Naʻá ne ʻOmi e Melinó Kiate Au
Kāsoni Haueli, ʻIutā, USA
Ne ako ngāue ʻa hoku tuongaʻane ko Paletí ko ha taha e kau pule he tafaʻaki ʻa e tautahí ki he tānaki fakamatalá ʻi he US Pentagon he taimi ne hoko ai e ʻohofi he ʻaho 11 ʻo Sepitema 2001. Ne u ngāue he taimi ko iá ʻi ʻAitahō ʻi USA, pea ʻi heʻeku sio ongoongo he pongipongí ki he meʻa ne hokó, ne u telefoni ki hoku pulé ʻo poaki te u liʻaki ngāue ʻi ha ngaahi ʻaho.
Ne fakataha hake ha kau mēmipa hoku fāmilí ki Uāsingatoni D.C., ʻi ha loki hulohula he hōtelé ne hanga ʻe he kau ngāue ʻa e puleʻangá ʻo tuku mavahe ko ha loki ke fai ai ha fakamatala, te nau lava ke ʻomi ai ki he ngaahi fāmilí e fakamatala fakamuimuitaha ki he ngaahi ngāue fekumi ʻoku faí. Ne mau tali he ʻaho ki he ʻaho ke ʻilo pe naʻe kau ʻa Paleti he niʻihi ne maté. ʻI he tūkunga ko iá ne ʻi ai e ongo fakamamahi mo e ʻamanaki tōnoa he ʻikai lava ke feau. Ka naʻe fakatahataha homau fāmilí ʻo lotu ke ʻoua naʻa mole ʻemau tuí, ʻo tatau ai pē ko e hā e meʻa ʻe hokó.
ʻI he ʻaho 17 ʻo Sepitemá ko ha meimei ʻosi ia ha uike ʻe taha mei he ʻohofí, ne fakapapauʻi mai kiate kimautolu kuo mālōlō ʻa Paleti.
Ne ʻikai pē te u ʻilo te u teitei fai e fehuʻi, “Ko e hā ʻoku hoko ai ʻeni kiate aú?” Ka naʻá ku ʻeke, “Ko e hā ʻoku hoko ai ʻeni kiate iá?” Talu mei heʻeku kei siʻi, mo ʻeku ʻofa, tanganeʻia, mo loto ke hangē ko Paletí. Naʻá ku toe fakakaukau, “Ko e hā ʻoku hoko ai he taimi ní?” Ne palani ʻa Paleti ʻi ha ngaahi uike lahi ke ʻalu ki ʻAitahō ke nofo mo e fāmilí. Naʻe fakataimitēpileʻi ke haʻu he Tuʻapulelulu, ko e ʻaho 13 ʻo Sepitemá, ko e hili ia ha ʻaho ʻe ua mei heʻene maté.
Ne u fakaava hake ʻeku ʻakauni ʻī-meili fakangāue he ʻuluaki efiafi ne u foki ai ki he ngāué hili ʻeku foki ki ʻAitahoó, he naʻe teʻeki ke u fai ia talu mei heʻaho 10 ʻo Sepitemá. Ne ʻi ai ha pōpoaki ai meia Paleti. Naʻá ne ʻomi ia he pongipongi Tūsité, kimuʻa pea toki fai e ʻohofí. Naʻá ne fakahā mai ai ʻene teuteu ke ma toe feʻiloakí mo e ngaaahi meʻa fakafiefia kotoa ne ma palani ke faí. ʻI heʻene tatau maí, naʻá ne tohiʻi mai pē, “Melino.”
Naʻe ʻikai ko e founga angamaheni ia ne faʻa fakaʻosi ʻaki e ngaahi ʻī-meili ʻa Paletí, ka ne u lau e meʻa naʻá ne faí ko ha ʻaloʻofa ongongofua ia ʻa e ʻEikí. ʻOku ou tui naʻe ʻikai ke ʻilo ʻe Paleti ia e meʻa ʻe hokó, ka ʻoku ou saiʻia heʻene lea tukú—ko ʻene lea tuku—kiate aú ko e melino.
Kuo laka hake ʻeni he taʻu ʻe hongofulu, ka ʻoku ou toutou lau pē ʻa e ʻī-meili ko iá. ʻOku fakamanatu maʻu pē kiate au he taimi ʻoku ou lau ai iá, te tau lava ʻi he ongoongoleleí ke maʻu e nonga naʻe talaʻofa mai ʻe he Fakamoʻuí: “ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolu: ʻoku ʻikai hange ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia” (Sione 14:27).
ʻOku ou kei ongoʻi pē e mole ʻa Paletí, ka kuo ʻikai ke mole ʻeku tuí ʻi he faingataʻá ni, koeʻuhí ko e ongoongoleleí. Kuó u lava ke laka kimuʻa ʻaki e ʻamanaki leleí mo e melinó ʻi he tokoni ʻa e Fakamoʻuí.