ʻI he Ongoongó
ʻOku Tokoni Hono Fakaleleiʻi e Ngaahi Mape ʻa e Siasí ke ʻIlo ʻe he Kāingalotú e Ngaahi Feituʻu ʻOku Tuʻu Ai e ʻApi Siasí
Kuo ʻi ai ha liliu foʻou ki he polokalama ʻo e Ngaahi Mape ʻa e Siasí, ʻoku lahi ai ha ngaahi meʻa foʻou, kau ai ha meʻa te ne hanga ʻo fakaleleiʻi ʻa hono kumi ha kau mēmipa ʻo ha siteiki, ngaahi falelotu, temipale mo e ngaahi fale kehe ʻo e Siasí.
Ke lava ʻo hū ki he LDS Maps foʻoú, hū ki he LDS.org > Tools > Maps. ʻOku lava ke maʻu atu ia ʻi ha ngaahi lea fakafonua ʻe 16—faka-Siaina, Seki, Tenimaʻake, Hōlani, Pilitānia, Finilani, Falanisē, Siamane, ʻĪtali, Siapani, Kōlea, Noaue, Potukali, Lūsia, Sipeini, mo e faka-Suēteni.
ʻOku kau ʻi he niʻihi ʻo e ngaahi meʻa foʻou ko ʻení hono fakapapauʻi ʻo e ngaahi ʻapí, ngaahi meʻa ke fili mei ai he founga hono fakaʻaliʻali ha mapé, lelei ange e tokoni ʻa e iPad mo e tablet, ngaahi mape ʻoku hā ai e ngataʻanga ʻo e ʻiunití, Locate Me, pea mo ha ngaahi founga paaki kuo fakaleleiʻi.
ʻOku lava ke maʻu ʻe he niʻihi fakafoʻituitui ʻoku nau ngāue ʻaki ʻa e liliu foʻou ko ʻení ʻa e ngaahi feituʻu faiʻanga lotu ʻo e Siasí, mamata ki he ngaahi fakahinohino hala ke fakaʻuli aí pea paaki kinautolu, pea fevahevaheʻaki e ngaahi fakafehokotaki ʻo e mapé ʻo fou he ngaahi mītia fakasosialé. Pea ko e taimi ʻe hū ʻaki ai ha LDS Account, ʻe lava e kāingalotú ʻo mamata ki he ngaahi fakamatala fakauooti mo fakasiteiki ʻoku fekauʻaki tonu mo kinautolú pea mo e ʻēlia ʻoku nau nofo aí.
Fakaafeʻi e Kāingalotú ke ʻOmi ha Ngaahi Tā ʻo e Konifelenisi Lahí ki he Makasiní
ʻOku kole atu ʻa e makasini Liahoná mo e Ensign ki he kāingalotú ke nau kau mai ki he konifelenisi lahi hokó, mo e ngaahi konifelenisi lahi ʻe hoko maí, ʻaki hono ʻomi ha ngaahi tā ʻoku fekauʻaki mo e konifelenisí mei honau ngaahi feituʻu fakalotofonuá ʻi he hili pē ʻa e konifelenisí. ʻE fakakaukauʻi hono fakakau e ngaahi tā ko ʻení ʻi hono paaki ʻo e ngaahi fakamatala ʻo e makasini ʻo Mē mo Nōvemá.
ʻOku lava ke ʻomi vave mo faingofua ʻe he kāingalotú ʻenau ngaahi taá ʻi he LDS.org ʻaki ʻenau ʻalu ki he Menu > Magazines (pe taipeʻi e lds.org/magazine), pea toki lomiʻi ʻi he Submit Your Material ʻi he kōlomu toʻomataʻú ʻi he fuofua peesi ʻo e makasiní ʻi he uepi saití.
ʻOku ʻi he ngaahi peesi foki ʻo e Liahoná mo e Ensign ʻa e ngaahi konga ʻoku ui ko e “Kole ke ʻOmi ha Fakamatalá” ʻa ia ʻe lava ai ke maʻu ʻe he kāingalotú ʻi he ʻInitanetí e ngaahi foomu ke ʻomi ʻaki ʻenau ngaahi taá.
ʻOku totonu ke toe vakaiʻi ʻe he kāingalotú ʻa e Ngaahi Fakahinohino ki Hono Fakaʻaongaʻi ʻo e Ngaahi ʻAtá kimuʻa pea toki ʻomai ʻenau ʻatá. Ko e ngaahi fakahinohino ʻoku ʻi he “Ngaahi Tā ʻo e Konifelenisi Lahí” ʻokú ne fakamahinoʻi ʻa e anga hono fokotuʻutuʻu ʻo e taá, tuʻunga leleí, mo e meʻa ʻoku fie maʻu ʻe he kau ʻētita ʻo e makasiní, ʻpea pehē ki he taimi ʻe ngata ai hono ʻomi e tā fakakonifelenisí.
Tuku Atu ‘a e Polokalama Tablet maʻá e Liahoná
Kuo tuku atu ʻe he Siasí ha tatau foʻou ʻo e polokalama tablet ʻoku ʻasi ai ʻa e fakahokohoko ʻo e makasiní. ʻOku kau ʻi he polokalama fakakomipiuta ʻa e Liahona ʻa e Siasí ʻa e pulusinga ʻo e makasini ʻo ʻOkatopa 2011, Nōvema 2011, mo Mē 2012—ʻi hono fakalea ʻe tahá, ko e pulusinga ʻo e Tohi ʻa Molomoná, pea mo e ongo pulusinga ʻo e ongo konifelenisi lahi fakamuimuitahá.
ʻOku lava ke maʻu atu ʻa e Liahona ʻa e Siasí ʻi he lea faka-Pilitāniá, Potukali, mo faka-Sipeiní mo fokotuʻu atu ha fengāueʻaki lahi ange—mo kau kakato ange—ki he aʻusia mei he makasiní; hangē ko ʻení, ʻe lava ʻehe niʻihi ʻoku fakaʻaongaʻi ʻení ʻo laukonga ʻi he makasiní lolotonga iá ʻoku nau fanongo ki he fakamatala tatau mei he faile ʻo e ongó. ʻOku fokotuʻutuʻu ʻa e polokalama fakakomipiutá ke fakaʻaongaʻi ʻe he Android pe Apple platforms.
ʻOku kau ʻi he niʻihi ʻo e ngaahi meʻa foʻou ko ʻeni ʻoku tuku atú ʻa hono fakapapauʻi ʻo e ngaahi ʻapí, ngaahi meʻa ke fili mei ai he founga hono fakaʻaliʻali ha mapé, lelei ange e tokoni ʻa e iPad mo e tablet, ngaahi mape ʻoku hā ai e ngataʻanga ʻo e ʻiunití, Locate Me, pea mo ha ngaahi founga paaki kuo fakaleleiʻi.