Kaligdong: Usa ka Mahangturon nga Baruganan alang sa Tanan
Ang paagi sa atong sininaan mopakita sa atong pagsabut sa ebanghelyo ni Jesukristo.
Usa sa mga hagit nga giatubang sa mga miyembro sa Simbahan ni Jesukristo sa mga Santos sa Ulahing mga Adlaw karon mao ang pagsunod sa mga baruganan sa pagkaligdong dinhi sa nagkaanam og ka dili ligdong nga kalibutan. Bisan lisud man kini, atong ikapakita ang atong pagkadisipulo ngadto sa atong Manluluwas nga si Jesukristo pinaagi sa pagsunod sa mga baruganan sa pagkaligdong sa Simbahan. Ang pagkaligdong naglangkob sa sininaan, pinulongan, hunahuna, ug personal nga kinaiya, apan dinhi ganahan ako nga mopokus sa sininaan.
Sa sinugdanan, ang dakong katuyoan sa pagsinina mao ang pagtabon sa atong mga lawas ug pagpanalipod niini gikan sa mga elemento. Kadto nga mga katuyoan nagpadayon, bisan og ang pagsinina karon nagdala usab og mas komplikadong mga katuyoan. Karon kini mahimong usa ka pagpahayag sa daghang mga butang sama sa pagkaadunahan, kahimtang sa katilingban, pagkaindibidwal, o pagkasakop. Apan ang pagsinina mopakita sa atong mga batasan ug mga mithi. Alang sa mga Santos sa Ulahing mga Adlaw, ang pamaagi sa atong sininaan mopakita sa atong pagsabut ug pasalig sa ebanghelyo ni Jesukristo.
Sa kalibutan nga kanunay nga nagtinguha sa pagpahuyang sa atong pagsabut kon si kinsa kita ug unsa kita sa umaabut, ang pagsunod sa baruganan sa pagkaligdong makapalambo sa atong pagsalig. Pinaagi sa pagpuyo ug pagtudlo niini nga baruganan, kita makatabang sa pagsilsil sa sama nga pagsalig ngadto sa sunod nga henerasyon.
Unsa Ang Pagkaligdong?
Ang pamplet nga Alang sa Kalig-on sa mga Kabatan-onan mihatag sa nag-unang mga sundanan alang sa pagkaligdong. Kini nga boklet magamit kaayo alang sa mga batan-on ug mga hamtong: “Ang dili ligdong nga pagsinina naglakip sa mubo nga mga short ug mga sayal, hugot nga sinina, mga sinina nga dili motabon sa tiyan, ug ubang malaw-ay nga sinul-uban. … Ang mga babaye kinahanglan nga magsul-ob og sinina nga nagtabon sa abaga ug dili mosul-ob sa sinina nga dakog abli sa atubangan o sa likod o malaw-ay sa bisan unsa nga paagi. … Ang mga lalaki kinahanglan usab mopatunhay og kaligdong sa ilang panagway. Ang tanan kinahanglan nga dili mogamit og nanubrang pagsinina, panagway, ug uso sa buhok. Kanunay nga magmahinlo ug magmalimpyo ug likayan ang dili hapsay o dili angay nga kaswal nga sinina, pamustura, ug mga pamatasan. Pangutan-a ang imong kaugalingon, ‘Komportable ba ako sa akong panagway kon ako anaa sa atubangan sa Ginoo?’”1
Tinguhaa ang giya sa Espiritu samtang kamo mopili og ligdong nga mga igsusul-ob. Dugang pa, samtang maghunahuna ka sa mga baruganan nga may kalabutan sa kaligdong, ikaw mahimong makabenepisyo gikan sa pagpangutana sa imong kaugalingon og piho nga mga pangutana sama niini:
-
Ako mipakita ba og daghang bahin sa akong lawas kon ako molingkod, motuwad, mokab-ot, o mosaka og hagdanan?
-
Ako mihimo ba og butang nga madani ang uban pinaagi sa pagsul-ob og sinina nga malaw-ay o makapadani?
-
Ako kinahanglan ba nga mo-adjust, mosuksuk, o mousab sa akong mga temple garment aron lang makasul-ob og usa ka piho nga butang?
