Aoaoga mo o Tatou Aso
Ua tatou aoao mai perofeta anamua, o loo aofia i le Tusi a Mamona le tele o “mea faatauvaa ma taua” lea na faasaoina e aoaoina ai i tatou mo o tatou aso (tagai i le 1 Nifae 13:40; 19:3). Ua tuuina mai e nei upu moni le manino ma le malamalama faateleina o le atoaga o le talalelei a Iesu Keriso ma fesoasoani i le au aooga o le Tusi a Mamona ina ia folau atu ai ma le faamoemoe ma le malosi i lu’itau o le olaga. O saunoaga o i lalo, o loo molimau mai ai ia perofeta ma aposetolo o nei ona po e uiga i nei aoaoga taua.
E Silafia e le Alii Mea Tatou te Manaomia
“Ua ou manatua ai afioga a le Alii o loo maua i le tusi a Eteru i le Tusi a Mamona. Na fetalai le Alii, ‘E le mafai ona o atu outou i le isi itu o lenei moana sausau, sei iloga ou te saunia outou ina ia le afaina lava outou i peau o le moana, ma matagi ua uma ona o atu, ma tafega e oo mai’ [Eteru 2:25]. Ou uso e ma tuafafine, ua uma ona Ia saunia i tatou. Afai tatou te gauai atu i Ana afioga, ma ola i poloaiga, o le a faasaoina i tatou i lenei taimi o le tuufau ma le amioleaga—o se taimi e mafai ona faatusatusa i peau ma matagi ma tafega e mafai ai ona faatafuna. Na te silafia mea tatou te manaomia. E alofa o Ia ia te i tatou uma ma o le a Ia faamanuiaina i tatou pe a tatou faia le mea tonu.”
Peresitene Thomas S. Monson, “Tuleiga Faaiu,” Liahona, Nov. 2009, 109.
O Iesu o Le Keriso
“O le Tusi a Mamona o se molimau tusitusia sili ona malosi ua tatou maua, o Iesu o le Keriso. O le a se mea na fai mai ai Nifae o le faavae mo le mauaina o le Agaga Paia? Faatuatua i le Alii o Iesu Keriso. Pe o le faitauina ea o le Tusi a Mamona i lea taimi ma lea taimi o le a faamautinoa mai ai le faatuatua i le Alii o Iesu Keriso? E te le tau popole i ai pe afai e te faitauina ma le totoa le Nifae. Na ia fai mai “o le meaalofa [lenei] … mo i latou uma o e saili o ia ma le maelega.’ O le maelega e mautinoa lava lona uiga o le faisoo. Ma o le uiga moni lava, o le mafaufau loloto ma le tatalo. Ma e mautinoa lava o le tatalo e aofia ai le aioi atu ma le naunautai ina ia iloa le upu moni. Soo se mea lava e itiiti ifo, e le o se maelega. Ma e soo se mea lava e itiiti ifo, o le a lē lava lea mo oe ma a’u.”
Peresitene Henry B. Eyring, Fesoasoani Muamua i le Au Peresitene Sili, “Going Home,” in Brigham Young University 1986–87 Devotional and Fireside Speeches (1987), 77–78.
O Se Folafolaga o le Talalelei
“O elemene autu o le savali o le talalelei o loo maua i tusitusiga paia, ae e sili atu ona manino le aumaiga i le Tusi a Mamona ma i faaaliga i le Perofeta o Iosefa Samita. O loo tautino manino mai ai e Iesu lava Ia Lana aoaoga faavae ma Lana talalelei, lea e tatau ona usitaia e fanau a le Atua ina ia ‘maua ai le olaga faavavau’ (MFF 14:7).”
Peresitene Dieter F. Uchtdorf, Fesoasoani Lua i le Au Peresitene Sili, “E Le Tatau Ea Ona Tatou Olioli?” Liahona, Nov. 2007, 19.
Papatisoga o Tamaiti Laiti
“[E talitonu nisi] o fanau iti na fananau mai i le agasala ma ua oo mai ai i le lalolagi i le agasala. E matua sese lea aoaoga!
