Nindot nga mga Pangutana, Nindot nga mga Diskusyon
Ang tagsulat nagpuyo sa Utah, USA
Aduna pay mas makapadani og diskusyon sa klasehanan kaysa pagpangutana og mga pangutana. Kinahanglan kitang mangutana sa husto nga matang sa mga pangutana.
Usa ka magtutudlo sa Sunday School nangutana, “Kinsa ang unang duha ka tawo dinhi sa yuta?” Siya nagpaabut og tubag sa iyang klase nga mga tin-edyer, apan walay miisa sa kamot. Ang mga miyembro sa klase nanagduko o nagpakli-pakli lang sa ilang mga kasulatan. “Simple ra ni nga pangutana,” miingon ang magtutudlo. “Wala bay nakahibalo sa tubag?”
Sa pikas klasehanan, sa klase sa Gospel Doctrine, ang magtutudlo nangutana, “Unsa man ang labing mahinungdanon nga baruganan sa ebanghelyo?”
Usa ka sister nagduha-duha sa pag-isa sa iyang kamot. “Hugot nga Pagtuo?” siya nangutana.
“Nindot kana nga tubag,” mitubag ang magtutudlo, “apan dili na mao ang akong gipangita. Aduna pa bay lain?”
Nahilom.
Ang magtutudlo mangutana kay gusto nila nga maapil ang mga miyembro sa klase sa ilang mga leksyon. Sila nakasabut nga ang mga estudyante kinsa maapil mas makakat-on kay sa niadtong naglingkud ug naminaw lang. Apan ang mga pangutana sama niadtong sa ibabaw sa kasagaran dili epektibo.
“Kinsa ang unang duha ka tawo dinhi sa yuta?” dili epektibo nga pangutana tungod kay ang tubag klaro kaayo nga walay usa ganahang motubag—o angay pang tubagon.
“Unsa man ang labing mahinungdanon nga baruganan sa ebanghelyo?” dili usab epektibo nga pangutana. Walay nasayud sa tubag nga gipangita sa magtutudlo gawas lang sa magtutudlo mismo, daw sama ra ingon niini ang gipasabut, “Tag-ana unsay akong gihunahuna.”
Kini mga pangutana sa katinuod; ang matag usa adunay piho nga tubag. Apan ang talagsaong mga diskusyon sa klasehanan mahitabo gumikan sa lahi nga matang sa pangutana—makapainteres, gikan sa mga pangutana nga walay piho nga tubag. Kana mao ang yawe.
Pagpangutana og mga Open-Ended Question
Kon kamo usa ka magtutudlo sa klase sa adult, mahimo kamong mangutana, “Unsa nga mga baruganan sa ebanghelyo ang mahinungdanon sa inyong kinabuhi, ug ngano?” Ang mga miyembro sa klase tingali maghunahuna og kadiyot kabahin sa ilang mga kasinatian—ug OK ra kana. Kon kamo mokalma ug magpaabut og pipila ka segundo, ang mga kamot mosugod sa pag-isa, ug kamo makadungog sa tinuod, kinasingkasing nga mga kasinatian sa mga tawo kabahin sa ebanghelyo. Inyong mabantayan usab nga ang komentaryo sa usa ka tawo makapasiugda og komentaryo sa uban. Sa dili madugay, ang klase adunay makapaikag ug makapadasig nga panaghisgut!
Kon gusto ninyo nga ang klase adunay diskusyon kabahin sa usa ka piho nga butang sama sa hugot nga pagtuo, ikonsiderar sa pagsulti og sama niini: “Karon maghisgot kita kabahin sa hugot nga pagtuo, ang unang baruganan sa ebanghelyo.” Dayon pangutana mahitungod sa hugot nga pagtuo nga walay piho nga tubag:
-
“Unsay bahin sa hugot nga pagtuo diha sa inyong kinabuhi?”
-
“Sa inyong hunahuna ngano kaha ang Ginoo gusto nga kita adunay hugot nga pagtuo?”
-
“Unsa ang mga pamaagi nga atong mapalambo ang atong hugot nga pagtuo?”
Makakuha mo og daghang tubag, ug mahimong inyo kining isulat (sa minubo nga porma) diha sa pisara. Kon kamo mahuman na, kamo adunay nindot nga lista nga inyong magamit aron sa pagtapos sa inyong diskusyon.
Adunay dugang nga kaayohan sa pagpangutana og mga open-ended question: Gani ang mga miyembro sa klase nga wala motampo sa diskusyon maghunahuna kabahin sa mga pangutana. Ang ilang pagsabut ug pagpamatuod molambo bisan og wala silay gisulti.
