Faapotopoto i se Lotogatasi o le Faatuatua
O nofoaga autu mo le autalavou matutua e ofoina atu ai ni avanoa mo le aoaoina o le talalelei, gaoioiga faafiafia, galuega faafaifeautalai, ma taumafaiga e toe faatoaaga mai ai.
O Barbara Matovu mai Uganda. Sam Basnet mai Nepal. Ma Elisabeth Olsen mai Nouei. O ni tagata eseese e toatolu, i atunuu eseese e toatolu. Ae o Barbara, Sam, ma Elisabeth na faapotopoto uma i se nofoaga e tasi, o le nofoaga autu mo le autalavou matutua i Oslo, Nouei, i lalo o le upumoni e tasi: o le talalelei toefuataiina a Iesu Keriso.
O le toatolu lenei sa auai i le Ekalesia i Olso, na mauaina lesona a faifeautalai i le nofoaga autu mo le autalavou matutua. O fale e pei o le fale i Oslo ua faapaiaina e saunia ai se nofoaga e fegalegaleai ai i gaoioiga, aoao i vasega inisitituti, fiafia i le maua ai o komepiuta ma le Initoneti, suesue mo le aoga, ma faapena foi ona kuka ai taumafataga o le afiafi.
O Barbara sa siitia mai Uganda i Nouei i le 1998, a o iva ona tausaga. O le sefulu tausaga mulimuli ane, a o nofo ai i Oslo, sa valaaulia ai o ia e ni faifeautalai se toalua e aoao e uiga i le talalelei toefuataiina, ma tau atu ia te ia e mafai ona latou feiloai i le nofoaga autu mo le autalavou matutua. Sa matuai le talitonu ia Barbara.
“Sa ou faapea ifo ia te au lava, ‘Ia o se isi lava foi nofoaga mo le autalavou,’” na ia tautino ai. “E tele ni nofoaga faapena sa ou alu i ai muamua, ae o le mea moni ou te le’i lagonaina ai le lagolelei i se tasi o na nofoaga,”
Ae o le nofoaga autu lenei sa mautinoa lava le ese. “Sa matuai faateia lou mafaufau ina ua ou tuvae i totonu o le faitotoa,” na manatua ai e Barbara. “Sa ou tutulalai mo se taimi, ma taumafai ia ou iloa po o le a lea lagona na ou maua. Sa ou lagonaina le mafanafana ma le alofa. Sa ou lagonaina le mautinoa sa ou i ai i le nofoaga sa’o, ma tagata sa’o, mo le mafuaaga sa’o.”
Faapotopoto Atu i Nofoaga Autu mo le Autalavou Matutua
O le taulamua ina ia fausia ni nofoaga autu mo le autalavou matutua sa amatalia i le 2003. Sa faalautele atu nofoaga autu ia oo atu i inisitituti e ala i le ofoina atu o mea e tele nai lo na o vasega o aoaoga faalelotu; e maua ai foi e le autalavou nofofua matutua ni avanoa e auauna atu ai i se aufono o gaoioiga a le nofoaga autu, galulue ma faifeautalai faamisiona e fesoasoani e aoao ma faamalosi i a latou tupulaga, ma fegalegaleai ai ma ulugalii matutua o e o loo faagaoioia le faatinoga atoa. O taitai perisitua i le lotoifale, i lalo o le taitaiga a Fitugafulu Eria, e iloiloina le faia o nofoaga autu i o latou lava eria.
O nofoaga autu muamua lava e 4 sa i Copenhagen, Tenimaka, ma i Perelini, Hamburg, ma Leipzig, Siamani. O na uluai nofoaga autu e 4 ua faateleina i le 141 i le 2011, i nofoaga eseese e pei o Suetena ma Cyprus. E tele isi nofoaga autu ua i ai i tulaga eseese o le atinaega i isi vaega o le lalolagi, e aofia ai le Iunaite Setete ma Aferika.
O Gerald ma Nancy Sorensen sa galulue i le nofoaga autu mo le autalavou matutua i Trondheim, Nouei. O iina sa la feiloai ai i talavou matutua mai atunuu eseese o le kelope, e aofia ai Afakanisitani, Saina, Ghana, Airani, Iraki, Mozambique, ma Netherlands, Nigeria, Rusia, Take, ma Iukureini.
“Sa tele ni gagana, aganuu, ma siosiomaga faaleaoaoga ma faalelotu,” o le faamatalaga lea a Brother Sorensen, “ae o nei tagata talavou matutua uma sa i ai se sootaga e tasi o le fia iloa atili e uiga i lo latou Tama Faalelagi ma Lona Alo, o Iesu Keriso. A o matou masani ia i latou ma o latou miti ma luitau patino, sa faigofie ona vaavaai atu ia i latou taitoatasi o se atalii/afafine o le Atua. Sa faigofie ona iloa sa tali le Atua ia latou tatalo ma taialaina o latou ala, ma faaalia Lona alofa tele mo i latou.”
