Au Bun Aoti ae Ituaki n taian Karai
Sandra Jennings, New Mexico, USA
Iai au bwai aika tamnein uoman aoti aika uarereke aika katamaroaaki n taian karai are I mwakuri iaona inanon teuana te ririki. E nang moanna n tia ngke I a kunea bwa I kaairua ni karan temanna mai ibuakoia taian aoti akana a uarereke. Ngkai bon te kara ae riai ibukin karabaan te aoti, I aki ataa au kaairua ni karokoa are I nooria bwa te aoti e kauntaba ma kaara ake a tomaaki iaon te korobanna.
I bon rawawata. I kabanei taai aikanne ni mwakuri iaon te tamnei, ao te iango ni kanakoakin taian karai man kaara ake a kaairua e bon kuri ni kabwaranano. Ma matau aika ranran, I kauka te turam ni maange ni karenakoa te tamnei inanona.
I tekateka n te taibora n te tabo are I kawakinii iaona au bwai n itutu n tanginiwenei ni buan tamnein au aoti ae uarereke ao ni waaki nako iaon bwaai tabeua. Ma I aki kona ni karaoia—I aki kona ni kanakoa te bwai are I a tia rangin mwakuri korakora iaona. I kauka te turam ni maange ao ni manga anaa au kunnikai. I a kunea te timoi ni karai iakuun te kara are e kaairua ao ni koreia raoi ma te karaurau. N rairakin te tamnei, I a moanna ni kanakoa te karai.
N taai tabetai te kamwawaaki e eienikuriaki. N tabetai I kunea bwa e bon aki bebete. I aki koaua raoi bwa n na kanga ni manga kamauna te bwai are I a tia ni karaoia. N tabetai N na riai ni korea te karai teutana imwiin teutana. E anga ana kaeka natiu te mwaane bwa e iangoia bwa N na riai ni karaoa te mwakuri ni kabane bwa e aonga n eti. Bon tii te tamnei ma mwakuri ni katamaroa iaon taian itutu n te karai, ni kabane.
Ngke I a kanakoi taian karai, I a moanna ni iangoa te rairannano ao aron matoatoana ni kaetii taian kaairua are I karaoi. Te rairannano ae koaua e kainnanoa te kantaninga ae korakora, mwakuri ao te korakai, ma e bon uaana karaoakina.
Ngke I kabwaraa karain te aoti, I kauringaki bwa te rairannano e kariaia ana Mwakuri ni Kamaiu Iesu ni kanakoa memean te bure man maiu ao ni buokai ni maiuakina ae boou. Au “rairannano n tamneia aoti aika uarereke” a tine ni mweengau, te kauring bwa N na karaoa ae eti, n aki bwarannano ngkana I bwaka. Ao n uringnga bwa rinanon te rairannano, te Mwakuri ni Kamaiu e na karaoa te bitaki.