Te Babaire ibukin Ara Utu
“Fam’lies can be together forever through Heav’nly Father’s plan” (Children’s Songbook, 188).
I tekateka iaon aia kainiwene Tinau ao Tamau, ni ururingiia ma te rawawata, ngke e tang te tareboon.
“Eei, Levi. Keetinna bwa tera?” E taku Tamau. “Mwaanem ae Nora e bungiaki n te bwakantaai aei!”
I kona n ataia bwa e kukurei Tamau, ma bwanaana e tara ni kamimii—n taraakina ae kanga e raraoma.
“Bubura te teeinaine anne?” I titiraki, ni mimii ngkana I rangin kan ataa te kaeka.
E mabu Tamau n te tai anne. “Iaon riki uoua te bwauna [0.9 kirokuraem],” e taku. Ngkai e a bwanaa raoi n raraoma. E riai ni bungiaki Nora n tain te Kiritimati, ma ngkai bon Tebemtembwa. “E bingingi, e raoiroi,” E reitia Tamau. “Uringnga n tataro ibukia, Levi. Ao tataro naba ibukira bwa ti aonga n onimakinna bwa te Tama are i Karawa e atai bwaai aika tamaroa ibukin ara utu.”
Imwiin katukan te tareboon, I nako n te umwanikuuka ao n tabeka te baeki ni biin are e iangoia Tinau bwa e na tubunna. E taekinaki n te bakete bwa rawatana e kuri n titebo ma rawatan Nora n te tai aei. I taua inanon baiu, ni kataia n iangoaia bwa tera aekakin tiaaitin te ataei ae aron aei.
“Tamneina e tiku iroun te Tama are i Karawa,” I iangoa, uringakin te bwai are I reiakinna ibukin te maiu are imwaain aei ao te babaire ni kamaiu. I ataia bwa e ngae ngkana e mate Nora, ti na manga bon nooria ibukina bwa ti kabaeaki ni kabane n aron te utu. Ma I kantaninga naba bwa e na tiku irakira ikai iaon te aba.
Tabeua namwakaina imwiina, angin te tai a mena Tinau ma Tamau n te onaoraki. Tibu te unaine ma Tibu te unimwaane a roko ni buokai n ara auti n tararuaai ma tariu ma mwaaneu aika a uarereke. Te uoote e karaoa ana aki mamatam ao n tataro ibukin ara utu, ao aine man te Bootaki n Aine a nikiri ara katairiki n taai tabetai. Aomata ni kabane a kan ataia bwa e uara Nora.
Te tairiki teuana, Tinau ma Tamau a weteira ni kabane nakon te ruu ni katangaina. A tuangiira bwa Tamau e na nako ma bitiobi ni kakabwaia Nora. Imwiin nakon Tamau ma oneana te tiute ao te neketai, e a ikotiira ni kabane Tinau man katobibia te kaintekateka ao n tataro.
“Taiaoka kakabwaia Tamau ngkai e angan Nora ana kakabwaia man te nakoanibonga,” E tataro Tinau. E aamarau bwanaana. “Ao taiaoka, ngkana bon Am kantaninga, kariaia bwa e na okira te mweenga ma te marurung.”
Ngkai ti tataro, I kona n namakina te Tamnei ae Raoiroi ae kaona nanon te ruu ma te rau ao te tangira. Titebo ngke e tuangai te Tama are i Karawa ae, e aki kakawaki bwa terana ae riki, bon mwakoron ni kabane Ana babaire.
Rimwii n te tairiki anne, E oki Tamau nakon te mweenga ao n tuangiira bwa iai te bwai ae kamimii ae e riki n te onaoraki. Ana ruu Nora n taainako e karongoa mani beroro. A rawata mitiin ao monita ma beeroia ao tauraia ae kiakia, ao neeti ma taokita a ririaki n taainako ni buokiia ataei aika a bingingii ake a mena ikekei. Ma ngke a roko Tamau ma te bitiobi, a kaokoro bwaai ni kabane. Ni kabane taian mitiin a boni mabu. Neeti ake a tekateka irarikiia ataei aika a tibwa bungiaki, a wareware ke ni matakuakiniia. Tamau ma te bitiobi a kona ni kakabwaia Nora n akean te kaberoro.
I aki ataia ngkana e kona n ikawairake ikai Nora iaon te aba ke n oki ni maeka rimwi ma te Tama are i Karawa. Ma I ataia bwa te Tama are i Karawa e ongo ao e kaekai ara tataro, ao I namakina te rau ngkana I uringnga ae iai Ana babaire ibukiia ni kabane kaain au utu.
Kamataata iroun Ben Simonsen