Among Tubag
Usa ka yano nga pag-ampo nakapausab sa akong pamilya sa kahangturan.
“Siya mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:4).
Nakahinumdom gihapon ko sa unang higayon nga akong nakita ang duha ka mga tawo nga nagbarug sa among pultahan sa Peru. Nagsul-ob sila og puti nga polo ug kurbata, ug tag-as kaayo sila! Sila dunay mainiton nga pahiyom.
“Buotan tingali sila,” naghunahuna ko. Tingali mao usab ang hunahuna sa akong mga ginikanan tungod kay sa wala madugay ang mga misyonaryo kanunay nang moanha sa among balay.
Ganahan ko nga maminaw sa mga misyonaryo ug kanunay mibati nga sila nagsulti sa kamatuoran.
“Dili ka ba gusto nga magpabunyag, Mamá?” Gipangutana nako ang akong mama usa ka adlaw niana.
Mipahiyom siya. “Gusto ko. Apan gusto kong magpabunyag uban sa imong papa.”
Mitando ko. Nuwebe anyos na ako—mahimo nang bunyagan. Apan gusto ko usab nga magpabunyag uban sa akong papa, ug dili siya sigurado kon motuo ba unsay gitudlo sa mga misyonaryo.
“Padayon sa pag-ampo, ug ang panahon moabut,” miingon si Mamá, ingon og makabasa siya sa akong hunahuna.
Nasayud ko nga ang mga misyonaryo mihagit sa akong papa sa pagsunod sa imbitasyon sa katapusan sa Basahon ni Mormon nga mangutana sa Dios uban sa sinsero nga kasingkasing kon tinuod ba ang ebanghelyo. Busa usa ka gabii niana mihukom ako sa pagtabang sa akong papa niana nga hagit. Mihangyo ko kon mahimo ba kaming mag-ampo sa paagi nga gihangyo sa mga misyonaryo. Miadto mi sa akong kwarto ug miluhod. Nangutana siya nako kinsa ang mag-ampo.
“Ikaw ang mag-ampo, palihug,” miingon ko.
Ang akong papa nagsugod sa pag-ampo sa Langitnong Amahan. Sa dihang nangutana siya kon kinahanglan bang magpabunyag kami, usa ka pagbati sa gugma ug kalinaw miputos sa among palibut. Kusog kaayo kini nga ang akong amahan mihunong sa pagsulti sa usa ka minuto. Nasayud kami nga kinahanglan kaming magpabunyag.
Dili gayud nako makalimtan ang tinan-awan sa akong papa pagkahuman sa iyang pag-ampo.
“Gitubag na kita,” mihunghong siya, nga migakos nako.
Mipahiyom ako samtang akong giumod ang akong ulo sa iyang abaga. Ang Espiritu Santo mihimong posible nga kami masayud sa kamatuoran (tan-awa sa Moroni 10:5).