Aumaia o le Peraimeri i le Fale

O Le A Ou Faasoaina atu le Talalelei i Fanau Uma a le Atua

Mata na i ai se taimi na e aina ai se mea e matuai manaia lava na e manao ai e faasoa atu? Na i ai se taimi na miti ai le perofeta o Liae e faapea na ia ‘ai i se fua o se laau suamalie lava. Na manaia tele lona tofo na “faatumulia [ai lona] agaga i le olioli tele” (1 Nifae 8:12). Na manao Liae i lona aiga ina ia tofo foi i lena fua suamalie.

O le fua i le miti a Liae e pei o le alofa o le Tama Faalelagi. Na manao Liae i lona aiga ina ia lagonaina le alofa o le Tama Faalelagi. Sa ia manao e faasoa atu le talalelei ia i latou ona sa ia iloa e aumaia ai ia i latou le fiafia.

E masani lava ona lelei tele ia tamaiti i le faasoa atu o le talalelei i isi.

Na vaai Maria e valu tausaga i faifeautalai i le alatele o Ekuatoa. Sa ia fesili atu ia i laua pe mafai ona la aoao ia te ia le talalelei. Na o atu faifeautalai i le fale o Maria e aoao atu lona aiga. O Maria o le tagata muamua i lona aiga na papatisoina. Sa matua fiafia o ia ina ua auai foi mulimuli ane lona aiga atoa i le Ekalesia.

O Eric e iva tausaga le matua sa matuai fiafia lava i le polokalama o le sauniga faamanatuga a le Peraimeri o lea sa ia valaaulia ai ona tuaoi e o mai. Sa latou o mai.

O nei tamaiti uma e toalua na la faasoaina i tagata la te alolofa i ai ni mea taua. A o e faasoa atu le talalelei, o le a tuputupu ae lau molimau. Faapei o Liae, o le a e lagonaina foi “le olioli tele.”

Pese ma le Mau

• “Matou te Aumaia le Upu Moni i le Lalolagi,” Tusipese a Tamaiti, 92–93

• Mataio 5:16

Tatou Talanoa

E mafai ona e fai atu i tagata taitasi o le aiga e tusi se ata o se fua o se laau suamalie e fiafia lava i ai. O tua la o le ata, e mafai ona tusi ai e tagata taitasi le auala o faamanuiaina ai e le talalelei o latou olaga. E mafai ona tou talanoa faatasi e uiga i auala e mafai ona e faasoa atu ai le talalelei i uo ma tuaoi.

Kata e Faasoa Atu

E mafai ona e faasoa atu le talalelei e ala i le faasoaina atu o se kata fepasiai. Na o le faapipii lava o kata i le itulau e sosoo ai i luga o se pepa malo. Ona otiina lea o kata ma tusi ai i le isi itu lau savali.

“Aua e te fefe, aua ou te ia te oe.”

Kenese 26:24

“Amuia e faatupuina le filemu.”

Mataio 5:9

“A ia outou feagaleleiai, ia femutimutivaleai lo outou alofa, ia fefaamagaloai outou.”

Efeso 4:32

“Ia outou faafetai i mea uma lava.”

1 Tesalonia 5:18

Agavale: ata na tusia e Mark Jarman; taumatau, mai le agavale agai i le taumatau i le tulimanu pito i luga i le agavale: ata na tusia e Jim Madsen, Jared Beckstrand, Eric Barclay ma Celeste Smith