Ang Pagpili sa Dili Paglibak
Ang tagsulat nagpuyo sa Washington, USA.
Panahon sa akong sophomore sa high school, miboluntaryo ko isip kabahin sa teknikal nga pundok nga naghimo sa tinuig nga musika sa akong high school. Ang kasinatian nahimong usa sa akong paborito nga handumanan niana nga tuig, tungod kay kini makalingaw ug nakakat-on ko pag-ayo sa pagbuhat niini. Ganahan usab ko nga motrabaho uban sa mga tawo nga akong nahimamat.
Apan ang labing importanting butang nga akong nakat-unan dili usa ka butang nga akong gipaabut.
Aron ang teknikal nga pundok makaistorya sa hilom sa usag usa, migamit kami og mga radio headset. Gigamit usab kini namo sa pasiaw, pag-istoryahanay, gani sa pagkanta sa usag usa aron sa paglingaw sa among kaugalingon panahon sa taas nga mga rehearsal.
Apan sa unang higayon nga gigamit namo ang mga headset dili gayud kaayo komportable alang nako. Sa sinugdanan nalingaw kaayo ko. Dayon pipila ka mga tawo nagsugod sa paglibak sa mga artista nga nag-rehearse. Naningkamot ko nga ibaliwala ang dili maayo nga mga komentaryo ug mga sulti, apan sa nagsige na og istorya, ang libak nagkagrabe ug mas sakit.
Lain ang akong gibati nga nakadungog sa mga komentaryo, apan nahadlok ko nga mobarug batok sa akong bag-ong mga higala. Maayo unta og nakasulti ko, tungod kay sa akong pagpaminaw sa ilang mga pasiaw, sa katapusan ako natintal sa pagkatawa, ug mohimo og akong mga komentaryo. Nagsugod ko sa pagpangatarungan ngano nga kini maayo ra. Walay lain ang makadungog nako gawas sa teknikal nga pundok, ug gusto ko nga mahiangay sa mga tawo nga naglibut nako.
Bisan kini lisud, nasayud ko nga ang paglibak niadto nga mga tawo dili husto, ug ako mipili sa dili paglibak.
Human sa rehearsal among nahibaloan nga ang tanan nga among gipanulti ginamit ang headset nasibya ngadto sa tanan. Ang tanang 60 o labaw pa nga mga partisipante nakadungog namo nga nag-istoryahanay. Ang uban nasuko, naglagot, o dili komportable. Walay usa nga nakauyon.
Wala madugay, samtang ako nakigsulti sa usa sa akong mga higala kabahin sa nahitabo, siya miingon, “Ang tanan nasayud nga ikaw dili gayud mosulti og ingon niana.” Iyang komentaryo nakapakugang nako, ug akong naamgohan ang kaimportante sa pagpili nga akong gihimo. Kon mipili pa ko sa pag-apil sa libak, unsa kaha ang gikasulti kanako? Unsa kaha ang gikasulti niini kabahin sa Simbahan?
Mapasalamaton ko sa pagpili nga akong gihimo niana nga ngitngit, gamayng sinehan, bisan kon naghunahuna ko nga ang uban dili masayud, tungod kay kini adunay nabukas nga mga panalangin sa panaghigalaay, kalinaw, ug pagsalig nga mawala unta kanako kon mipili pa ko sa paglibak.