Luitau i Misuri

Saunia e Jennifer Maddy

O mai tatou o e suesue se nofoaga taua i le talafaasolopito o le Ekalesia!

Mo Iosefa Samita, sa o se malaga umi ma faigata mai Katelani, Ohaio, agai atu i Initipene, Misuri. Sa malaga o ia i se taavale solofanua, i se vaa e o i auvai, ma e ala i faletulaga e toso e solofanua. Mo le 250 maila (420 km) mulimuli, sa savali ai o ia! Ae sa ta’u atu e le Alii ia te ia e alu i Misuri e faatu ai le aai o Siona, o lea sa usitai ai Iosefa Samita.

Sa amata ona taunuu atu isi tagata o le Ekalesia i Misuri i le 1831. Sa latou suaina le eleele, fau fale, ma selesele fua o faatoaga.

Ma sa atili toatele tagata o le Ekalesia sa siitia atu i Initipene, Misuri, o nisi o tagata o e sa nonofo ai iina sa amata ona masalosalo ma feita. Sa osofai e tagata faatupu vevesi fale o le Au Paia ma faatonu i latou e o ese.

Ata na pueina e Jennifer Maddy; ata na tusia e Paul Mann

O le faaaliga lenei i le nofoaga autu o tagata asiasi i Initipene o loo faaalia ai le Au Paia o loo pisi e galulue i le faiga o le latou fale e fau i ogalaau.

Sa faatu e William W. Phelps se faleoloa lomitusi i Initipene, lea sa ia lomiaina ai se nusipepa. Sa ia lolomiina foi itulau mo le Tusi o Poloaiga, lea sa i ai nisi o faaaliga a le Alii i le Perofeta o Iosefa Samita. O le taimi nei o nei faaaliga ua i le Mataupu Faavae ma Feagaiga.

Falepuipui i Liperate

I le taumalulu o le 1838, sa taofia ai Iosefa Samita ma isi taitai e toalima o le Ekalesia i ni tuuaiga sese ma aveina atu ai i le Falepuipui i Liperate. O le falepuipui sa pogisa, palapala ma matuai malulu lava, ma sa leai ni palanikeke mafanafana lelei po o ni meaai lelei a pagota. Sa i ai i le Falepuipui o Liperate ni puipui maa mafiafia. O le potu pito i luga sa mo le tagata e vaaia le falepuipui ma lona aiga, ae o le potu pito i lalo—o le “ana”—sa mo pagota. O se faitotoa lave sa na o le pau lea o le auala i totonu ma fafo o le fogafale a lalo.

A o i ai le Perofeta i le falepuipui, sa ta’u atu e le Alii ia te ia, “Aua le mata’u i mea e mafai ona fai e tagata, aua o le a faatasi le Atua ma oe e faavavau ma faavavau lava” (MF&F 122:9).

Sa toe fausia e le Ekalesia se vaega o le falepuipui mai nisi o ona uluai maa ma nisi o maa sa toe fai ma toe fausia faataamilo ai se nofoaga autu mo tagata asiasi. O le taimi nei e toatele tagata asiasi e o mai e vaai i le nofoaga sa maua ai e se perofeta a le Atua ni faaaliga faamafanafana a o i ai o ia i le falepuipui.

Ata na pueina e Jennifer Maddy; ata na tusia e Paul Mann