Ang Sekreto sa Kalampusan

Edis Hazel T., edad, 11, El Salvador

Sa gamay pa ako ug nagkat-on sa pagbasa, lisud kaayo kadto. Apan uban sa tabang sa akong mama ug sa Langitnong Amahan, nakat-on ako sa pagbasa. Ang akong suod nga higala, nga si Renzo, naglisud usab sa pagkat-on og basa.

Usa ka adlaw giingnan nako siya nga hatagan nako siya og sekreto nga makatabang kaniya nga makat-on sa pagbasa tungod kay kini nakatabang kanako. Miadto kami sa nataran sa eskwelahan. Akong gitudloan si Renzo sa pag-ampo, ug siya nag-ampo ngadto sa Langitnong Amahan, nangayo og panabang.

Pagkahuman sa tuig tingtungha, si Renzo ug ako nakadawat og medalya sa pasidungog sa pagbasa tungod sa tabang sa Langitnong Amahan. Ako nasayud nga ang Langitnong Amahan motubag sa atong mga pag-ampo.