Au Moan Tataro ibukin te Moan Mii ni Burabeti

Jing-juan Chen, Taiwan

Ngke I baireia bwa N na bwabetitoaki, i bon ibukina bwa tabeua au kangaanga a bon toki ngke I butimwaei taian maroroo. Tiaki ibukina ngkai I a tia n tataro ao I karekea koauan ana Boki Moomon ke e bon koaua bwa Iotebwa Timiti e noora te Tama are i Karawa ao Natina, Iesu Kristo. Mitinare a tia ni kaoai n tataro ibukin bwaai aikai, ma I bon tuai ni karaoi. I a bon kakoauai bwaai ake a tia n reireinai iai mitinare.

Teniua te ririki imwiin au bwabetito, temanna te aine ae kaain te ekaretia e tei n te tabo ni kabwarabwara mai moa n te umantabua ao n tibwaua ana kakoaua n ana Boki Moomon ao Iotebwa Timiti. E titirakiniia aomata ni kabane bwa a na iangoa raoi te titiraki aio: “Ti a tia n tataroakina raoi koauan ana Boki Moomon ao te bwai are e a tia ni karekea Iotebwa Timiti?” Te titiraki aio are e bon rangi n rootai, ao I iango i bon irou, “I tuai n tataroakinii bwaai aikai, ma I riai ao N na karaoia.”

I bon kaungaaki bwa N na karaoa te mwakuri aei ibukina bwa au onimaki n te tai anne e bon mamaara ao au kakoaua ibukin booki aika tabu e bon uarereke. N te tairiki anne I tataro nakon Tamau ibukin Iotebwa Timiti ao koauan ana Boki Moomon.

I aki namakina te bwai teuana n te moan tai are I tataro iai, ao ai aron te kauoua n tai naba. Ibukina bwa e aki kaungaaki, I kauki booki aika tabu nakon Joseph Smith—History 1:14–17, ike e kabwarabwaraaki bwa e kanga Iotebwa n nakon te buakonikai ni karaoa ana tataro i bon irouna:

“I noora te oota iaon atuu, ae raka riki otana nakon otan taai, are e ruo ni karaurau ni karokoa e bwaka nako aou.

“E aki maan ni kaoti ao I a kunea bwa I a kamaiuaki. … Ngke e roko te oota iaou I a noriia uoman Aomata.”

Ngke I a warekii taekana, I a moanna n ruru n ai aron ae buti te iti inanon rabwatau ni kabanea. N te tai ae waekoa I ataia bwa Iotebwa Timiti e a tia n noora raoi te Tama are i Karawa ao Natina ae Tangiraki, Iesu Kristo. I ataia bwa ti karekea ana Boki Moomon ibukina bwa te Atua e a tia n rairia rinanon Ana burabeti.

I kakaaitau bwa te Tama are i Karawa e a tia n anganai te kakoaua aio ni koauan te Moan Mii ni Burabeti. I ataia bwa ngke arona bwa e tuai ni kaokaki te euangkerio, N na bon tuai n ataa au Tia Kabooai. I ataia bwa bwanin te euangkerio e bon koaua, ao I ataia bwa N na karekea ana berita te Atua ngkana I teimatoa ni kakaonimaki ni karokoa te toki.