E lagona e Peresitene Armand Johansem o le Misiona a Nouei Oslo, e taitaiina atu le autalavou matutua i le nofoaga autu mo se faamoemoega, e aofia ai le aoaoina faamasani mo tiutetauave i le lumanai, “O le Ekalesia i Nouei o le a faateleina pea le eseese,” o lana saunoaga lea. “E fesoasoani ia nofoaga autu i le autalavou matutua e iloa le ala e taulima ai lena mea, ia iloa le taua o le Ekalesia o le elemene masani e fesootai ai aganuu ma tagata uma,” o le saunoaga lea a Peresitene Johansen, “Ou te vaai atu i nofoaga autu o ni sootaga maoae, nofoaga e te maua i ai le maualalo o pa pupuni o fegalegaleaiga ma le faailoga tagata.
O Le Tasi ia Keriso
E manatua e Barbara Matovu le taimi muamua na aumai ai o ia e faifeautalai i le nofoaga autu mo se gaoioiga e feiloai ai i isi talavou nofofua matutua. Sa faapea o ia ua ia iloaina le mea o le a vaaia ai.
“I lo’u olaga atoa, sa i ai lava se vaega sa ou auai,” o le tala lea a Barbara. “Ma o vaega sa faailogaina i taimi uma i se mea—o oe o le vaega e fiafia e taaalo po o le vaega mai atunuu i fafo, po o nisi lava vaega. O lea, ina ua amata ona gasolosolo mai tagata i le nofoaga autu, sa ese lava ona sa foliga mai sa leai se tasi na i ai se uiga e faapea ‘O a’u ou te i ai i le vaega lauiloa, e le mafai la ona ou talanoa atu ia te oe.’
“O le taimi muamua, sa ou faapea, ‘Pe o faafoliga ea le vaega lea? Pe o se faaaliga?” Ae ina ua mavae sina taimi, sa ou iloaina ai o le mea moni e le afaina po o ai oe, po o fea e te sau ai, pe o le a le gagana tatou te tautatala ai. O le alofa o lo tatou Tama Faalelagi e mo tagata uma. E masani lava ona tau umi se taimi e sue ai la’u vaega, ae o le taimi lenei, sa ou lagonaina lo’u le manaomia o se vaega. O a’u lava o Barbara, ma o a’u lava o Barbara i tagata uma.”
Fai mai Elisabeth Olsen e lagona lona faamaulalo i le vaaia o lona nofoaga i lona aiga faalelagi. “A e feiloai i tagata e mai se aganuu po o se faalapotopotoga ese, e faigofie lava ona faailoga i latou. Ua ou aoao e vaai faalelei ou mata ma vaai atu i tagata e ala i fofoga o Keriso,” o lana tala lea. “I le nofoaga autu e tofu i matou uma ma aganuu eseese, ae e tasi le mea ua laugatasia ai i matou uma: matou te mananao e toe faatasi ma Iesu Keiso ma le Atua.”
Avea ma e Tasi ae Le Tutusa
Atonu ua masalo nisi i le manatu e uiga i le lotogatasi aua latou te manatu e ao ona oo mai i le tau o le ositaulagaina o le olaga o le tagata lava ia. “E toatele tagata e fefefe i mea tau lotu, ona latou te manatu e tutusa uma ai i tatou, aua e tutusa lava poloaiga tatou te ola ai,” o le tala lea a Elisabeth. “Peitai e le faapena. Na fai i tatou e le Atua o ni tagata taitoatasi. E mafai ona tutusa o tatou talitonuga, ae eseese o tatou amioga ma meaalofa, ma o le mea lena e avea ai i tatou ma ni tagata taitoatasi. E finagalo le Atua ia tatou eseese uma lava aua e eseese uma foi a tatou misiona.”
Sa taulimaina foi e Sam Basnet ni atugaluga mai ni uo o e sa talitonu o tulafono faalelotu o ni taofiofiga. “Sa fai mai se tasi o uo ia te au, ‘Afai e te alu i le Lotu, e tatau ona e mulimuli i tulafono a isi,’” o lana tala mai lea. Ae e mulimuli Sam i tulaga faatonuina a le Ekalesia aua ua ia sailia ma le agaga tatalo ia faaaliga faaletagata lava ia e faamautuina ai ana mea e fai.
