Ang mga Alpaca Nakabuhi!
Ang katapusang alpaca dili molihok. Unsay angay nakong buhaton?
“Langitnong Amahan, karon ako mag-ampo, giyahi ug bantayi ko matag adlaw” (“Heavenly Father, Now I Pray,” Children’s Songbook, 19).
Sa miaging ting-init mitrabaho ko alang sa akong silingan. Siya dunay daghang binuhi nga alpaca tapad sa iyang prutasan sa walnut. Ang mga alpaca sama sa mga llama, mas gamay lamang.
Ang akong trabaho mao ang paglimpyo sa ilang tangkal kada adlaw. Ganahan ko sa trabaho, bisan dili kini sayon.
Usa ka ting-init nga hapon miadto ko ug wala na ang among silingan. Kana dili problema. Gisultihan na niya ako nga makalimpyo ra ko sa mga tangkal bisan unsang orasa sa akong gusto, bisan kon wala siya.
Samtang nanglimpyo ko, usa sa mga alpaca midasmag sa pultahan. Sa pipila ka segundo ang tanang 14 ka mga alpaca nakagawas sa nataran ug ngadto sa prutasan! Dili ako makatuo niini! Gibati nako nga naglain ang akong tiyan. Unsaon nako sa pagpasulod nilag balik nga ako ra?
Paspas dayon kong milihok kutob sa akong mahimo, midakop sa usa o duha kada higayon. Kinse minutos ang milabay mikusog og pitik ang akong kasingkasing tungod sa pagdagan-dagan, apan ang katapusan nga alpaca mibalik na ngadto sa tangkal. Whew!
Dayon milingi ko ug nakita ang usa ka mabdos nga alpaca naghigda sa may kahoy 30 ka pye ang gilay-on. Ah. Duna pa diay usa. Naningkamot ko nga hadlokon siya aron mobalik ngadto sa tangkal, apan dili siya molihok. Dayon naningkamot ko nga birahon siya gamit ang usa ka harness ug usa ka pisi nga nakita sa garahian. Wala magsilbi. Naghigda siya sama sa usa ka dako nga pundok sa bika [brick]. Miginhawa ko sa kasagmuyo. Unsa pa man ang akong mahimo?
Dayon akong nahinumduman nga dunay paagi sa pagpangayo og tabang, bisan asa ko. Ako miluhod aron mag-ampo. Pagkahuman nako sa pag-ampo, akong gibuka ang akong mga mata ug dili ko makatuo sa akong nakita. Ang alpaca naglakaw balik ngadto sa tangkal, sa iyang kaugalingon. Akong giablihan ang pultahan, ug siya misulod.
Mipahiyom ako samtang nagbisikleta ko pauli. Nasayud ko nga ang Langitnong Amahan mitubag sa akong pag-ampo.