“Sa tusia e Mamona, ‘Afai ua ou maua le tonu, sa i ai finauga ia te outou i le papatisoina o tamaiti’ (Moronae 8:5).
“Sa ia ta’ua a latou finauga o ‘mea sese’ ma tusi atu faapea: …
“‘Faalogo mai i upu a Keriso lou Togiola, o lou Alii ma lou Atua. Faauta, ou te lei sau i le lalolagi e valaau i e amiotonu, a o e ua agasala ina ia latou salamo; e le aoga le fomai i e malolo, a o e mama’i; o lenei, ua malolo tamaiti, aua e le mafai ona latou faia agasala; o lea o a’u ua aveeseina ai le faasala a Atamu ia te i latou, e le pule ia te i latou; …
“‘Ua faapea lava ona faaali mai ia te au le afioga a le Atua e le Agaga Paia; o lea, lo’u atalii pele e, ua ou iloa ai ua fai mea paia ma ulaga i luma o le Atua i lo outou papatisoina o tamaiti’ (Moronae 8:7–9). …
“Ia faitau i lana tusi atoa. O se aoaoga faavae moni lava.”
Peresitene Boyd K. Packer, Peresitene o le Korama a Aposetolo e Toasefululua, “Fanau Iti,” Liahona, Ian. 1987, 19.
Lapataiga mai le Tusi a Mamona
“O loo i lesona tatou te aoaoina mai le Tusi a Mamona le faapogai ma aafiaga o taua, ma tulaga e faamaonia ai. O loo ta’u mai ai le leaga ma le matautia o taupulepulega faalilolilo, lea e faia ina ia maua ai le pule ma sue ai mea i tagata. O loo ta’u mai ai e moni e i ai Satani ma faailoa mai ai nisi o auala o loo ia faaaogaina. O loo fautuaina ai i tatou ia faaaogaina ma le faautauta le tamaoaiga. O loo ta’u mai ai upumoni malamalama ma le taua o le talalelei, ma le moni ma le paia o Iesu Keriso ma Lana taulaga togiola mo tagata uma. O loo faailoa mai ai ia i tatou le faapotopotoina o le aiga o Isaraelu i aso amuli. O loo ta’u mai ai ia i tatou ia faamoemoega ma mataupu faavae o le galuega faafaifeautalai. O loo lapataiina ai i tatou mai le faamaualuga, paie, faatuutuu, o le matautia o uputuu sese, taufaasese, ma le ola le mama.
“O lea, o la tatou matafaioi o le suesue lea i le Tusi a Mamona, ma aoao i ona mataupu faavae ma faaaoga ai i o tatou olaga.”
Elder L. Tom Perry o le Korama a Aposetolo e Toasefululua, “O Faamanuiaga e Maua Mai i le Faitauina o le Tusi a Mamona,” Liahona, Nov. 2005, 8.
O Le A Toefuataiina Mai Mea Uma
“O le natura moni ma le lautele o le toetu o loo faamatala auiliili mai i le Tusi a Mamona. Sa aoao mai le perofeta o Amoleka:
“‘E tatalaina foi i le maliu o Keriso noanoaga o lenei oti faaletino, ina ia toe faatutuina mai tagata uma mai le oti faaletino.
“‘E toe faatasia le agaga ma le tino i lona uiga atoatoa; o ivi atoa ma gaugaivi e toe faatuina i le tino e tatau ai, e pei lava ona i ai nei i tatou; …
“‘O lenei, e o’o mai lenei toefuataiina i tagata uma, o e matutua ma e iti, o e noanoatia atoa ma e saoloto, o tane atoa ma fafine, o e amioleaga atoa ma e amiotonu; e leai foi se lauulu e tasi o o latou ulu e le iloa; ae toe faatuina mea uma i le tino e tatau ai e pei ona i ai nei i le tino’ (Alema 11:42–44).