Ma e ala mai i le talanoa taitoatasi mai i Lana fanau, e faapena ona tasi ai le Atua ma i latou, o le faamalamalama mai lea a Sam. “Na fetalai le Atua o atunuu uma ma gagana uma o le a tapuai ia te Ia” (tagai i le Mosaea 27:31), o lana tala lea. “O le feiloai i tagata eseese, ua ou iloa ai ona talisapaia aganuu eseese. Ae o le iloaina o lena eseesega ou te lagona ai foi, ioe, o loo i ai i le Atua se fuafuaga sili e faatasia ai i tatou i le filemu.”
Taunuu atu i le Nofoaga Sili e Faapotopoto Ai
E ui lava ina talisapaia e nei talavou matutua le mana o le faapotopoto atu i se nofoaga autu mo le autalavou matutua, ua malamalama nei taitai o le lumanai o le Ekalesia, ua na o le amataga lea. E pei ona aoao mai Elder David A. Bednar o le Korama a Aposetolo e Toasefululua, o le tasi o nofoaga e sili ona taua e faapotopoto ai o le malumalu.1
Ua sauni Sam e ulu atu i le maota o le Alii e ala i le siomia o ia lava i uo lelei i le nofoaga autu. “O le faamasani atu i tagata mai le tele o atunuu eseese, ua fesoasoani ia te au e maua ai lagona lelei e uiga i le lalolagi,” o lana tala lea. “Ou te fia avea ma se faataitaiga lelei i a’u uo, ma o lenei mea ua ou saunia atili ai mo le Atua ma saunia atili ai e ulu atu i Lona malumalu.”
E tasi le masina talu ona uma ona papatiso, ae amata ona mafaufau Barbara e uiga i le auai atu i le malumalu a o i ai o ia i se lesona o le afiafi faaleaiga i le nofoaga autu. Ina ua uma le lesona, sa amata ona ia tuufesilisili.
“O le i ai o ni uo e malamalama i le uiga o le malumalu ia i latou sa fesoasoani ou te malamalama ai i le uiga o le malumalu mo a’u. A o latou faamalamalama mai ia te au e uiga i le malumalu, sa ou lagona le Agaga Paia,” o le faamatalaga lea a Barbara. “Sa ou iloaina o nofoaga uma sa ou mafaufau ou te faaipoipo ai—o se falesa manaia po o se matafaga—e le mafai ona faatusalia i le malumalu. Mai lava i lena taimi, sa le toe avea ai le malumalu ma na o se isi lava fale. O se mea sa ou manao e tepa taulai i ai ma o se nofoaga e i ai se aso ou te ulu i ai ma so’u toalua i le lumanai.”
Ua faaaofia foi e Elisabeth le malumalu ma se tasi o ana sini e sili ona taua. “Soo se taimi lava e mafai ona ou malaga atu ai i se malumalu, ou te ataata e pei lava ua ou manumalo i se miliona talā,” o lana tala lea. “Ou te iloa e finagalo le Atua ia o atu tagata uma iina ma maua faamanuiaga uma ma meaalofa ua Ia teuina mo i tatou. O le alu i le malumalu ma le agavaa mo le malumalu o le manuia moni lea. E mafai ona ou ulu atu i le malumalu ma avea ma se e sili ona latalata atu i le Atua—ma se e sili ona latalata atu i le aiga—i le mafai ona ou faia ai i lenei lalolagi.”
O le malo selesitila o le, e mautinoa lava, o le nofoaga sili lea e faapotopoto ai, o le nofoaga e le manao Barbara e i ai se nofoa e avanoa. “Na fetalai Keriso e na o Ia lava e mafai ona tatou o atu ai i le Tama Faalelagi, ae ua Ia fetalai mai foi, o le tasi o mea e sili ona tele e mafai ona tatou faia i lenei olaga o le auauna o le tasi i le isi [tagai i le Ioane 21:15–17]. Ma o le auauna atu o le tasi i le isi o le fesoasoani lea i se tagata e sau i le aiga i le Tama Faalelagi, aua e te le manao e te alu na o oe.”
Luga, mai le pito i luga: Barbara Matovu, Sam Basnet, Elisabeth Olsen.
E maua e le autalavou matutua ni avanoa e auauna atu ai i se aufono o gaoioiga a le nofoaga autu, galulue ma faifeautalai faamisiona e fesoasoani e aoao ma faamalosi o latou tupulaga, ma fegalegaleai ma ulugalii matutua.
O uluai nofoaga autu e 4 mo le autalavou matutua ua faateleina i le 141, ma le tele ua fuafuaina mo isi vaega o le lalolagi.
Taumatau ma le itulau e sosoo ai: ata pue na saunia e Simon Jones (Coventry, Egelani); Jerry Garns (San Diego, Kalefonia, ISA); Henrik Als (Copenhagen, Tenimaka); Glenda Stonehocker (Soweto, Aferika i Saute)