Autalavou
Faafetai i Lo’u Faiaoga o le Aoga Sa
O la’u vasega i le Aoga Sa e le o taimi uma e faaaloalo ai. Ese lo’u fiafia e faalogologo i le lesona i vaiaso uma lava, ae o isi taimi e foliga ai e pei e le fia faalogo isi tagata o la’u vasega. E masani ona talanoa le tasi i le isi pe taaalo i taaloga faaeletonika a o taumafai le matou faiaoga e aoao i matou. O le mea e faanoanoa ai, o isi taimi e avea ai a’u ma se vaega o le faafitauli.
I se tasi vaiaso sa sili atu lo matou ulavavale nai lo le mea sa masani ai, ma na oo ane i le faaiuga o le vasega, na toetoe lava a tagi lo matou faiaoga, ona sa leai ma se isi na faalogo i lana lesona. A o matou savavali ese mai le potuaoga, sa ou lagona le faanoanoa mo ia.
O le Aso Sa na sosoo ai, sa faamatala mai ai e le matou faiaoga sa tele ina tatalo o ia i lena vaiaso, e saili mo le taitaiga, ma sa oo atu se manatu ia te ia e tatau ona ia faaalia se ata Lotu ia i matou. Sa ia amataina le ata, lea sa faatatau i le soifuaga o Iesu Keriso ma vavega sa Ia faia.
A o ou mafaufau i le ata i lena afiafi, sa ese se mea sa ou lagonaina. Sa faafuasei ona ou iloaina sa ou lagonaina le Agaga, sa sili atu nai lo se isi lava taimi ua tea. O le taimi lava lena sa ou filifili ai sa ou manao e fai ni suiga i lo’u olaga ina ia [ou] avea atili ai e pei o le Faaola, ma sa ou iloaina o le aafiaga i le Aoga Sa i lena aso, sa matuai faamalosia ai la’u molimau. Ou te faafetai lava i lo’u faiaoga o le Aoga Sa ma mea uma sa ia faia mo le matou vasega i vaiaso uma.