Nganong Pagkaligdong?
Kon kita mas makasabut sa doktrina sa luyo sa mga baruganan sa pagkaligdong, kita makaamgo nga ang pagkaligdong usa ka hiyas nga moggiya ug mokontrol sa lihok.
Ang doktrina luyo sa pagkaligdong nagsugod sa atong kahibalo nga kita mga anak sa Dios, gilalang sa Iyang panagway (tan-awa sa Moises 2:27). Ang atong mga lawas sagrado nga mga gasa gikan sa Langitnong Amahan ug adunay piho nga mga katuyoan nga Iyang giplano. Isip mapasalamaton nga dumadawat, kita moila niini nga gasa pinaagi sa pagtratar sa atong mga lawas sama sa Iyang gimando kanato (tan-awa sa D&P 88:33). Kita makakat-on sa pagbansay, pagkontrol, ug pagpugong sa atong mga lawas ug sa pisikal nga mga gamit niini aron mahimong sama sa Langitnong Amahan.
Gikan sa sinugdanan, ang Ginoo misugo sa Iyang mga anak sa pagtabon sa ilang mga lawas. Human og kaon nila ni Adan ug Eva sa gidili nga prutas, ang ilang mga mata nabuka ug sila nakabantay nga sila hubo. Si Adan ug si Eva mitabon sa ilang kaugalingon sa yano nga mga saput nga hinimo sa dahon sa mga igera. Apan ang mga saput dili paigo, busa ang Ginoo mihimo para kanila og mas ligdong nga mga sinina nga panit. (Tan-awa sa Genesis 3:7, 21.)
Busa ang Dios adunay mas taas nga sumbanan, sama sa Iyang gibuhat karon. Ang iyang mga sumbanan dili sama niadtong sa kalibutan. Sama sa Iyang giingon sa Isaias 55:8–9:
“Kay ang akong mga hunahuna dili mao ang inyong mga hunahuna, ni inyong mga dalan akong mga dalan, nag-ingon ang Ginoo.
“Kay maingon nga ang mga langit habog kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna.”
Usa ka Baruganan sa Tanang Panahon
Tungod kay ang pagkaligdong usa man sa “mas taas nga dalan” sa Dios ug dili usa ka pagpasar sa uso, kini gitudlo na sa tanang mga panahon. Hunahunaa kining uban pang mga ehemplo sa kasulatan kabahin sa pagsinina ug unsa ang ilang gipangtudlo kanato kabahin sa pagkaligdong.
Ang pagkaligdong nagpakita og pagkamapainubsanon. Ang propeta sa Basahon ni Mormon nga si Jacob misaway sa garbo ug paghigugma sa mga bahandi. Siya miawhag sa iyang mga katawhan sa paglikay sa ilang mapasigarbuhong mga kasingkasing sa pagdaut sa ilang mga kalag. Usa sa mga paagi nga ilang gipakita ang ilang sobra nga garbo mao ang ilang pamaagi sa pagsinina. Si Jacob misulti kanila, “Tungod kay ang uban kaninyo nakabaton og labaw pa ka daghan kay sa inyong mga kaigsoonan kamo gibayaw sa garbo sa inyong mga kasingkasing, ug nagpakita og tikig nga mga liog ug taas nga mga ulo tungod sa kamahal sa inyong saput, ug midaug-daug sa inyong mga kaigsoonan tungod kay kamo nagtuo nga kamo labaw nga maayo kay kanila” (Jacob 2:13).
Ang ideya nga mahimong mapainubsanon sa atong pagsinina mas gipakita sa Doktrina ug mga Pakigsaad 42:40: “Dili kamo magmapagarbuhon diha sa inyong kasingkasing; himoa nga ang inyong tanan nga mga saput mahimo nga yano.” Kini ba nagpasabut nga kita dili makasinina sa uso? Dili, kita kinahanglan nga magsinina nga angay para sa okasyon, apan kita kinahanglan nga dili maghunahuna kaayo kon unsa ang mga pangalan sa brand o kon kita aduna sa kinabag-ohan nga uso. Mas maayo nga gamiton ang pinansyal nga mga kapanguhaan alang sa mas molungtad ug makahuluganon nga mga katuyoan.
