻaki mo ʻenau nofomali ʻi he kahaʻú pe fekauʻaki mo e founga ʻoku kehe ai e vakai ʻa e Siasí ki he nofomalí mei he māmaní? Kuó ke ʻosi vahevahe nai hoʻo ngaahi ongo ki hoʻo fānaú e ongo ʻokú ke maʻu ki he nofomalí? Kuó ke akoʻi nai kiate kinautolu e ngaahi akonaki ʻa e kau palōfitá mo e kau ʻaposetoló ʻo kau ki he nofomalí? Lolotonga ha efiafi fakafāmili ʻi ʻapi, fakakaukau ke aleaʻi ʻa e ngaahi tefito ko ʻení, ʻo fakaʻaongaʻi ʻa e “Ko e Fāmilí: Ko Ha Fanongonongo ki Māmaní” (Liahona, Nōvema 2010, 129).
“Lōmakiʻi ʻa Māmani ʻo fakafou ʻi he Mītia Fakasōsialé,” peesi 48: Hili hono lau e fakamatala ko ʻení, aleaʻi ʻi ho fāmilí ʻa e founga te ke lava ai, ʻo hangē ko e lea ʻa ʻEletā Petinaá ʻo, “fakaʻaongaʻi ʻa e mītia fakasōsialé ke ʻoatu ʻa e ngaahi pōpoaki ʻo e ongoongoleleí,” pea muimui ki he ngaahi fakahinohino ko ia naʻá ne fokotuʻu maí. Te ke lava ʻo vahevahe ʻa e ngaahi kupuʻi lea mei he kau Taki Māʻolungá ʻi hoʻo peesi Facebook pe ʻohake ha ngaahi fakatātā ʻo e ngaahi potufolofola ʻokú ke saiʻia taha aí he Instagram. ʻE lava foki ho fāmilí ʻo ʻai haʻamou hashtag ke fakaʻaongaʻi ʻi he taimi ʻokú ke ʻohake ai ha ngaahi fakatātā pe lea fekauʻaki mo e ongoongoleleí (hangē ko e kāingalotu ne nau kamataʻi e hashtag #LDSconf).