Paghisgut sa mga Kasulatan
Ang mga open-ended question mahimong epektibo atol sa diskusyon sa mga kasulatan. Daghang magtutudlo naghunahuna nga ang pagpabasa sa kasulatan sa mga miyembro sa klase maayo nga paagi aron sa pagpaapil kanila. Ang makapasubo kay, mahimong sayop kini. Daghang tawo ang dili maayo nga mga mambabasa ug mahimong magkanga-kanga. Ang ubang mga miyembro sa klase mahimong maglisud sa pagpaminaw sa tigbasa.
Ang dali nga madunggan sa klasehanan mao ang magtutudlo, kinsa nagbarug sa atubangan sa klase. Usab, ang magtutudlo makahunong sa tunga-tunga sa usa ka bersikulo aron mangutana ug makasugod og diskusyon. Samtang inyong basahon ang mosunod nga ehemplo, bantayi unsa ang gibuhat sa magtutudlo sa pag-awhag og diskusyon:
Magtutudlo: “Karon kita maghisgut sa usa ka pamilyar kaayo nga istorya, ang sambingay sa usikan nga anak. Apan gusto nako nga dili lang ta maghunahuna kabahin sa usikan nga anak apan sa ubang mga sakop sa pamilya usab. Palihug abliha ang inyong Biblia sa Lucas 15:11, sa pahina 117.” (Ang paghatag sa numero sa pahina makatabang sa mga estudyante kinsa dili pamilyar sa mga kasulatan.)
Human ang tanang miyembro sa klase nakakita sa bersikulo, ang magtutudlo nagsugod sa pagbasa: “‘Dihay usa ka tawo nga may duha ka anak nga lalaki:
Ug ang manghod miingon sa iyang amahan, Amahan, ihatag kanako ang akong bahin sa katigayunan. Ug kanila iyang gibahin ang iyang katigayonan.’ Karon, unsa ang inyong masulti kabahin niini nga pamilya?” (Timan-i ang open-ended question.)
Estudyante: “Ang amahan daw andam sa paghatag sa manghud nga anak kon unsay iyang gusto.”
Magtutudlo: “Mao gyud, dili ba? Kasagaran ang usa ka anak dili mokuha sa iyang napanunod gawas lang kon mamatay na ang iyang amahan. Apan ang amahan maingon og usa ka mahigugmaon, manggihatagon nga tawo. Unsa pa?”
Estudyante: “Ang manghud nga anak daw hakog para kanako. Kana sobra ra kaayo nga pangayoon sa usa ka amahan nga buhi pa.”
Magtutudlo: “Oo, mao gyud. Ingon og iya lang kaugalingon ang iyang gihunahuna. Unsay inyong masulti sa maguwang nga anak?”
Estudyante: “Sa pagkakaron hilom lang siya.” Ang klase nangatawa.
Magtutudlo: “Oo, ug kana naghulagway sa iyang kinaiya. Ato kanang bantayan samtang magpadayon kita sa pagbasa.”
Samtang nagbasa mo sa ehemplo, unsay inyong nabantayan nga gibuhat sa magtutudlo sa pag-awhag og diskusyon? Kamo makahimo og lista—kini mao ang inyong lista ug inyong interpretasyon sa sitwasyon, mao nga ang tanang tubag eksakto. Ngano man? Tungod kay ang unang pangutana niini nga paragraph usa ka open-ended question, ug kon matinud-anon mo sa inyong tubag, dili sayop ang inyong tubag. Kon kamo mangutana og susama niini sa inyong klasehanan, susama usab ang mahitabo sa mga miyembro sa klase, nagpasabut nga sa dili madugay ilang masayran nga mahimo ra silang makakomentaryo ug motubag sa pangutana.
Dugang pa, kamo nakabantay nga ako adunay gihimo nga makapahunahuna ninyo sa wala pa mo mosugod sa pagbasa. Ako misulat, “Samtang kamo nagbasa, bantayi unsa ang gibuhat sa magtutudlo sa pag-awhag og diskusyon.” Gibuhat nako ni tungod kay ako nasayud nga kini makatabang kaninyo sa paghunahuna sa inyong gibasa ug sa pag-andam sa pag-apil niining “diskusyon” pagkahuman.