Ang atong sininaan sa pagsimba nagpakita sa atong balaan nga pagtahud alang sa Ginoo. Ang Ginoo mimando kang Moises sa pagbuhat og balaang sinina nga mahimong angayan nga gamiton sa Iyang balaang balay (tan-awa sa Exodo 28:2). Klaro gikan niini nga sugo nga ang Ginoo mibati nga ang pang-uran nga sinina dili angayan para sa ingon ani nga katuyoan. Kita ba, sama kang Moises, mopakita sa atong mga pagbati ngadto sa Langitnong Amahan pinaagi sa pagsinina og angay sa pagsimba?
Sama sa gipakita niini nga mga ehemplo, “ang mga propeta sa Dios kanunay nga nagtambag sa Iyang mga anak sa pagsinina sa ligdong nga paagi.”2 Sa atong panahon kita gipahinumduman nga “ang inyong sininaan usa ka timailhan unsa mo nga matang sa pagkatawo. Ang inyong pagsinina ug pamustura naghatag og mensahe mahitungod kaninyo ngadto sa uban ug makaimpluwensya sa inyong linihokan ug sa uban. Kon kamo maayong mamustura ug ligdong nga magsinina, kamo nagdapit sa pagpakig-uban sa Espiritu ug makahimo og usa ka maayo nga impluwensya niadtong anaa sa inyong palibut.”3
Ang mga Panalangin Inubanan sa Pagkaligdong
Usa sa labing nag-una nga mga panalangin uban sa pagkaligdong mao ang paglambo sa pagsalig. Usa ka sister ang nagpakigbahin og istorya kabahin sa usa ka higala kinsa nakakat-on—ug napanalanginan pinaagi sa—mga baruganan sa pagkaligdong samtang nagkat-on kabahin sa ebanghelyo:
“Pipila sa mga ting-init ang milabay, usa sa akong kauban misimba uban kanako. Siya miabut sa among balay og sa wala pa kami manglakaw siya nagsul-ob og sinina nga tradisyonal alang sa among init nga klima: usa ka walay manggas nga kamisin. Ako midayeg nga iyang nasabtan nga ang pag-adto sa simbahan usa ka higayon sa pagsul-ob og sinina, ug kami nanlakaw na. Ang ubang mga miyembro sa ward miabi-abi kaniya sa among kongregasyon, ug siya mibalik og kadaghan sa sunod-sunod nga mga semana. Siya gani misugod sa pag-apil og mga miting nga pagpalambo sa panimalay, pamilya, ug sa personal ug nagdala sa iyang daghan nga mga anak ngadto sa Primary ug mga kalihokan sa kabatan-onan. Panahon niadtong mga tunga-tunga sa semana nga mga kalihokan sa mga adlaw sa ting-init, siya sa kasagaran magsul-ob og walay bukton nga blouse ug short kutob sa tunga-tunga sa paa. Siya dili bulgar nga nagsinina, apan klaro kaayo nga siya wala pa makasabut sa mga sumbanan sa Santos sa Ulahing mga Adlaw.
“Human sa pipila ka semana, siya akong gipangutana kon siya ganahan ba nga mas makakat-on og daghan pa kabahin sa Simbahan gikan sa mga misyonaryo. Siya misulti kanako nga siya maulaw ug nga siya dili komportable nga makig-istorya og mga tawo nga dili niya kaila. Siya gusto lang nga mopadayon sa pag-apil sa pagsimba ug sa mga kalihokan sa among ward ug mipasalig kanako nga kon aduna siya’y bisan unsa nga pangutana, siya mangutana kanako o pipila sa mga tawo sa ward nga iya nang nakaila.
“Kini nakapaikag kanako nga samtang siya nagpadayon sa pagsimba ug sa pagtambong sa mga kalihokan sa Simbahan, siya nagsugod sa pagsul-ob og mas taas nga sayal, mas taas nga mga short, ug mga sinina nga adunay mga bukton. Sa sinugdan ako naghunahuna nga kadto adunay kalabutan sa panahon sa tinglarag, apan sa kaulahian ako nakaamgo nga siya nag-obserbar kon giunsa sa iyang mga kaubang mga Santos sa Ulahing mga Adlaw sa pagsinina.
