Wiikin te Itita
Ko kona ni katauraoiko ibukin te Itita man reireiniko ibukin terana ae riki inanon te wiiki imwain Taurakin ao Manga Utin Iesu Kristo. Waakinna waniua te bong imwain te Itita, wareka bwaai ake a riki ao karinani kiibu n te boki ae tabu ni katoa bong.
Kaonobong
Te motirawa ae e kakaawaki ae aranaki bwa te Toa ae Te Riao bon tii onoua te bong raroana. A rawata aomata aika a roko i Ierutarem bwa a aonga n anga aia karea n te tembora n te bong anne. Iesu e nako Betania, te kaawa irarikin Ierutarem. E na tiku ikeikei inanon nimaua te bong ma Raoraona Raataro, Maria, ao Maata. Maria e kabira waen Iesu ma te oera.
Taraa Ioane 12:1–3.
Taabati
Iesu e rianna mai Betania nako Ierutarem. E toka iaon te aati n rinnako n te kaawa, n aron te kibu n te O Tetemanti are e taku bwa E na karaoia. Aomata a kinaa bwa aia uea, a takaarua, “Otanna,” ao a kawenei baa n nii imwain kawain te aati n tuuka te bareka bwa e na aki kabareka te Tia Kamaiu. Iesu e kawara te tembora ao ni manga okira Betania.
Taraa Tekaria 9:9; Mataio 21:1–11; Mareko 11:1–11.
Moanibong
Iesu e nooria aomata ni kabooi ao ni kabooinakoi bwaai inanon te tembora. Ibukina bwa e tangira te tembora bwa e na riki bwa te “auti n tataro,” E kanakoia ma iai. Ngkanne E a kamaiuia aomata ake a mwauku ke a mataki. Ibonga ake a bwakantang a un Irouna.
Taraa Mataio 21:12–17; Mareko 11:15–19.
Kauabong
Iesu e anga reirei nakoia aomata n te tembora ao iaon te tabuki ae aranaki bwa Maungan Oriweta.
Ibonga a iangoa tiringan Iesu. Temanna mai buakoia Ana Reirei, Iuta Itekariota, e kariaia bwa e na a anga Iesu nakoia ibonga ni kaaibibiti ibukin 30 te koin ae te tirewa.
Taraa Mataio 25:31–46; 26:14–16.
Katenibong
Booki aika a tabu aki taekinna bwa terana ae karaoia Iesu n te bong aio. Tao e kabanea te bong anne ma Ana reirei. Ko kona ni wareka te taeka ni kaikonaki ibukiia kiibono ake tengaun, te karaki are e anganiia Ana reirei ni buokiia ni katauraoia imwain Ana Kauaoki.
Taraa Mataio 25:1–13.
Kaabong
Ana reirei Iesu a katauraoia ibukin te amarake n te Toa ae te Riao. Inanon tain te amarake, Iesu e tuangiia ana reirei bwa temanna mai buakoia e na kaakeaa. Ngkanne, ni buokiia bwa ana uringnga, E anganiia te toa ibukin te moantai. Iesu e nako nakon te Onaroka i Ketetemwane bwa e na korakai ibukin ara bure ao n tataro nakon te Atua. A roko aomata ma te kabaang ao a katikia. Ana reirei a birinako ma te maaku.
Taraa Mataio 26:17–29, 36–56.
Kanimabong
E a uotaki nakon te ibonga ae rietaata, Kaiaba. Ana reirei Iesu ae Betero e kaakea bwa e aki kina. Iesu e titirakinaki iroun te kowana, Birato, ao iroun Erote. E motikaki taekana bwa e na tiringaki iaon te kaibangaki. Iesu e bon tauraki iaon te kaibangaki. Te aomata ae kaubwai ae arana Iotebwa e kawenea Iesu inanon ana ruanimate. Tinan Iesu, Maria, ao Maria te i Maketara a kawara ruanimatena.
Kaonobong
Rabwatan Iesu e wene inanon te ruanimate. Te atirababa ae bubura e kaweneaki imatan te mataroa. Te ibonga are e buakaka e butiia Birato bwa e na teiakinaki ma itinaniku te ruanimate bwa a na akea ae e na rin.
Taraa Mataio 27:57–66.
Te Taabati ae te Itita
Iesu e bon mangauti! E a tia n teirake man te ruanimate. Te anera e ruo ma ikarawa ao e karabinoa te atibu.
Iesu e tuangiia Ana reirei bwa a ana anga reirei ao ni bwabetitoia tabeman ao ni berita bwa e na mena irarikiia n taainako.
Taraa Mataio 28.
Korotamnei iroun Matthew Reier; eeta, man te maing: Iesu E Otinako nako Betania n te Tairiki, iroun James Tissot; Rinin Kristo n Tokanikai i Ierutarem, iroun Harry Anderson © IRI; Kamaiuan te Aomata ae Matakii, iroun Harry Anderson, bwaintangira man Pacific Press Publishing, Inc., e na aki kaeweaki; Te Bwana mai Karawa, iroun James Tissot; kabwarabwara man Niman mai Buakoia A Wanawana, iroun Walter Rane, bwaintangira man Church History Museum; Kristo i Ketetemwane, iroun Harry Anderson © IRI; kabwarabwara man Te Tauraki n te Kaibangaki, iroun Harry Anderson © IRI; Taunakin Kristo, iroun Carl Heinrich Bloch, kamanenaaki man ana kariaia te National Historic Museum at Frederiksborg i Hillerød, Denmark, e na aki kaeweaki; inano: E aUti, iroun Del Parson