Ang magtutudlo diha sa ehemplo migamit niini nga paagi kaduha: kausa dihang miingon siya, “Gusto nako nga dili lang ta maghunahuna kabahin sa usikan nga anak apan sa ubang mga sakop sa pamilya usab,” ug ang usa pa dihang miingon siya, “Ato kanang bantayan samtang magpadayon kita sa pagbasa.” Ang duha ka mga sugyot naghatag sa mga miyembro sa klase og butang nga tutokan aron sila andam nga motubag sa mga open-ended question kon mangutana kanila ang magtutudlo.
Ang pagbuhat niini makatabang sa mga miyembro sa klase nga magkatakdo ang ilang gibasa nga bersikulo. Imbis nga maglingkod lang sa ilang mga lingkuranan, sila nagbasa ug naghunahuna kabahin sa mga kasulatan. Ug kon nahuman na ang pagbasa, sila andam nga motubag sa mga pangutana. Dayon kinahanglan lang tawagon sila ug han-ayon ang panaghisgutan.
Bantayi nga sa niining matang sa diskusyon kamo sa tinuoray nagtudlo gikan sa mga kasulatan, dili lang gikan sa manwal. Bisan tuod ang manwal kinahanglang gamiton sa pag-andam sa leksyon ug usa ka talagsaong tinubdan sa mga open-ended question, ang mga kasulatan kinahanglang magpabilin nga sentro sa atong pagtudlo ug pagkat-on.
Pag-focus Kanunay
Adunay hagit kon adunay daghang moapil sa mga panaghisgutan sa klasehanan: sayon ra nga motipas ang diskusyon. Importante nga ayohon ninyo pag-andam ang inyong leksyon aron dili mo mawala ug andam mo, kon gikinahanglan, sa pagbalik ngadto sa hilisgutan sa diskusyon. Kasagaran kinahanglan lang ninyong mohatag og gamay nga giya: “Nindot kana, apan morag nawala nata og gamay sa leksyon. Mobalik ta sa atong diskusyon kabahin sa hugot nga pagtuo karon.”
Makatabang usab kon kamo adunay klaro, makapainteres nga introduksyon aron ang mga miyembro sa klase masayud sa focus sa leksyon. Dayon mag-diskusyon, giyahi ang panaghisgut.
Sa katapusan, madasigong i-summarize ang gitudlo. Ang mga pulong sa usa ka himno o balak sa kasagaran maayo nga summary. Si Presidente Boyd K. Packer, Presidente sa Korum sa Napulog Duha ka mga Apostoles, miingon, “Sultihi ang inyong mga tigpaminaw unsay inyong gusto nga isulti kanila, sultihi sila, ug dayon sultihi sila unsay inyong gisulti kanila. Kini makatabang nga paagi.”1
Siguradoa nga nakapamatuod mo sa kamatuoran nga gihisgutan.
Pagpakigbahin og mga Pagbati ug mga Kasinatian
Hinoon, aduna pay mas mahinungdanon niini kaysa nindot nga diskusyon. Kon angay, ang Espiritu modasig sa mga miyembro sa klase sa ilang mga komentaryo aron ipakigbahin nila ang gusto sa Ginoo nga madungog sa klase. Sama sa giingon sa Ginoo ngadto sa Iyang mga disipulo, “Kay diin gani ang duha kon tulo magakatigum sa akong ngalan, anaa ako sa ilang taliwala” (Mateo 18:20).
Siyempre, kinahanglang magmabinantayon kita sa pagpakigbahin sa atong personal kaayo o sagrado kaayo nga mga kasinatian. Apan ang mga istorya gikan sa mga miyembro sa klase makadugang og daghan sa bisan unsa nga leksyon. Sama sa tambag sa manwal sa Doktrina sa Ebanghelyo: “Pagpaambit og mga ideya, pagbati, ug kasinatian nga may kalabutan sa leksyon. Dapita ang mga sakop sa klase sa pagbuhat usab niini.”2
Aduna daghang makat-unan diha sa panaghisgut sa klase kaysa pagpakomentaryo lang. Sa katapusan, usa kini ka espirituhanon kaayo nga butang nga mas makapaduol sa klase ngadto sa Dios.
Samtang inyong gamiton kining mga pamaagiha, inyong makita ang kalamboan sa espiritwalidad ug kahibalo sa ebanghelyo, lakip na ninyo. Imbis nga maghunahuna mo kon unsaon ninyo paggamit ang oras sa klase, mahutdan namo og oras. Gani inyong makita nga modaghan ang inyong miyembro sa klase kay sila nasayud nga mahimo silang kabahin sa usa ka nindot nga diskusyon—ang pagkat-on gikan sa mga kasulatan, gikan sa usag usa, ug gikan sa Espiritu sa Ginoo.