Ne Maʻu ʻEku Talí mei he Konifelenisí
Sela Mekinuseni Foatesi, Sao Paulo, Palāsila
Ne u toʻo ha kalasi ako ki he faʻahinga ʻo e tangatá (anthropology) he 2006 ʻi ha kolisi ʻa e Katoliká. Ne vahe mai ʻe heʻemau faiakó ke mau fai ha fakatotolo kau ki ha tui fakalotu pau pea fakamatalaʻi ia ki he toenga ʻo e kalasí. Ne u fili ke fai ʻeku fakamatalá ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—koeʻuhí he ko e taʻu ʻeni ʻe 21 ʻeku hoko ko ha mēmipá. Ne u ʻiloʻi ko ha faingamālie makehe mo fakaofo ia ke vahevahe ki hoku kaungāakó mo e kaungāmeʻa ʻe toko 40 e meʻa ne u tui ki aí.
Ne u fiu feinga he māhina ʻe ua ne teuteu ai ʻeku leá, ke maʻu ha founga faingofua ke fakahaaʻi ai e ngaahi tokāteline ʻoku ou mahuʻinga aí ke mahino lelei ki hoku kaungāakó. Ne ʻikai ke u fakapapauʻi pe ko e hā e ngaahi meʻa ʻoku totonu ke u faí pe founga ʻoku totonu ke fakahoko iá. ʻI he toe e uike ʻe taha pea fai ʻeku leá, ne ʻikai pē ke u ʻilo e meʻa ke faí. ʻI heʻeku hohaʻá, ne u lotu ʻo kole tokoni ki he ʻEikí.
Ne maʻu ʻeku talí mei he konifelenisi lahí, ʻa ia naʻe fai he fakaʻosinga ʻo e uike ko iá. Naʻe fai ʻe Palesiteni Sēmisi E. Fausi (1920–2007), Tokoni Ua ʻi he Kau Palesitenisī ʻUluakí, ʻi he konifelenisi ʻo ʻEpeleli 2006 ha lea ne ui ko e “Ko Hono Toe Fakafoki Mai ʻo e Meʻa Kotoa pē.”1 Ne u ongoʻi hono fakapapauʻi mai ʻe he Laumālie Māʻoniʻoní ko e ngaahi moʻoni ʻoku vahevahe ʻe Palesiteni Fausí—mo e founga naʻá ne vahevahe ai kinautolú—ko e sīpinga ia ke u muimui ki ai ʻi hono fai ʻeku leá.
Ne u hiki ha tatau ʻo e leá mei he ʻInitanetí hili ʻa e konifelenisí pea fakaʻaongaʻi ia ke fakatefito mei ai e meʻa ne teuteu ke fakaʻaliʻali ʻi heʻeku leá, ʻe fakahoko he uike kahaʻú. Ne ʻomi kiate au ha miniti ʻe 20, ka koeʻuhí ko e ngaahi fehuʻi kotoa ne fai heʻeku faiakó mo e kaungāakó ne miniti ai ʻe 40 ʻeku leá—ʻa ia ko e kakato ia ʻa e taimi kalasí.
Ne fakahā mai heʻemau faiakó hili ʻeku leá, ne teʻeki ai ha taha heʻene fānauakó kuó ne fai ha lea lelei pehē. Naʻá ne ʻomai haku maaka maʻolunga mo talamai ko e ʻuhinga pē naʻe ʻikai ke ne ʻomi ai e maaka haohaoá heʻeku leá he naʻá ku fuʻu taukapoʻi fakamātoato e kaveingá.
Ne u vahevahe kimui mo e faiakó ʻa e peesi ʻinitaneti ʻo e Liahoná, te ne maʻu ai e lea ʻa Palesiteni Fausí mo e ngaahi lea kehe ʻe lava ke tokoni. Ne u toe ʻoange kiate ia ha tatau ʻo e Tohi ʻa Molomoná mo kole ke ne lau ia, pea fakaafeʻi ia ke ma toe talanoa ki ai hili ʻene lau iá.
Naʻá ku houngaʻia ʻi heʻeku ʻilo ne toe tākiekina ha niʻihi ʻo e fānauakó ʻe he leá. Ne u fakamoʻoniʻi e meʻa makehe naʻá ne fai ki heʻenau moʻuí he toenga ʻo e taʻú. Ne ʻi ai ha taha naʻá ne tali e kau faifekaú ki honau ʻapí, ʻo ʻomi ai kiate kimaua ha faingamālie lahi ke hokohoko atu ʻema talanoa kau ki he ongoongolelei ʻo Sīsū Kalaisí.
ʻOku hounga kiate au e faingamālie ke u vahevahe ai ʻeku tuí ki hoku kaungāakó. Kae mahuʻinga angé, ko ʻeku houngaʻia ke ʻilo ʻoku tali ʻe he ʻEikí ʻetau lotu fakamātoató ʻo fakafou mai he lea ʻa e kau palōfitá mo e kau ʻaposetolo ʻo onopōní.