O se Ili, o se Masini Mimiti Otaota, ma se Ipu Kuki
Rindi Haws Jacobsen, Iuta, ISA
I se tasi taumafanafana sa malaga ai lo matou aiga talavou i le 2000 maila (1,200km) i le isi itu o le atunuu mo le galuega fou a lo’u toalua. Sa matou sagisagi fiafia i lenei vaaiga fou, ae na matou lagona lo matou mamao ese mai lo matou fale, lo matou aiga, ma isi mea uma na matou iloaina. Na matou taunuu i lo matou fale fou i le maligi o timuga, ma i se taumafaiga e faasao le kapeta fou faatoa fola o lo matou fale, na ma la’uesea ai mea mai le loli, o faamalu i luga ma ieafu e afei ai vae. Na ma iloa o timuga mamafa na lolovaia ai potu i lalo, ma sa ma pulatoa i ai ina ua mavae ona la’u ese mea uma.
Na foliga lelei mea uma i le po, ma ina ua momoe le ma fanau laiti e toatolu sa ma faatopetope ai ma Greg ona teu lo ma moega. Na ma taufai vaivai uma, ma sa matua manaia lava le faapalasi atu i le moega. Ae ui i lea, ou te le iloa, ae na lagona e Greg e tatau ona la’u ese mea mai le isi pusa.
Na ou fai atu, “Se faamolemole ta momoe. E mafai ona la’u ese i le taeao.”
Na lulu lona ulu ma agai atu i le potu i lalo. Ina ua mavae ni nai minute, na ou faalogoina lana faataio. I lo’u popole, na ou momoe atu ai i le potu i lalo ma sa faafetaui au e se lolovai laitiiti. Na ma tutu iina ma o ma tauau ua fepiita’i ao amata tuputupu ae pea le vaitimu malulu ma ua pa’ia o ma tapuvae. Na vave ona ma galulue e tatoso pusa i luga o le faasitepu. Na ou lagona le leai o se faamoemoe ma matua le iloa le mea e fai, ua fefiloi o’u loimata ma le lolovai i le fola.
Na ou vili i le tagata lava e toatasi o le Ekalesia ma te iloa i la matou uarota fou, o Brother Lindsay Sewell, mo se faamatalaga i le faaaogaina o le pamu e mitiina le vai. Na ta’u mai e Brother Sewell ni nai fautuaga vavave, ona ou toe foi lea e taumafai e faasao a matou meatotino. I le vaeluaga o le po, na tatagi ai le logo o le faitotoa. Ina ua tatala atu le faitotoa, sa faafeiloaia au e Brother Sewell, sa i ona lima se ili, se masini mimiti otaota susu, ma se ipu kuki sukalati.
“E foliga mai tou te manaomia sina fesoasoani,” o lana tala lea ma ataata. Na vave lava, ona ou le toe lagona le mamao ese mai lo’u aiga.
I le po atoa, na nofo mai ai Brother Sewell, e taumafai matou te foia le lolovai. Ina ua oo le maualuga o le vai i le potu i lalo i le sili atu ma le futu (30 cm) le loloto, na ia fautuaina matou te viliina le matagaluega o le fuimu; lea na latou aumaia pamu tetele ma foia ai le faafitauli.
O le taeao na sosoo ai na oo mai ai Sister Sewell ma isi tagata o la matou uarota fou ma meaai, o uaea uumi, ma isi masini mimiti otaota. Na lofituina i matou i lo latou agalelei. I le faaiuga na faasaoina uma a matou meatotino.
Ou te matua faafetai i le avea ai o au o se tasi o Le Ekalesia a Iesu Keriso o le Au Paia o Aso e Gata Ai. Po o fea lava ou te alu i ai, e i ai pea lava tagata o le ekalesia o loo faatalitali mai ma lima mafola e faafeiloai lo’u aiga ma fesoasoani i taimi e manaomia ai.