“Sa aoao atu foi e Alema o le toetu ‘e tuuina atu ai mea uma i lo latou tino, e tatau ai ma le atoatoa’ (Alema 40:23). …
“E maeu le toafimalie o se lagona i le iloa lea, o i latou uma sa i ai ni tulaga faaletonu i le olaga … o le a toetutu mai i se ‘tino e tatau ai ma le atoatoa.’”
Elder Dallin H. Oaks o le Korama a Aposetolo e Toasefululua, “Toetu,” Liahona, Iulai 2000, 17.
Matautia o Pulega Faalilolilo
“Ua aoao mai e le Tusi a Mamona o pulega faalilolilo o faiga faasolitulafono e tulai mai ai se luitau matautia, e le gata i tagata taitoatasi ma aiga ae faapea i le lalolagi atoa. O loo i ai i pulega faalilolilo o nei aso ni kegi, o faalapotopotoga ua gaosia fualaau faasaina, ma vaega toatele o tagata latou te faia faiga faasolitulafono. O pulega faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. … O o latou faamoemoega e aofia ai le ‘fasioti tagata, ma le vete, ma le gaoi, ma le faitaaga, ma fai amioleaga eseese uma ua le tusa ai ma tulafono a lo latou nuu, atoa ma tulafono a lo latou Atua’ [Helamana 6:23].
“Afai tatou te le faaeteete, o pulega faalilolilo o ona po nei, e mafai ona vave mauaina le mana ma le faatosinaga e pei lava o le vave ma le mae’ae’a na latou faia i le taimi o le Tusi a Mamona.”
Elder M. Russell Ballard o le Korama a Aposetolo e Toasefululua, “Tutu Atu Mo Le Upumoni ma le Amiotonu,” Liahona, Ian. 1998, 44.
Faaleleia o Luitau o le Olaga
“O loo i le Tusi a Mamona ni savali na tuuina i ai e le Atua e faaali mai ai auala e faasa’o ai aafiaga o tu masani sese, ma le auala e mafai ona maua ai le atoatoa o le ola. Ua aoao mai ai ala e foia ai faalavelave ma lu’i tatou te feagai i ona po nei. … Ua tuuina mai [e le Alii] le ala e faasa’o ai sese ogaoga o le soifuaga, peitai e le aoga lenei taitaiga pe a taofia ai pea i totonu o le tusi e le faitauina.”
Elder Richard G. Scott o le Korama a Aposetolo e Toasefululua, “O Se Uo Moni Na Te Faaeaina,” Liahona, Ian. 1989, 80.
O Se Faamanatu o a Tatou Feagaiga
“Ua faamanatu mai ia te i tatou e le Tusi a Mamona o lo tatou papatisoga o se feagaiga lea ia ‘laulaututu e fai ma molimau a le Atua [ma Lona malo] i aso uma, ma mea uma, atoa ma nuu uma tou te i ai e oo lava i le oti, ina ia togiolaina outou e le Atua, ma faitauina faatasi ma i latou i le uluai toetu, ina ia outou maua le ola faavavau’ (Mosaea 18:9; faaopoopo le faamamafa).”
Elder Robert D. Hales o le Korama a Aposetolo e Toasefululua, “O Le Feagaiga o le Papatisoga: O Le I Ai i le Malo ma ni ō le Malo,” Liahona, Ian. 2001, 7.
O Faamanuiaga o le Usiusitai
“I le tele o vaega i le Tusi a Mamona, na folafola atu ai i tagata o le a latou manuia i le nuu pe afai latou te tausia poloaiga [tagai i le 1 Nifae 2:20; 2 Nifae 4:4]. O lenei folafolaga e masani ona aumai faatasi ai ma se lapataiga, afai latou te le tausia poloaiga a le Atua, e aveeseina i latou mai Lona afioaga [tagai i le Alema 36:30].”
Elder Quentin L. Cook o le Korama a Aposetolo e Toasefululua, “E Faamoemoe Ua e Silafia, Sa Matou Oo i se Taimi e Sili Ona Faigata,” Liahona, Nov. 2008, 104.