Savali a Faiaoga Asiasi
Faiaoga Asiasi—o se Tofiga Paia
Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua, Aiga, Toomaga
I le avea ai ma faiaoga asiasi, ua i ai sa tatou misiona taua faaleagaga e faataunuu. “O le epikopo o le leoleo mamoe faauuina o le uarota, e le mafai ona ia vaavaaia uma ia mamoe a le Alii i le taimi e tasi. E faalagolago o ia i faiaoga asiasi musuia e fesoasoani ia te ia.”1 O le sailia ma le mauaina o faaaliga i le po o ai e tatau ona tofia e vaavaaia ia uso taitasi e taua naua.
O musumusuga e amatalia a o talanoaina ma le agaga tatalo e sui o le au peresitene o le Aualofa ia manaoga o tagata taitoatasi ma aiga. Ona, faatasi ai ma le faamaoniga a le epikopo, e tuuina atu e le au peresitene o le Aualofa le tofiga i se auala e fesoasoani ai i uso ia malamalama o faiaoga asiasi o se tiutetauave taua faaleagaga.2
O faiaoga asiasi e faamaoni lo latou iloa ma le alolofa i uso taitasi, fesoasoani ia te ia e faamalosia lona faatuatua, ma tuuina atu i ai le auaunaga pe a manaomia. Latou te sailia le uunaiga faaletagata lava ia, ia iloa pe faapefea ona tali atu i manaoga faaleagaga ma le faaletino o uso taitasi latou te asia.3
“E avea faiaoga asiasi ma se galuega a le Alii pe a tuu atu la tatou tulimataiga i tagata ae le o pasene. O le mea moni, e le uma lava faiaoga asiasi. E mafuli i se ala e ola ai nai lo se feau.”4
Mai Tusitusiga Paia
Mai lo Tatou Talafaasolopito
Sa aoao mai e Eliza R. Snow, le peresitene aoao lona lua o le Aualofa, “Ou te manatu o le tofi o se faiaoga o se tofi e maualuga ma paia.” Sa ia fautuaina faiaoga asiasi “ina ia faatumulia i le Agaga o le Atua, o le poto, o le lotomaulalo, o le alofa” a o lei asiasi atu i aiga ina ia mafai ona latou iloa ma taulimaina manaoga faaleagaga faapea foi ma manaoga faaletino. Sa saunoa o ia, “Atonu e te lagona e tautala atu i upu o le filemu ma le mafanafana, ma afai e te maua se uso o maalili, ia e aveina o ia i lou loto e faapei ona e opoina o se tamaitiiti i lou fatafata ma faamafanafana [ia te ia].”5
A o tatou agai i luma i le faatuatua e pei ona sa faia e uso o le Aualofa i aso anamua, o le a tatou maua le Agaga Paia e faatasi ma i tatou ma ia musuia ia iloa ai auala e fesoasoani atu ai i uso taitoatasi tatou te asia. “Tuu atu ia i [tatou] e saili le poto ae le o le pule,” na saunoa ai Sister Snow, “ma o le a [tatou] maua ai lea o le mana uma [tatou] te maua ai le poto e faaaogaina ai.”6