Seia Tatou Toe Feiloai
Savavali Faatasi—i le Ala o le Faamoemoe
Ia Fepuari 1846 sa tutuli ese ai paionia o le Au Paia o Aso e Gata Ai mai Navu. O le faatumulia i le faamoemoe e faapea o le a latou maua le filemu i Siona, sa latou savalia ai le Auala o Parley—ua ta’ua nei o le Ala o le Faamoemoe—ma sopoia ai le Vaitafe o le Misisipi.
O le amataga o le tautotogo i Navu o le taimi lea sa ou amata savalia ai le Ala o le Faamoemoe. Sa susulu le malamalama ae mafanafana le paolo a o ou savali i le auala e laina i laau. I le avea ai ma se tagata pueata, sa na o saoasaoa o le pola [o le meapueata], le vatele o le pola, ma le malamalama matagofie sa lilofia ai faaata o le meapueata.
Ma sa amata malie ona tumu lo’u loto i mafaufauga e uiga i o’u tuaa o e sa savalia lenei auala. Na muamua lava o Iareto ma Konelia ma le la atalii e lua tausaga le matua. Sa ou lagona le malulu o le ea, ae o lena malulu sa le faatusalia ai tulaga maatiati o le malulu sa oo i ai Iareto ma si ona aiga laiti i le taimi o le latou malaga umi. Sa maliu Konelia i se mea o le va o Navu ma Sate Leki. Sa ou vaai faalemafaufau i le tagi a Iareto a o ia siiina a’e si ona atalii ma faaauau pea.
O lo’u fefe ina ne’i aluese le lagona o lo latou i ai i lena taimi, sa le taofia ai lo’u pueina o ata a o faanenefu e loimata la’u vaai. Ona ou manatua ai lea o Sara laitiiti, o le sa o mai ma le toalua agalelei o lona tamā i le vaega mulimuli o le Au Paia na tuua Navu. I le taimi lena, sa faatumu ai e se Tama Faalelagi agalelei le latou tolauapiga i ni manulele [quail] e fafaga ai i latou. Ona latou taumafai atili ai lea i luma ma ni loto faafetai.
Sa amata ona tumu lo’u loto i le ootia; sa ou lagona e pei lava na ma i ai faatasi Sara. Sa matou i ai faatasi ai foi ma Iareto ma Konelia ma le la atalii laitiiti. Sa matou savavali faatasi i le malamalama ma le paolo, ua o faatasi ai i le tuanai ma le taimi nei i luga o lenei auala—i lenei auala o le faamoemoe, i lenei auala o loimata. I se auala e le mafai ona ou faamatalaina, sa latou faatasi ai ma a’u ma fagua i totonu ia te a’u lo tatou alofa tutusa i le talalelei a Iesu Keriso. Sa ou iloaina ua mumu la’u molimau i totonu ia te a’u aua sa mumu foi i totonu o i latou—na tuufaasolo mai i lea tupulaga i lea tupulaga—sa taitoatasi ona latou faataatiaina le faavae mo le isi tupulaga e sosoo ai. Sa ou tagi i le loto faafetai.
E le’i umi ae oo mai lo’u toalua, o lē foi sa pueata i se isi itu. Sa ou tu latalata ia te ia a o o’u faamatala atu i ai lo’u aafiaga. O ia, e pei foi o na Au Paia Navu, o le tagata muamua o lona aiga ua talitonu i le talalelei. Ma o ia foi e pei o i latou o e sa savalia lenei ala i le silia ma le 150 tausaga na muamua atu, o le a le avea ma tagata mulimuli e talitonu. O lana molimau ma la’u molimau ua faafaileleina ai molimau ua faapea ona mumu i le taimi nei i loto o le ma fanau, e pei foi ona faafaileleina e molimau a Iareto ma Konelia ma Sara ia molimau o le faitau afe o e ua tupuga mai ia i latou.
O le galo ai o le ma puegaata, sa ma savalivali lemu ai ma lo’u toalua i le vaega atoa na totoe o le Ala o le Faamoemoe, ma manatuaina ma le filemu i latou ua maliliu.
Savali o le Faatuatua, na saunia e Jed B. Thomas, e le mafai ona kopiina