O Le Tagata e i ai Tali
Afai e i ai ni fesili a uo a Christian Monzon, latou te o atu ia te ia mo se fesoasoani.
O le a le mea e te faia pe a e fetaiai ma ni ponokarafi? I se tasi aso sa faanoi ai e Christian Monzon o Asuncion, Parakuei, se telefoni feaveai mai lana uo i le aoga e taalo ai i ni taaloga o loo i ai i totonu. Sa ia mauaina ai o loo i ai ni ata leaga o loo teu ai i totonu.
Sa leai se masalosalo i le mafaufau o Christian i le mea e tatau ona faia e lana uo i ia ata, o lea sa fesoasoani ai Christian ia te ia ina ia iloa le manaomia o le aveesea o nei ata leaga. Sa faailoa atu ma le filemu e Christian le afaina o nei ituaiga mea. Sa ia faapea atu, “Afai o oe o se tama, o le a e le manao i lou atalii e vaai atu i na mea.”
O se vaega o mea na tau atu e Christian i lana uo na maua mai le Mo Le Malosi o le Autalavou. Sa fai mai Christian o lea tusi sa fesoasoani ia te ia i vaega uma o lona olaga. “Semanu ou te le o i ai i le mea lea ua ou i ai pe a na leai le tusi,” sa ia fai atu ai. Ua ia tuuina atu foi ni kopi i nisi o ana uo i le aoga. Sa latou tauina atu ia te ia faapea ua latou maua ai ia taiala latou te manaomia i faafitauli patino.
O fea e te maua ai le fesoasoani i le feagai ai ma faaosoosoga o le olaga? E iloa e Christian o le Mo Le Malosi o le Autalavou o loo ofoina mai ai fesoasoani i le tele o faaosoosoga o loo taatele i ana uo—fualaau faasaina ma le inu ava malosi, mo se faataitaiga. O nisi o ana uo ua maua le Initoneti i totonu o o latou aiga, ae ua faigofie ona latou faaaogaina—ma maua ai ata leaga—i saite o Initoneti.
O uo i le aoga e masani ona o atu ia Christian ma lona uso matua o, Jimmy, mo ni fesoasoani i o latou faafitauli ona latou te talitonu o nei alii e toalua o le Au Paia o Aso e Gata Ai o le a maua ai ni tali. E faaaloalogia i laua uma mo o laua talitonuga e a laua uo i le aoga. O uo a Christian i le aoga ua lava lo latou faaaloalo ia te ia ua latou filifilia ai o ia e avea ma o latou sui. I le i ai o isi mea, o lona uiga o ia o le a fai ma o latou sui pe afai o le a aafia i latou i ni faafitauli i le aoga.
E faapefea ona e fuafua mo le lumanai? Fai mai Christian, o lona iloaina o loo i ai se auaunaga faamisiona i lana fuafuaga, ua fesoasoani lea ia te ia e faatulaga mea e faamuamua. Pe a maea lana aoga tulagalua, e manao o ia e suesue le poto faatekinolosi o faamatalaga. Ae afai e te iloa o loo e sauniuni mo le mauaina o le Perisitua Mekisateko, alu i le malumalu, alu i le misiona, ma le faaipoipo, o le a fesoasoani ia te oe ia e iloa ai pe faapefea ona e saunia.
Ae mo Christian, e faapena foi le aoaoina o mataupu faavae ma le talaaga o le Ekalesia. O le mea moni, o tala sili ona ia fiafia i ai e maua mai lea i talaaga o le Ekalesia. Mo se faataitaiga, e na te maua le malosi i aafiaga o le Tolauapiga a Siona i le 1834 ina ua tau osofaia e le au faomea le tolauapiga ae sa folafola e le Perofeta o Iosefa Samita o le a le faatagaina lea mea e le Alii. I lena po, o se afa matautia sa faataapeina ai le au faomea.1 O lenei mea ua tau atu ai ia Christian e mafai ona ia saunia mo le lumanai e aunoa ma le fefe aua o le Alii e mafai ona puipui ia i latou o e auauna ia te Ia.
E faapefea ona faamalosia lau molimau? O se tasi auala sa maua e Christian o le suesue lea i le olaga o le Perofeta o Iosefa Samita. Sa ia faasino mai le Mataupu Faavae ma Feagaiga 135:3 lea e faapea mai o Iosefa Samita “ua sili atu ana mea ua faia, vagana o Iesu Keriso lava, mo le faaolataga o tagata i lenei lalolagi, i lo soo se isi lava tagata ola na ola mai.” Sa faaopoopo mai Christian, “O le iloaina o Iosefa Samita ua suia ai lo’u olaga.”
Fai mai o ia o le suesueina o le talaaga o le Ekalesia “e te malamalama ai i le vaega e te faia i lenei vaitaimi.” O se tasi o tala e fiafia i ai o loo taua ai alii talavou sa fesoasoani i le faasaoina o le aumalaga o taavale tosolima i le 1850 o le vaega a Matini. O nei alii talavou sa amoina paionia ua vaivai ma le fia aai i le Vaitafe o le Sweetwater sa matuai malulu.2 Sa fai mai Christian o loo ia faamoemoe e na te faaalia lena ituaiga o agalelei ma le lototele pe afai o le a feagai ai ma lena tofotofoga.
Aisea e taua ai le talalelei i lou olaga? E i ai foi le tali a Christian mo lena fesili. O se ositaulaga i le Perisitua Arona, e auai o ia i le seminare i taeao uma faatasi ai ma isi talavou mai le Paranesi o Cocuere, Siteki o Capiata Parakuei. O le vasega o le seminare e faia i lona fale; o lona tina o le faiaoga.
O le mea sa ia aoaoina e uiga i le ata o le faaolataga a lo tatou Tama Faalelagi ua fesoasoani ia te ia ina ua faafuasei ona maliu lona tama matua peleina. Sa mafai ona ia maua le mafanafana ma le filemu ona o le “faamoemoega o loo aumaia e le talalelei ia i tatou.”
Sa ia fai mai o le talalelei ua fesoasoani ia te ia i vaega uma o lona olaga. “Ou te iloa o tusitusiga paia o ni faaaliga mai lo tatou Tama o i le Lagi,” sa ia molimau mai ai. “Ou te iloa o le Ekalesia moni lenei, ma ou te iloa o loo soifua Iesu Keriso.”