Savali a Faiaoga Asiasi
O Le Misiona Paia a Iesu Keriso: Foafoa
Suesue ma le agaga tatalo i mea nei, ma saili ia iloa mea e faasoa atu faatasi ma uso e te asia. E faapefea e le malamalama i le olaga ma le misiona a le Faaola ona faateleina lou faatuatua ia te Ia ma faamanuia i latou ua e tausia? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O Iesu Keriso “na foafoaina le lagi ma le lalolagi” (3 Nifae 9:15). Sa Ia faia e ala i le mana o le perisitua, i lalo o le taitaiga a lo tatou Tama Faalelagi (tagai Mose 1:33).
“E tatau ona tatou maua le lotofaafetai ona ua foafoaina e le Mataisau poto se lalolagi ma tuu i ai i tatou iinei” na saunoa ai Peresitene Thomas S. Monson, “… ina ia tatou oo i se taimi o tofotofoga, o se avanoa e faamaonia atu ai i tatou lava, ina ia mafai ona tatou agavaa mo mea uma ua saunia e le Atua mo i tatou ia maua.”1 A faaaoga lo tatou faitalia e usitai ai i poloaiga a le Atua ma salamo, tatou te agavaa e toe foi atu e nonofo faatasi ma Ia.
E uiga i le Foafoaga, na saunoa ai Peresitene Dieter F. Uchtdorf, Fesoasoani Lua i le Au peresitene Sili:
“O i tatou o le pogai lea sa Ia foafoaina ai le lalolagi! …
“O faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua.”2 O le iloaina o Iesu Keriso na foafoaina le lalolagi mo i tatou aua o i tatou o mea uma ia i le Tama Faalelagi e mafai ona fesoasoani ia i tatou e faateleina ai lo tatou alofa mo i Laua.
Mai Tusitusiga Paia
Ioane 1:3; Eperu 1:1–2; Mosaea 3:8; Mose 1:30–33, 35–39; Aperaamo 3:24–25
Mai lo Tatou Talafaasolopito
Ua foafoaina i tatou i le faatusa o le Atua (tagai i le Mose 2:26–27), ma e i ai o tatou gafatia paia.Na apoapoaiina e le Perofeta o Iosefa Samita ia tamaitai o le Aualofa ia “ola e tusa ai ma [o latou] faamamaluga.”3 Faatasi ai ma lena faamalosiauga e avea ma se faavae, na aoaoina ai ia tamaitai o Le Ekalesia a Iesu Keriso o le Au Paia o Aso e Gata Ai ina ia ola e tusa ai ma o latou gafatia paia e ala i le faataunuuina o faamoemoega o le Atua mo i latou. “A o faasolo ina latou malamalama pe o ai moni i latou—o ni afafine o le Atua, faatasi ma se gafatia na soifua mai ma i latou ia alolofa ma faafailele—latou te ausia lo latou faamoemoega o ni tamaitai paia.”4
“Ua tuuina nei outou i se tulaga e mafai ai ona outou galulue e tusa ai ma na tigaalofa ua totōina e le Atua i o outou loto,” na saunoa ai le Perofeta o Iosefa Samita. “Afai tou te soifua ai i nei mataupu faavae e maeu ma maoae!—afai tou te soifua ai i lo outou faamamaluga, e le mafai ona taofiofia agelu mai le avea ai ma a outou paaga.”5
Ata pue o le Christus e David Nystul; tuāata na saunia e Thinkstock a/Hemera