“Ako wala masayud nga ang iyang kausaban sa sininaan mao lamang hinungdan sa pagsaka sa iyang pagsalig nga akong nabantayan kaniya, apan sa akong hunahuna kabahin kini niini. Samtang siya mipadayon sa pagkat-on sa mga baruganan sa ebanghelyo, sama sa iyang balaanong panulundon isip usa ka anak nga babaye sa Dios, ang iyang pagbati sa bili sa iyang kaugalingon misaka. Ang iyang pagsalig misaka sa dihang siya nagsugod nga mas nakasabut sa mga rason luyo sa pipila ka mga butang nga atong gibuhat. Ug samtang ang iyang pagsalig misaka, siya mas ganahan nga makakat-on og mas daghan kabahin sa ebanghelyo—apil ang pagpatudlo sa mga diskusyon sa mga misyonaryo, usa ka butang sa una nga nakapanerbyos kaniya.
“Ang iyang sininaan usa lamang ka aspeto sa iyang pagkasayud ug pagkasabut sa mga baruganan sa ebanghelyo ug mga sumbanan, apan sa iyang nakita siya nakahimo sa pag-usab niana nga aspeto sa iyang kinabuhi, iyang nakita nga siya makahimo usab og mas daghang importanting mga kausaban. Sa kaulahian, kini nga mga kausaban midala kaniya sa konbersyon ngadto sa ebanghelyo ni Jesukristo ug sa iyang pagpamiyembro sa Simbahan. Sa kaulahian, siya natugahan sulod sa templo, ug ang iyang sinina wala na magkinahanglan og kausaban tungod kay napraktis na niya ang mga baruganan sa pagkaligdong.”4
Samtang ang pagkaligdong nahimong hiyas nga mokontrol ug mopasarang sa atong mga lihok sa atong mga kinabuhi, kita usab makakita og pagsaka sa atong pagbati sa bili sa kaugalingon. Hinumdumi ang mga saad diha sa Doktrina ug mga Pakigsaad 121:45–46:
“Himoa ang hiyas nga modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.
“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran.”
Unta kitang tanan magkugi aron makasarang niining mga panalangin.
Ayaw’g Sunda ang Manikin
Ang manikin mosul-ob og bisan unsa nga ibaligya sa kalibutan. Ang imong sumbanan mas taas pa kay sa niana.
Ang Imo bang mga Sumbanan Nagkaubos?
Kon kini hilabihan ka hugot, hilabihan ka mubo, o hilabihan ka law-ay, wala kini mohaum sa mga baruganan sa Simbahan. Ayaw og usba ang inyong mga baruganan aron sa paghaum sa kalibutan. (Tan-awa sa Alang sa Kalig-on sa mga Kabatan-onan,14–16.)
Ayaw og Pamub-i ang bili sa Imong Kaugalingon
Ang imong sininaan mopahibalo sa imong mga sumbanan. Ipadala ang husto nga mensahe. (Tan-awa sa Alang sa Kalig-on sa mga Kabatan-onan, 15.)
Mga Sumbanan
Ikaw dili makalabaw kanila. (Tan-awa sa Juan 14:15.)
Pagsinina alang sa Kalampusan
Pagsinina og Tarung Ayaw tuguti nga ang sayop nga pagpili modaot kanimo. (Tan-awa sa Alang sa Kalig-on sa mga Kabatan-onan,14–16.
Paningkamot sa Pagkab-ot og usa ka Butang nga Mas Taas
Ang Ginoo nagdapit kanimo sa pag-andam sa imong kaugalingon sa pagsulod sa Iyang panimalay. Kini adunay dako nga kalinaw ug talagsaon nga mga panalangin. (Tan-awa sa D&P 88:119).
Gikan sa wala: gilitratohan sa Busath Photography; gilitratohan ni John Luke; gilitratohan ni Christina Smith
Sa wala: gilitratohan ni Craig Dimond; sa tuo gilitratohan ni Emily Leishman Beus
Gikan sa wala: gilitratohan nila ni Christina Smith ug Craig Dimond